رومیان 10 - کتاب مقدس به زبان لکی - گویش مرکزی1 اِاِ بِرال، آواخد قلبِم ئو دوعا مِنِ درگا خدا اَرِه یهودیَل یَسَ گه نجاد بِگِرِن. 2 اَرِیَگه اِبارَه اونَل شاتیَ میَم گه اَرِه خدا خیرَت دیرِن، مِنتائای نه اژ رُی شناخت. 3 اَرِیَگه اَ صالح‌بیئینی گه اژ خداءَ‌ئو نشتاسی، ئو وَه دُم ثابت کِردِن صالح‌بیئین ووژونا بین، نوئینَ فِربوبَر اَ صالح‌بیئینی گه اژ خداءَ. 4 اَرِیَگه مسیح آخِر شریعتَ تا هر کی ایمو باری، صالح وَه حساو بای. 5 اَرِیَگه موسی اِبارَه اَ صالح‌بیئینی گه اَر پاءَ شریعتَ هُنَ مَنُیسِنی: «کسی گه ایی حکمِلَ اَنجوم دِ، وَه‌سونگَ اونِلا زِنِه‌یَ مِهِه.» 6 مِنتائای صالح‌بیئینی گه اَر پاءَ ایمونَ موشی: «اِ دل ووژتا نوش ”کیَ گه ویرِ آسمو بِچوءَ بِلِنگ؟“» -یانی تاگَه مسیح باریَ هُار- 7 یا «”کیَ گه بِچوءَ هُار اِرَه دنیا مِردیَل؟“» -یانی تاگَه مسیح اژ مِردیَل زِنیا کِ. 8 مِنتائای او چَه موشی؟ یَگه «ایی کلومَ هار نزیک تو، اِنوم دَم تو، ئو اِنوم دلت‌اِر.» یَه هَراَ کلوم ایمونَسَ گه ایمَه موعظَه مِهِیم، 9 اَرِیَگه اَرّ وَه زوئو ووژِت اعتراف بِهِین «عیسی خداونَ» ئو اِنوم دل ووژِت ایمونِت داشدوئی گه خدا او اژ مِردیَل زِنیا کِردی، نجادَ مَگِرین. 10 اَرِیَگه اِنوم دلَ گه کسی ایمونَ ماری ئو صالح وَه حساوَ مای، ئو وَه زوئونَ گه اعترافَ مِهِه ئو نجادَ مَگِری. 11 اَرِیَگه کِتاو اِشعیا پِخَمَرَ موشی: «هر کی ایمو باری اَر او، خجالتا نِماو.» 12 اَرِیَگه فرخی اِ بِن یهودی ئو یونانی نیَ، اَرِیَگه هَراَ خداونَ، خداون کُلَ ئو چَل‌چَل بِرَکتَ مِئَه کُل کسَلی گه هِنا مَهَنی‌اِر. 13 اَرِیَگه «هر کی نُم خداون هِنا بِهِه، نجادَ مَگِری.» 14 مِنتائای چطور هِنا بِهَن اَر کسی گه ایمونو ناوِردیَس اَری؟ ئو چطور ایمو بارِنَ کسی گه اَژینو نَشتَفتیَ؟ ئو چطور بشتوئِن، اَرّ کسی موعظَه‌ئون اَرِه نِهِه؟ 15 ئو چطور موعظَه بِهَن، اَرّ کِل‌نوئن؟ هَرهُنَ گه اِنوم کِتاو اِشعیا پِخَمَر نُیسیاءَ: «چَنی رنگینَ پال کسَلی گه خَوَر خَوش انجیل اِلومَ مَهَن.» 16 مِنتائای اُوُ کُل گوشو نَگِرتَ ایی انجیلَ، اَرِیَگه اِشعیا پِخَمَرَ موشی: «اِاِ خداون، کی پِغوم ایمَه باوار کِردیِ؟» 17 اِسَه ایمون اژ شنَفتِنَ ئو شِنَفتِن، اژ کلوم مسیح. 18 مِنتائای مَپِرسِم: مَر نَشتَفتو؟ اَلوَت گه شنَفتو: «دَنگو پَشخا بیَسِ سِرُسَر زَمی، ئو کَلومو رَسیَس اَر اَ پر دنیا.» 19 مِنتائای مَپِرسِم: یانی قوم اسرائیل اَ چیئَه گه شنَفتی درک نَهَردی؟ اول‌بار، موسی موشی: «وَه‌سونگَ اونِلا گه ملتی وَه حساو نِمان، هُمَه مارِمَ سر خیرَت؛ ئو وَه‌سونگَ ملت نایونیکا عصبونیتونا مَهَم.» 20 اَسَه، اِشعیا پِخَمَر وَه جورَت موشی: «اونَلی گه مِنِی مِنو نَهَردوئی، مِنو کِردَ دی ئو ووژِم اَر کسَلی گه مِنو نِهِستوئی، آشگارا کِرد.» 21 مِنتائای اِبارَه قوم اسرائیلَ موشی: «تموم روژ دَسَلِم دِریژاِرا کِرد اِرَه قومی کورفِربون ئو اَرضد مِه.» |
@ 2024 Korpu Company