مِکاشفَه 2 - کتاب مقدس به زبان لکی - گویش مرکزی

پِغوم مسیح وَه کلیسا اَفِسُس

¹ «اَرِه فریشدَه کلیسا اَفِسُس بِنُیسِن: «اَوَه گه هفت آسارَه اِ دس راس ووژ دیری، ئو اِنومجا هفت چراخدو طِلا مَچوءَ رئیا، هُنَ موشی:

² مِه کارَل تو، جُورَل تون ئو پایاریتَ مَذانِم. مَذانِم گه نِمَتونین آمَل شرَبار تیَمِل بِهِین ئو اونَلی گه ووژونَ رسولَ مَذانِن ئو نیِن اِنتحونِت کِردیَ ئو تو فیَمینَ دِروزِنِن.

³ مَذانِم گه وَه خاطر نُم مِه وَه صبِر طاخَتَ مارین ئو تیَمِلَ مِهِین ئو شَکَت نوئینَ.

⁴ «مِنتائای یَه اَرضد تو دیرِم گه مِحبتی گه اول‌بارِت داشد، وِل کِردیَ.

⁵ اِسَه بارَ ویر گه اژ کو کَتینَس‌اِرا. توئَه بِهَه ئو کارَلی گه اول‌بارِت کِرد، بِهَه. اَرّ نِهِین، مِنَ مام اِرَه تَکِت ئو چراخدونت اژ جا ووژ هیزَمیَم، مَر یَگه توئَه بِهِین.

⁶ مِنتائای ایی یِه چی خوءَ دیرین گه اژ کارَل دارِدسَه نیکولایی بیزارین، هُنَ گه مِه بیزارِم.

⁷ «اَوَه گه گوش دیری بشتوئی گه روحِ خدا چَه موشیَ کلیسائَل. وَه هر کی گه فائق بای، یَه موئَشخِمی‌ئون گه اژ دار ژییاین گه ها نوم بهشت خدااِر بیری.

پِغوم مسیح وَه کلیسا اِسمیرنا

⁸ «ئو اَرِه فریشدَه کلیسا اِسمیرنا بِنُیسِن: «او گه اولَ، او گه آخِرَ، او گه مِرد ئو زِنیا بی، هُنَ موشی:

⁹ مِه عذاو تون ئو ژاری تونَ مَذانِم، وَه ایی حالا دولَمَنین! اژ بُختِمَل اونَلی گه ووژونَ یهودیَ مَذانِن ئو نیِن، بلکِم عَبادتگا شِطونِن، خَوَر دیرِم.

¹⁰ اژ جُورَلی گه وَه ایی زویَ مَکیشین زِلَت نَچو. سِیل کَ، ابلیس وَه ایی زویَ بِری اژ هُمَه ماوژیِ زندو، تا اِنتحو بوئینو ئو دیَه روژ عذاوَ موئینینو. تا مِردِن وفادار بِمین، گه مِه تاج ژییاینتَ موئَشخِم‌ئون.

¹¹ «اَوَه گه گوش دیری بشتوئی گه روحِ خدا چَه موشیَ کلیسائَل. هر کی فائق بای، اژ مرگ دوئِم ضِرَدئون نِمَرَستی.

پِغوم مسیح وَه کلیسا پِرگاموم

¹² «اَرِه فریشدَه کلیسا پِرگاموم بِنُیسِن: «او گه شِمشیر تیژ دودَم دیری، هُنَ موشی:

¹³ مَذانِم جالیزِت هار کو، اَر اورَه گه تخت پاتِشائی شِطونَ. وَه ایی حالا سفدِسخد چسبینَس اَر نُم مِنا ئو ایمونی گه اَر مِنِت داشد، حاشا نَهَرد، جُ‌جُ اِ روژَلی گه آنتیپاس، اَ شات وفادار مِنَ، اِنومجا هُمَه گه جالیز شِطونَ، کُشیا.

