رومیان 1 - کتاب مقدس به زبان لکی - گویش مرکزی

¹ اژ پولُس، خُلُم مسیحْ عیسی، گه دَوَت بیَ تاگَه رسول بو ئو وَخم بیَسَ اَرِه انجیل خدا؛

² هَراَ انجیلَ گه خدا وِرِکار، وَه‌سونگَ پِخَمَرَل ووژ، اِنوم نُسَخ مقدّس وَدَه دائیتی،

³ ئو اِبارَه کُر اوءَ، گه اژ لِحاظ جسم اژ نسِل داوودِ پاتِشا هاتَ دی،

⁴ ئو اژ لِحاظ روحِ قدوسیّت وَه‌سونگَ زِنیابیئِنی اژ مِردیَل وَه قدِرتا اِلوم بی گه کُر خداءَ، یانی خداون ایمَه عیسی مسیحَ.

⁵ خدا وَه‌سونگَ مسیح فیض دائونمو تاگَه رسولَل او بوئیمو ئو کُل ملتَل باریمَ اطاعتی گه اژ ایمونَ.

⁶ یَه اَرِه هُمِه‎‌یش هَس گه دَوَت بینونَ تاگَه هِن عیسی مسیح بوئینو؛

⁷ وَه کُل اونَلی گه اِنوم شیَر روم، خدا دوسو دیری ئو دَوَت بینَ تاگَه ایمودارَل مسیح بوئن: فیض‌وسِلامتی اژ جونِم خدا، باوَه ایمَه، ئو خداون عیسی مسیح، اَر هُمَه بو.

شوق پولُس اَرِه روم

⁸ وِر اژ هر چی، وَه‌سونگَ عیسی مسیح، وَه خاطر کُلتو شگِر خداءِ ووژمَ مَهَم، اَرِیَگه خَوَر ایمونتو پَشخا بیَس اِنوم کُل دنیا.

⁹ اَرِیَگه خدای گه وَه گیون ئو دل اِ انجیل کُری خِلمتَ مَهَمی اَری، شات مِنَ گه چطور هَر هامِ ویر هُمَه

¹⁰ ئو هَر اِ دوعائَلِم یَمَ مِ گه اَرّ خدا بِیتی اِسگَه آخِری بتونِم بام اِرَه تَکتو.

¹¹ اَرِیَگه شوق دیرِم بوئینِمتو تاگَه بِرَکت روحانی‌ای بیَم‌ئونتو گه تقویتتو کِ؛

¹² یانی تاگَه اژ ایمو یَکتِری دلگرما بوئیمو، ایمو مِن ئو ایمو هُمَه.

¹³ اِاِ بِرال، نِمِم بی‌خَوَر بوئینو گه چَن گِل قَصِم داشدیَ بام اِرَه تَکتو، مِنتائای هَر گِلی چیئی پیش هاتیَ، تاگَه اِنوم هُمَه ثمری دِرو کَم، هَرهُنَ گه اِنوم باقی خِرِیهودیَلِم کِردیَ.

¹⁴ اَرِیَگه دِن یونانیَل ئو بَربَرَل ئو دونائَل ئو نایونَل ها مِل مِن‌اِر.

¹⁵ اِسَه، شوق دیرِم گه انجیل اِلوم کَم اَر هُمِه‌یش گه هاینونِ روم‌اِر.

¹⁶ اَرِیَگه مِن اژ انجیل عارِم نِمای، اَرِیَگه قویَت خداءَ اَرِه نجاد هر کی گه ایمو باری، اول‌بار یهود ئو دُماخِرِ یونانی.

¹⁷ اَرِیَگه اِنوم انجیل، اَ صالح‌بیئینی گه اژ خداءَ آشگارا ماو، گه اژ اول تاگَه آخِر اَر پاءَ ایمونَ. هَرهُنَ گه اِنوم کِتاو حَبَقوق پِخَمَر نُیسیاءَ: «آم صالح وَه ایمونا زِنِه‌یَ مِهِه.»

