مِکاشفَه 8 - کتاب مقدس به زبان لکی - گویش مرکزیمیر هفتِم 1 هَریَگه وَرکِهَه میرَ هفتِمینِهَه اِشکونی، اَرِه نزیک اَر نیم سات اِنوم آسمو بیَ کِشمات. 2 اَسَه اَ هفت فریشدَه‌مَ دی گه موسِن اَر وَر خدا، ئو هفت شِپورو دائونو. 3 ئو فریشدِه‌ی‌تِر هات گه مَخَل طِلایَ بی بیتی ئو هوسیا اَرتَک قُرونی‌گا، ئو بِخور فِرِه‌ئونی داءَ بی تاگَه وَه‌گَرد دوعائَل کُل ایمودارَل مسیح، اَررُی قُرونی‌گا طِلا گه ها اَر وَر تخت پیشکَش بِهِه. 4 ئو دوی بِخور، وَه‌گَرد دوعائَل کُل ایمودارَل مسیح اژ دَسَل اَ فریشدَه چیِ بِلِنگ تا تک خدا. 5 اَسَه فریشدِهَه مَخَلِهَه هیزداتی ئو پِرا کِرد اژ آگِر قُرونی‌گا ئو آوشدی اَررُی زَمی، ئو بیَ گِرِمَل ئو گِرِمهُرَل ئو تَش‌بریقَل ئو زمی‌لرزَه. شِپورَل 6 اَسَه اَ هفت فریشدَه گه اَ هفت شِپورونَ داشد حاضر بین تاگَه پِف کَن اِنومو. 7 فریشدَه اولینِهَه پِف کِردی اِنوم شِپورِهِه، ئو بیَ توئِرگ ئو آگِر گه وَه‌گَرد خوین هاوِنتوئینَ یَک‌اِرا، ئو رِشیان اَر زمین‌اِرا ئو یِه‌سِئِم اژ زَمی سُت ئو یِه‌سِئِم اژ دارَل سُتِن، ئو کُل سُزِلَکوئَل سُتِن. 8 فریشدَه دوئِمینِهَه پِف کِردی اِنوم شِپورِهِه، ئو چیئی اِجور کوی کَلِنگی گه اِنوم آگِرَ مَسُت، هُوَ هاوِنت اِنوم دریا، ئو یِه‌سِئِم اژ دریا بیَ خوین. 9 ئو یِه‌سِئِم اژ جونورَل زِنی دریا مِردِن ئو یِه‌سِئِم اژ کَشتیَل نابود بین. 10 فریشدَه سِئِمینِهَه پِف کِردی اِنوم شِپورِهِه، ئو آسارَه کَلِنگی اِجور چُمَت گُرگِرتی اژ آسمو کَت اَررُی یِه‌سِئِم اژ رووئَل ئو کیَنیَل آو. 11 نُم اَ آسارَه ’اَفْسَنْتین‘ بی، ئو یِه‌سِئِم اژ آوَل اژ اَفْسَنْتین تیَلا بین، ئو مردِم فِرِه‌ی اژ اَ آوَ گه تیَلا بوئی مِردِن. 12 فریشدَه چوارِمینِهَه پِف کِردی اِنوم شِپورِهِه، ئو ضرپَه هاوِنت اَر یِه‌سِئِم اژ هویَر، ئو یِه‌سِئِم اژ مُنگ، ئو یِه‌سِئِم اژ آسارَه‌ل، هُنَ گه یِه‌سِئِم اَژینو تیَریکا بی، ئو یِه‌سِئِم اژ روژ بی‌نُیر مَن ئو هَمیش یِه‌سِئِم اژ شو. 13 اَسَه مِه سِیلِم کِرد، ئو شنَفتِم دالی هُنَ گه اِنومجا آسمو بالَ مَگِرتی وَه دَنگ کَلِنگَ موئِتی: «هِرّو، هِرّو، هِرّو اَرِه مردِم رُی زَمی، اَرِیَگه وخدَ دَنگ شِپورَل اَ سه فریشدَه‌ل‌ِتِرَ بااِر.» |
@ 2024 Korpu Company