مِکاشفَه 9 - کتاب مقدس به زبان لکی - گویش مرکزی

¹ ئو فریشدَه پنجِمینِهَه پِف کِردی اِنوم شِپورِهِه، ئو مِه آسارَه‌می دی گه اژ آسمو کَت اَر زَمی، ئو کِلیل چا هاویَه گه تیَه نِریو، داءَ ایی آسارَه.

² او چا هاویَه واز کِردی، دوی‌ای اِجور دوی کویرَه کَلِنگی اَژی داءَ دِریر، هُنَ گه هویَر ئو آسمون اژ دوی چا تیَریکا بین.

³ ئو اِنومجا دوی، قُلَل هاتِن اَررُی زَمی ئو قدِرتی اِجور قدِرت کولاژدُمَل زمینو دائونو،

⁴ ئو وِتون‌ئونو گه ضِرَد نیَن اَر مَرِنَل رُی زَمی ئو نه اَر هُیچ گیای ئو نه اَر هُیچ داری، بلکِم فَخَد اَر مردِمی گه میر خدا اَر توئلو نِرِن.

⁵ ئو صِلا یِئونَ دائونو گه اونِلَ نکُشِن، بلکِم پنج مُنگ عذاوُ بیَن، ئو عذاوُ اِجور عذاو گَزَه کولاژدُم بی وخدی گه مِئَه آما.

⁶ اِ اَ روژِلَ مردِم مِنِی مرگَ مَهَن، مِنتائای نِمَهَنیَ دی؛ آواخد مِردِن دیرِن، مِنتائای مرگ اَژینونَ مِحوای.

⁷ ئو اَ قُلِلَ اِجور اَسبَلی بین آمادَه اَرِه جنگ. اَررُی سرو چیئی بی اِجور تاج طِلا ئو نوم‌رُیو اِجور نوم‌رُی آم بی.

⁸ می‌سَرو اِجور گیس ژِنَل بی ئو دِنونَلو اِجور دِنو شیر.

⁹ سینَه‌پوشی اِجور سینَه‌پوش آهِنینو داشد، ئو دَنگ بالَلو اِجور دَنگ اَسبَل ئو دُریشگَه‌ل فِرِه‌ی بی گه اِریشتونَ ماوِرد اِرَه جنگ.

¹⁰ دُمَل ئو گَزَلونی داشد اِجور دُم ئو گَزَه کولاژدُم، ئو اِ دُمَلو ایی قدِرتونَ داشد گه پنج مُنگ مردِم عذاو بیَن.

¹¹ پاتِشا اونَل فریشدَه چا هاویَه بی گه وَه زوئو عبرانی ’اَبَدون‘ یانی نابودکَر نُمَسی، ئو وَه زوئو یونانی ’آپولیون‘.

¹² ’هِرّو‘ اول رد بی. اِسگَه، دو ’هِرّو‘تِر باس بان.

¹³ فریشدَه شَشِمینِهَه پِف کِردی اِنوم شِپورِهِه، ئو مِه دَنگمی اژ چوار شاخ قُرونی‌گا طِلا گه هار تک خدا، شنَفت؛

¹⁴ گه موئِتیَ فریشدَه شَشِمینِهَه گه شِپور داشدی: «اَ چوار فریشدَه گه اَرتَک روو کَلِنگ فُرات هانِ بَن‌اِر، آزاد کَ.»

¹⁵ اِسَه اَ چوار فریشدَه گه اَرِه ایی سات ئو ایی روژ ئو ایی مُنگ ئو ایی سالَ آماده‌ئو هُیشتوئین، آزاد بین تاگَه یِه‌سِئِم اژ آمَل بِکُشِن.

¹⁶ شِمار اَ سُوارَلشگرَ دوهیس مِلیو بی، گه شِمارِم شنَفتِن.

¹⁷ اَسبَل ئو سُوارَلو گه اِ رویام دی، هُنَ بینَ: زِریئَلونی اِوَر بی، سوئر اِجور آگِر ئو کاو ئو زرد اِجور گوگرد. سر اَسبَل اِجور سر شیرَل بی ئو اژ دَمَلو آگِر ئو دوی ئو گوگردَ ماهاتَ دِریر.

¹⁸ اژ ایی سه بِلا آگِر ئو دوی ئو گوگردَ گه اژ دَمون اِرَماهات، یِه‌سِئِم اژ آمَل کُشِریان.

¹⁹ اَرِیَگه قدِرت اَسبَل ها دَم ئو دُمون‌اِر. اَرِیَگه دُمَلو اِجور مارَلی کِن گه سر دیرِن، ئو وَه اونَل، ضِرَدَ مَرَسِنِن.

²⁰ باقی آمَل، گه اژ ایی سه بِلاءَ نکُشِریان، نه اژ کارَل دَسَلو توئه‌ئو کِرد، نه عَبادت مِلاکَتَل ئو بِتَل طِلا ئو نُخِرَه ئو مَفِرغ ئو بَرد ئو چوئو ناءِ لا، بِتَلی گه نِمَتونِن بوئینِن ئو بشتوئِن ئو اَرئیا بِچِن.

²¹ اونَل هَمیش اژ آم کُشتِن ئو جادوگری ئو بی‌عصمتی ئو دُزیَل ووژو توئه‌ئو نَهَرد.