مِکاشفَه 22 - کتاب مقدس به زبان لکی - گویش مرکزیروو آو ژییاین 1 اَسَه روو آو ژییاین نشونِم داتی گه اِجور بِلور بِریقَه ماتی ئو اژ تخت خدا ئو وَرک جُرَ مَگِرت 2 ئو اژ نومجا مِدو شیرَ مَگُذریا. هَمیش ایلا ئو اَلا روو، دار ژییاین بی وَه دوازَه جور میوَه گه هر مُنگ میوَه ووژَ ماتی، ئو وَلگَل دارِهَه اَرِه شِفا ملتَل بی. 3 ئو دیَر هُیچ لیَنی نیَ. بلکِم تخت خدا ئو تخت وَرک هایتی اِنوم ئو خادمَلی عَبادتَ مَهَنی. 4 اونَل نوم‌رُیَ موئینِنی ئو نُم هایتی اَرنوم توئلو. 5 ئو دیَر نِماوَ شو ئو اونَل هَوَجَه‌ئو نِمَکُوءَ نُیر چراخ یا هویَر، اَرِیَگه خداون خدا ماوَ نُیر اونَل، ئو اُوُ تا ابدالآباد سِلطنتَ مَهَن. عیسی مای 6 فریشدَه وِتیَ مِه: «ایی قصه‌لَ ماو اِتِمادَ بینو کِین ئو راسِن. خداون، خداءِ روحَل نبوّت‌کَرَل، فریشدَه ووژ کِل‌کِردی تا اَ چیئَه گه باس وَه ایی زویَ اتفاق بِکُوءِ، نِشو خادمَلی دِ.» 7 «ئو اِسگَه، مِنِ ایی زویَ مام! خَوزگالَ کسی گه قصَه‌ل نبوّت ایی کِتاوَ ماریَ جا.» 8 مِه، یوحنا، هَراَ کسِمَ گه ایی چیئِلمَ دی ئو شنَفت. ئو هَریَگه یوئنَمَ دی ئو شنَفت، کَتم اَر وَر پال اَ فریشدَه گه نشونِم دانی، تا عَبادت کَمی. 9 مِنتائای فریشدَه وِتی‌ئونِم: «ناخواد هُنَ بِهِین! مِن‌یش هُم‌قطار تون ئو بِرالتِم، یانی نبوّت‌کَرَل، ئو اونَلی گه کلوم ایی کِتاوَ مارِنَ جا. خدا عَبادت کَ.» 10 اَسَه وِتی‌ئونِم: «کلوم نبوّت ایی کِتاوَ میرِموم نِهَه اَرِیَگه وخد نزیکَسی. 11 اِسَه گَنَ‌کار، هَر کارَل گَن بِهِه ئو فاسد هَر فاسد بِمینی؛ آم صالح، هَر کارَل دُریس بِهِه ئو مقدّس، هَر مقدّس بِمینی.» 12 «اِسگَه مِنَ ایی زویَ مام ئو اَجِری گه باس بیَم ها گَردِم تا وَه هر کی مِطابق کارَلی گه کِردیِ تِلافَتی بیَمِ دُما. 13 مِنِم ’الف‘ ئو مِنِم ’ی‘، مِنِم اول ئو مِنِم آخِر، مِنِم بِنیا ئو مِنِم آخِرسر.» 14 خَوزگالَ اونَلی گه چوخائَل ووژونَ مَشورِن تا حخ هُاردِن اژ دار ژییاینو داشدوئی ئو بتونِن اژ دروازَه‌ل شیَر بان اِنوم. 15 سگَل ئو جادوگرَل ئو زِنهاکارَل ئو آم‌کُشَل ئو بِت‌پِرَسَل ئو هر کی گه دِرو دوس دیری ئو اَنجومَ مِیتی، هانَ دِریر. 16 «مِه، عیسی، فریشدَه ووژِم کِلِم‌کِرد اَرِه تَکتو تا ایی چیئِلَ اَرِه کلیسا شاتی بِ. مِه ریشی ئو نسِل داوود ئو آسارَه بِریقَه‌دار شفقِم.» 17 روحِ خدا ئو بُئیَ موشِن: «بوری!» هر کی مَشتوئی، بوشی: «بوری!» هر کی تینیِ بای؛ ئو هر کی مِیتی، اژ آو ژییاین وَه مِفت بِگِری. 18 مِه هُشتارَ میَمَ هر کی گه قصَه‌ل نبوّت ایی کِتاوَ مَشتوئی گه اَرّ کسی چیئی اضافَه کِیتی اَری، خدا بِلائَلی گه اِنوم ایی کِتاوَ نُیسیاءَ، مارِتی اَرسر. 19 ئو اَرّ کسی اژ قصَه‌ل نبوّت ایی کِتاوَ چیئی کَما کِ، خدا اژ دار ژییاین ئو اژ شیَر مقدّس، گه اِنوم ایی کِتاوَ نُیسیاءَ، بیَردارا نِمِهِیتی. 20 اَوَه گه اَر ایی چیئِلَ شاتیَ مِ، هُنَ موشی: «اَاَ، وَه ایی زویَ مام.» آمین. بوری، اِاِ خداون عیسی! 21 فیض خداون عیسی وَه‌گَرد کُلتو بو. آمین. |
@ 2024 Korpu Company