مِکاشفَه 6 - کتاب مقدس به زبان لکی - گویش مرکزیهفت میر 1 اَسَه دیم گه وَرکِهَه یَکی اژ هفت میرَل اِشکونی، ئو شنَفتِم گه یَکی اژ اَ چوار موجود زِنیَ وَه دَنگی اِجور گِرِمهُر وِتی: «بوری!» 2 ئو مِه سِیلِم کِرد، اَسَه اسب اِسبی‌ای بی ئو سُوارِهِه کمونی داشدی ئو تاجونی دائون، ئو او گه فائق بی، کِردیَ دِریر تاگَه فائق بای. 3 وخدی وَرکِهَه میرَ دوئِمینِهَه واز کِردی، شنَفتِم گه موجود زِنی دوئِمینِهَه وِتی: «بوری!» 4 ئو اَسبی‌تِر هاتَ دِریر گه اِجور آگِر سوئر بی. ایی صِلائونَ داءَ سُوارِهِه گه صُئل اژ رُی زَمی هیزدِ، تاگَه مردِم یَکتِری بِکُشِن، ئو شِمشیر کَلِنگونی دائون. 5 وخدی وَرکِهَه میرَ سِئِمینِهَه واز کِردی، شنَفتِم گه موجود زِنی سِئِمینِهَه وِتی: «بوری!» ئو مِه سِیلِم کِرد، اَسَه اسب سی‌ای بی ئو سُوارِهِه تِرازی‌ای اِ دس بیتی. 6 ئو اِنومجا اَ چوار موجود زِنیَ چیمی اِجور دَنگی شنَفت گه موئِتی: «یِه کیلَه گَنِم، وَه یِه دینار، سه کیلَه جو وَه یِه دینار؛ مِنتائای وَه روین ئو شِراو ضِرَد نیَ!» 7 وخدی گه وَرکِهَه میرَ چوارِمینِهَه واز کِردی، شنَفتِم گه موجود زِنی چوارِمینِهَه موئِتی: «بوری!» 8 ئو مِه سِیلِم کِرد، اَسَه اسب رنگ‌پریای بی، ئو سُوارِهِه نُم مرگ بیتی، ئو دنیا مِردیَل اژ دُم اوآ ماهات. ئو قدِرت اَر یِه‌چوارِم اژ زمینو دائونو تاگَه بِکُشِن، وَه شِمشیر ئو قیَطی ئو مِرَض ئو حِوونَل وَشی رُی زَمی. 9 وخدی وَرکِهَه میرَ پنجِمینِهَه واز کِردی، مِن اِژیر قُرونی‌گا، گیونَل کَسَلمی دی گه اَرِه کلوم خدا ئو شاتیَلونی گه دائی کُشِریائین. 10 اونَل وَه دَنگ کَلِنگَ مَقارونو: «اِاِ خداونِ قادر، اِاِ قدوس ئو حخ، تا کِ داوری نِمِهِین ئو تقاص خوین ایمَه اژ مردِم رُی زَمی نِمَسینین؟» 11 اَسَه وَه هرکُم اژ اونَل، چوخا اِسبی‌ئونی دا ئو وِتون‌ئونو گه گِری ویشتِر بِکُمِن تاگَه شِمار هُم‌قطارَلو ئو بِرالو گه میا هَر اِجور اونَل بِکُشِرِن، کاملا بو. 12 ئو وخدی وَرکِهَه میرَ شَشِمینِهَه واز کِردی، مِه سِیلِم کِرد، اَسَه زمی‌لرزَه کَلِنگی هات ئو هویَر اِجور پِلاس، سیا بی ئو مُنگ کامل، بی اِجور خوین. 13 ئو آسارَه‌ل آسمو رِشیان اَر زَمی، اِجور دار انجیری گه واهوفَه میوَه‌ل کالی شَکَ مِ ئو مَرِشِن اَر زمین‌اِرا. 14 ئو آسمو اِجور طوماری گه لویل بیری اِنوم ووژاِرا، خِیو بی، ئو هر کوی ئو جزیره‌ی اژ جا ووژ جاواز بی. 15 اَسَه پاتِشائَل زَمی ئو آمَل سرشناس ئو حکِمرونَل ئو دولَمَنَل ئو زوردارَل، ئو کُل کس چه خُلُم چه آزاد، ووژون اِنوم مَرَل ئو اِنومجا کمر کویَل شاردونا. 16 اونَل موئِتونَ کویَل ئو کمرَل: «بِکوئِن اَررُی ایمَه ئو اژ نوم‌رُی او گه نیشتیَس اَرسر تخت ئو اژ خَضو وَرک، ایمَه آبِشارِن. 17 اَرِیَگه روژ کَلِنگ خَضو اونَل رَسیَ ئو کیَ مَتونی طاخَت باری؟» |
@ 2024 Korpu Company