مِکاشفَه 20 - کتاب مقدس به زبان لکی - گویش مرکزی

سِلطنت هزار سالَ

¹ اَسَه فریشدَه‌می دی گه اژ آسمونَ ماءَ هُار، ئو کِلیل چا هاویَه ئو زنجیر قوئینی هایتیَ دَسا.

² او اُژدها، اَ مار قدیمیَ، گه هَراَ ابلیس یا شِطونَ، گِرتی ئو اَرِه هزار سال بَسدا.

³ ئو او آوشدی اِنوم چا هاویَه در ئو اَری بَسد ئو میرِموم کِرد تا دیَر ملتَل فن نِ تا وخدی گه اَ هزار سالَ تموم بو ئو دُما اَوَه باس اَرِه مِدت کمی آزاد بو.

⁴ اَسَه تختَلمی دی ئو کسَلی نیشتوئین اَررُیو گه قدِرت‌واختیار داوریو دائی‌ئونو. هَمیش گیونَل کَسَلمی دی گه وَه خاطر شاتی دائِن اَر عیسی ئو اَر کلوم خدا سرونا بِریائی، ئو کسَلی گه اَ جونور وَشیَ یا مِجسمِهِه‌ئو نَپِرَسوئی ئو نشونَه اَوُن اَر دس ئو توئل ووژو قبول نَهَردوئی. یوئنَ اِدوارَه اژ مِردیَل زِنیا بین ئو هزار سال وَه‌گَرد مسیح سِلطنتو کِرد.

⁵ یَه اول زِنیابیئِن اژ مِردیِلَ. باقی مِردیَل زِنیا نوئین تاگَه اَ هزار سالَ تموم بی.

⁶ بِمارِک ئو مقدّسَ کسی گه اژ اول زِنیابیئِن اژ مِردیَل بیَری دیری. مرگ دوئِم هُیچ قدِرتی اَر اونَل نِری بلکِم کاهنَل خدا ئو مسیحِن ئو وَه‌گَرد او هزار سال سِلطنتَ مَهَن.

شِکِس شِطو

⁷ اَسَه گه اَ هزار سالَ تموم بو، شِطون اژ زندو آزادَ ماو،

⁸ ئو ماءَ دِریر اَرِه فن دائِن ملتَلی گه هانِ چوار سویک زَمی، یانی جوج ئو ماجوج گه شِمارو اِجور هُسَل دریاءَ، تا اَرِه جنگ جیَمو بِهِه.

⁹ یوئنَ اَررُی بیاضی زَمی چِنِ وَر ئو اردوگا ایمودارَل مسیح، یانی اَ شیَر عزیزونَ چاتمَه کِرد. مِنتائای آگِر اژ آسمو هاتَ هُار ئو اونَل قویت اِراداتی.

¹⁰ ئو ابلیس، گه فَنو دائیتی، آوشدون اِنوم دریاچَه آگِر ئو گوگرد، جای گه اَ جونور وَشیَ ئو نبوّت‌کَر دِروزِنِ بین. ئو اونَل شو ئو روژ تا ابد عذاوَ مَکیشِن.

داوری اَر مِردیَل

¹¹ اَسَه تخت کَلِنگ ئو اِسبیمی دی، ئو کسی گه نیشتوئیتی اَرسرا. آسمون ئو زمین اژ اوءَ مِحوایان ئو جای اَرِنو نوئیَ دی.

¹² ئو مِردیَلِم دی، کَلِنگ ئو گُجَر، هوسیائین اَر وَر تخت، ئو دفترَل واز بین. اَسَه دفتری‌تِر واز بی گه دفتر ژییاینَ. مِردیَل وَه اَ چیئَه گه اِ اَ دفترِلَ نُیسیائی، مِطابق کارَلی گه کِردوئیو داوری بین.

¹³ دریا، مِردیَلی گه اِنوم بینی داءِ دُما، ئو مرگ ئو دنیا مِردیَل‌یش مِردیَلی گه اِنومو بین، دائونِ دُما، اونَل هر کُم مِطابق کارَلی گه کِردوئیو، داوری بین.

¹⁴ اَسَه مرگ ئو دنیا مِردیَلو آوشد اِنوم دریاچَه آگِر. ایی دریاچَه آگِرَ، مرگ دوئِمَ.

¹⁵ ئو هر کی گه نُم اِ دفتر ژییاین نَنُیسیائیتی، آوشدون اِنوم دریاچَه آگِر.