مِکاشفَه 7 - کتاب مقدس به زبان لکی - گویش مرکزیشِمار میرکَریائَل 1 دُما اَوَه چوار فریشدَه‌‌‌م دی گه هوسیانَس اَر چوار سویک زَمی ئو نوا چوار وا زمینَ مَگِرِن تا هُیچ وای نَچو اَررُی زمین ئو دریا ئو هُیچ داری. 2 اَسَه فریشدِه‌‌‌ی‌تِرِم دی گه اژ جای گه هویَرَ مِ ماءِ رُ ئو میر خداءِ زِنی هایتیَ بی، ئو وَه دَنگ کَلِنگ هِنا کِردیَ اَ چوار فریشدَه گه قدِرتو دائیونو گه ضِرَد بیَنَ زمین ئو دریا، 3 ئو وِتی: «وِر اژ یَگه میر بِیم اَر توئل خادمَل خدامو، ضِرَد نیَن اَر زمین ئو دریا ئو دارَل.» 4 ئو شنَفتِم شِمار میرکَریائَل صد ئو چِل ئو چوار هزار نفر اژ کُل طائفَه‌ل بنی‌اسرائیل بین. 5 اژ طائفَه یهودا دوازَه هزار نفر میر بین، اژ طائفَه رِئوبین، دوازَه هزار نفر، اژ طائفَه جاد، دوازَه هزار نفر، 6 اژ طائفَه اَشیر، دوازَه هزار نفر، اژ طائفَه نَفتالی، دوازَه هزار نفر، اژ طائفَه مَنَسی، دوازَه هزار نفر، 7 اژ طائفَه شَمعون، دوازَه هزار نفر، اژ طائفَه لاوی، دوازَه هزار نفر، اژ طائفَه یِساکار، دوازَه هزار نفر، 8 اژ طائفَه زِبولون، دوازَه هزار نفر، اژ طائفَه یوسف، دوازَه هزار نفر، ئو اژ طائفَه بنیامین، دوازَه هزار نفر. جَرخَه کَلِنگ نجادگِرتیَل 9 دُما اَوَه سِیلِم کِرد ئو اِسگَه، جَرخَه کَلِنگی اژ هر ملت، طائفَه ئو قوم ئو زوئونِم دی گه کس نِمَتونی بشمارتی ئو کُلو هوسیائین اَر وَر تخت ئو اَر وَر وَرک. اونَل کُل چوخائَل اِسبی اِوَرو بی ئو پَلَل خرما اِ دَسو. 10 ئو اونَل وَه دَنگ کَلِنگَ مَقارونو: «نجاد هِن خداءِ ایمِئَه، گه نیشتیَس اَر تخت؛ ئو هِن وَرکَ.» 11 ئو کُل فریشدَه‌ل، هوسیائین اَر دورادور تخت ئو دورادور ریش‌اَسبیَل ئو چوار موجودَل زِنی؛ ئو کُل وَه رُیا کَتن اَر وَر تخت ئو خدائو عَبادت کِرد. 12 موئِتو: «آمین! بِرَکت ئو جِلال ئو حکمت ئو شگِر ئو عزّت ئو قدِرت ئو قویَت اَر خداءِ ایمَه بو تا ابدالآباد. آمین!» 13 اَسَه یَکی اژ اَ ریش‌اَسبیِلَ هِنا کِردیِ مِه، وِتی: «یوئنَ گه چوخا اِسبیو ها وَراِر کیِن ئو اژ کو هاتِنَ؟» 14 مِه وِتم‌ئون: «اِاِ آقا، تونَ مَذانین.» ئو او وِتی‌ئونِم: «یوئنَ هَراَ کسَلِنَ گه اژ عذاو کَلِنگ هاتِنَسَ دِریر، اونَل چوخائَل ووژون اِ خوین وَرک شوریَ ئو اِسبیا کِردیَ. 15 اَژونَسَ گه: «یوئنَ هان اَر وَر تخت خدا ئو شو ئو روژ اِنوم معبدی خِلمت اَژینَ مَهَنی؛ ئو او گه نیشتیَس اَر تخت، اونِلَ مَگِریِ ژیر داوار حضور ووژا. 16 اونَل دیَر هرگِس وِرسِنیو نِماو، ئو هرگِس تینیو نِماو، ئو دیَر هویَر اَرینو نِمِ، ئو نه هُیچ مَشِرَقونی. 17 اَرِیَگه اَ وَرکَ گه ها نومجا تخت‌اِر، ماوَ شوئونو، ئو هدائَتونَ مِهِئَه کیَنیَل آو ژییاین. ئو خدا هر اَسِری اژ چیَمَلو پاکا مِهِه.» |
@ 2024 Korpu Company