مِکاشفَه 21 - کتاب مقدس به زبان لکی - گویش مرکزی

آسمون ئو زَمی نوو

¹ اَسَه آسمو نوو ئو زَمی نوومی دی، اَرِیَگه آسمو اول ئو زَمی اول نابود بوئین ئو دیَر دریای نوئی.

² ئو شیَر مقدّس، یانی اورشلیم نووئِم دی گه اژ آسمو اژ تک خدا ماهاتَ هُار، اِجور بُئی‌ای گه اَرِه میردَه ووژ اِررازیائی، آمادَه بوئی.

³ ئو اژ تخت، دَنگ کَلِنگمی شنَفت گه موئِتی: «اِسگَه، جالیز خدا ها گَرد آمَل، ئو او لیزَ مَگِریَ گَرد اونَل؛ ئو اُوُنَ موئنَ قوم او، ئو خدا ووژ، ها گَردو ئو ماوَ خدا اونَل.

⁴ او هر اَسِری اژ چیَمَلو پاکا مِهِه. ئو دیَر مرگ نیَ؛ ئو دیَر چَمَر ئو گیری ئو ژُ نیَ، اَرِیَگه چی نواینِلَهَه نابود بینَ.»

⁵ اَسَه اَوَه گه نیشتوئی اَرسر تخت وِتی: «اِسگَه کُل چی نووآ مَهَم.» ئو وِتی: «یوئنَ بِنُیسِن اَرِیَگه ایی قصه‌لَ ماو اِتِمادَ بینو کِین ئو راسِن.»

⁶ ئو وِتی‌ئونِم: «تموم بی! مِنِم ’الف‘ ئو مِنِم ’ی‘، مِنِم اول ئو مِنِم آخِر. مِه وَه هر کی گه تینی بوتی، وَه مِفت اژ کیَنی آو ژییاینَ میَمی‌ئون.

⁷ هر کی فائق بای، یوئنَ کُلَ میَریَ میرات، ئو مِنَ موئمَ خدا او ئو اوءَ ماوَ کُر مِه.

⁸ مِنتائای بی‌جورَتَل ئو بی‌ایمونَل ئو تویک‌تیَلَل ئو آم‌کُشَل ئو زِنهاکارَل ئو جادوگرَل ئو بِت‌پِرَسَل ئو کُل دِروزِنَل، دریاچَه گُرگِرتی وَه آگِر ئو گوگرد، ماوَ نَصُیو. یَه مرگ دوئِمَ.»

اورشلیم نوو

⁹ یَکی اژ اَ هفت فریشدَه گه هفت جُم پِر اژ هفت بِلا آخِرو داشد، هات ئو وِتیَ مِه: «بوری! مِه بُئی، یانی ژَن وَرک نشونتَ میَم.»

¹⁰ اَسَه اِنوم روح مِه بِردی اَرِه سر کوی کَلِنگ ئو بِلِنگی ئو شیَر مقدّس اورشلیم نشونِم داتی گه اژ آسمون اژ تک خدا ماهاتَ هُار.

¹¹ جِلال خدا داشدی ئو بریقِه چُی جوواهیر خیمتی بی، چُی یَشم، ئو شفاف چُی بِلور.

¹² تیخَه کَلِنگ ئو بِلِنگی داشدی گه دوازَه دروازَه داشدی ئو دوازَه فریشدَه اَر دروازَه‌ل بین، ئو اَر هر کُم اژ دروازَه‌ل نُم یَکی اژ دوازَه طائفَه بنی‌اسرائیل نُیسیائی.

¹³ سه دروازَه اِ مشرق، سه دروازَه اِ شمال، سه دروازَه اِ جنوب ئو سه دروازَه اِ مغرب بی.

¹⁴ ئو تیخَه شیَر دوازَه بِناوَه داشدی گه اَر اونَل دوازَه نُم دوازَه رسول وَرک نُیسیائی.

¹⁵ ئو اَ فریشدِه‌ی گه قصَئَه گَرد مِنَ مَهَردی، چو گَز کِردِن طِلای داشدی تا شیَر ئو دروازَه‌ل ئو تیخَه‌لی گَز کِ.

¹⁶ شیَر چوارسویک بی، ئو دِریژی ئو پیَنی‌ای یَکی بی. او وَه اَ چو گَز کِردِنیَ شیَر گَز کِردی. دِریژی ئو پیَنی ئو بِلِنگی شیَر یَکی بی ئو چَن دو هزار ئو چوارصد کیلومتر بی.

¹⁷ ئو قوئینی تیخِه‌ی وَه گَز کِردِن اِنسو شَشصد ئو پنج متر بی، گه گَز کِردِن فریشدِه‌یش هَر یَه بیَ.

¹⁸ تیخَه شیَر اژ یَشم دُریس بوئی، ئو شیَر اژ طِلا خالص بی ئو شفاف چُی شیشَه.

¹⁹ بِناوَه تیخَه شیَر وَه کُلِ جور جوواهیر گلریزو بوئی، بِناوَه اولینِهَه اژ یَشم بی، دوئِمینِهَه اژ یاقوت آبی، ئو سِئِمینِهَه اژ حقیق اِسبی، ئو چوارِمینِهَه اژ زمرّد،

²⁰ پنجِمینِهَه اژ حقیق سوئر، شَشِمینِهَه اژ حقیقی گه رنگ اِجور آگِر بیتی، هفتِمینِهَه اژ زِبَرجد، هشتِمینِهَه اژ یاقوت کاو، نُئِمینِهَه اژ یاقوت زرد، دیَئمینِهَه اژ حقیق سُز، یازِئمینِهَه اژ فیروزَه ئو دوازِئمینِهَه اژ یاقوت بِنفش.

²¹ ئو دوازَه دروازَه شیَر، دوازَه مِرواری بین، هر کُم اژ دروازَه‌ل یِه مِرواری بی. ئو مِدو شیَر اژ طِلا خالص بی ئو چُی شیشَه شفاف.

²² معبدمی اِنوم شیَر نِئی، اَرِیَگه خداون خداءِ قادر مطلق ئو وَرک، معبد اَوِنَ.

²³ ئو شیَر هَوَجه‌یَ هویَر ئو مُنگ نیَ گه بدَرشخِتی اَری اَرِیَگه جِلال خدا روشتاآ مِهِیتی ئو وَرک چراخَسی.

²⁴ ئو ملتَل اِنوم نُیر او زِنِه‌یَ مَهَن ئو پاتِشائَل زَمی، جِلال ووژونَ مارِن اَرِه اورَه.

²⁵ دروازَه‌ل او هرگِس اِ روژ نِموئنِن، اَرِیَگه اَر اورَه نِماوَ شو.

²⁶ اونَل عزّت ئو جِلال ملتِلَ مارِن اَرِه اورَه.

²⁷ مِنتائای هُیچ چی ناپاکی ئو هُیچ کسی گه کارَلی کفارت‌دار ئو دِروئِن، هرگِس نِمَچوتیَ نوما، فَخَد کسَلی گه نُمو نُیسیاس اِنوم دفتر ژییاین وَرک، مَچِنی اِنوم.