خَضو خدا اَر بشر گناکار

¹⁸ اَرِیَگه خَضو خدا اژ آسمونَ ما اَرضد کُلِ جور بی‌دینی ئو ناراسی مردِمی گه وَه ناراسیو نوا حخیختَ مَگِرِن.

¹⁹ اَرِیَگه اَ چیئَه گه ماو اِبارَه خدا بشتاسین اَر اُوُ آشگارَ، اَرِیَگه خدا اَوَه آشگارا کِردیَسی اَرینو.

²⁰ اَرِیَگه، اَ صفتَل خدا گه نِماو بوئینیو، یانی قویَت ابدی ئو ذات الهی او، ماو اژ اَ اول خلقت دنیا، اِنوم چیئَلی گه خَلک بینَ خو بوئینین. اِسَه اونَ هُیچ دَسپیچی نِرِن.

²¹ اَرِیَگه وَه‌یاآگه خدائو شناسی، مِنتائای اِجور خدا، عزّتون اَری نَنیا ئو شگِرو نَهَرد، بلکِم اِنوم فگِرَلو گرفدار چیئَل باطل بین ئو دلَل نفیَمو تیَریکا بی.

²² ادعا حکمتونَ مَهَرد، مِنتائای اَخمَخا بین

²³ ئو جِلال خدا ابدیو عوض کِردَ گَرد مِجسمَه‌لی اِجور اِنسو فانی ئو مَلَل ئو حِوونَل ئو جونورَلی گه وَه ژیر لَما سُرَ مَگِرِن.

²⁴ اِسَه خدایش اونَل اِنوم شَوَتَل دِلو تسِلیم ناپاکی کِردی، تاگَه بی‌عزّتی بِهَنَ لار ووژو.

²⁵ اونَل حخیختی گه اِبارَه خداءَ عوضو کِردَ گَرد دِرو، ئو مخلوقون اِجال خالق پِرَسی ئو خِلمت کِرد، خالقی گه تا ابد بِمارِکَ. آمین.

²⁶ اَژونَسَ خدائیش اونَل تسِلیم هُواوهوسَل ننگَ‌بار ووژو کِردی. جُ‌جُ ژِنَل‌یشو، رابطَه طبیعیو عوض کِردَ گَرد رابطَه خِرِطبیعیا.

²⁷ هَر اَژی جورَ، پیال‌یش رابطَه طبیعیونَ گَرد ژِنَل ووژو ناءِ لا، ئو اِنوم آگِر شَوَت اَرِه یَکتِری سُتِن. پیالَ گَرد پیال کارَل ننگَ‌بارو کِرد، ئو مِکافات خطائونِ دَرین ووژو گِرتو.

²⁸ هَرهُنَ گه شناخت خدا اَرِه اونَل ارزشدی ناآشدی، خدا اونَل تسِلیم فگِرَل گَنو کِردی تاگَه اَوَه گه نَباس، اَنجوم دَن.

²⁹ اونَل اژ کُلِ جور نادُریسی، شرَباری، طَما ئو گِن‌هِستِن پِرِن. پِر اژ حَسوئی، آم‌کشتِن، جنگ، رِنگَری ئو گَن هِستِن اَرِه کسَلی‌تِرِن. اونَل راوَبار،

³⁰ بُختِم‌چی، دشمن خدا، گُرساخ، قُرات ئو هوفَلِن. اَرِه اَنجوم دائِن کارَل شر، ریئَل نوو دُریسَ مَهَن. فِربون اژ دا‌باوِه‌ئو نِمیَرِن،

³¹ نفیَم، بی‌وفا، بی‌عاطفَه ئو بی‌ریَمِن.

³² وَه‌یاآگه اژ حکِم عادلونَه خدا خَوَر دیرِن گه مِجازات کسَلی گه هُنَ کارَلی مَهَن مرگَ، نه فَخَد ووژو یوئنَ اَنجومَ میَن، بلکِم کسَلی‌شی گه ایی کارِلَ مَهَن، تأییدَ مَهَن.