¹⁴ «مِنتائای چیئَلی اَرضد تو دیرِم. اَر اورَه کسَلی دیرین گه چسبینَس اَر تیَلیم بَلعاما، هَر اَوَه گه یاء بالاق داتی گه کُچِکی گه باعث کَتِن بنی‌اسرائیل بو، بِنی اَر وَر پائلو تاگَه اُوُ خوراکی گه پیشکَشَ ماو اَر بِتَل بیرِن ئو بی‌عصمتی بِهَن.

¹⁵ ئو هَرهُنَ کسَلی دیرین گه چسبینَس اَر تیَلیم دارِدسَه نیکولاییا.

¹⁶ اِسَه توئَه بِهَه. اَرّنَه وَه ایی زویَ مام اِرَه تَکِت ئو وَه شِمشیر دَمِم اَرضدو جنگَ مَهَم.

¹⁷ «اَوَه گه گوش دیری بشتوئی گه روحِ خدا چَه موشیَ کلیسائَل. هر کی فائق بای، قِری اژ اَ ’مَنّا‘ قائم‌کَریا میَمی‌ئون ئو بَرد اِسبی‌ای میَمی‌ئون گه نُم تازه‌ی نُیسیاسی اَررُی، نُمی گه هُیچ‌کس نِمَذانتی مَر کسی گه مَسینِتی.

پِغوم مسیح وَه کلیسا تیاتیرا

¹⁸ «اَرِه فریشدَه کلیسا تیاتیرا بِنُیسِن: «کُر خدا گه چیَمَلی اِجور بِلاچَه آگِر دیری ئو پالی اِجور مَفِرغ سائیاءَ، هُنَ موشی:

¹⁹ مِه کارَل تو، مِحبت ئو وفاداریِت ئو خِلمت ئو پایاریتَ مَذانِم ئو یَگه کارَل آخِرِت ویشتِر اژ اول‌بارتَ.

²⁰ مِنتائای یَه اَرضد تو دیرِم، گه اَ ژَن ایزابِل نُمَ گه ووژَ نبوّت‌کَرَ مَذانی تیَمِلَ مِهِین، او گه تیَلیم خادمَل مِنَ مِ، ئو اژ رئیون‌ اِرَماری تاگَه بی‌عصمتی بِهَن ئو خوراک پیشکَشی اَر بِتَل بیرِن.

²¹ مِجالِم دائون تاگَه توئَه بِهِه مِنتائای او نِمَچوءِ ژیر یَگه اژ بی‌عصمتی ووژ توئَه بِهِه.

²² اِسگَه، مِنَ ماوژِمیِ توجا مریضی، ئو کسَلی گه وَه‌گَرد زِنهاءَ مَهَنی ماوژِمَ عذاو کَلِنگی، مَر یَگه اژ کارَل او توئَه بِهَن.

²³ ئو موئمَ خوینی آیلَلی ئو کُل کلیسائِلَ مَفیَمِن گه مِه اَوِمَ گه فگِرَل ئو دلَلَ مَجورِم، ئو مِه وَه هرکُم اَژینتو مِطابق کارَلتو تِلافَتیَ میَمِ دُما.

²⁴ مِنتائای وَه باقی هُمَه اِ شیَر تیاتیرا، گه نمَچسبینون اَر ایی تیَلیمَ ئو اَ چیئَه گه بِری موشِنی‌ئون ’رازَل قویل شِطو‘ نَگِرتِتونَسا، یَه موشِم‌ئونتو گه بار ویشتِری نِمَنم اَر کولتو.

²⁵ فَخَد یَگه سفدِسخد بچسبِن اَر اَ چیئَه گه دیرینو تاگَه مِه بام.

²⁶ «هرکی فائق بای ئو کارَل مِه تاگَه آخِر باریَ جا، مِه قدِرت‌واختیارَ میَمی‌ئون گه اَر ملتَل حکِمرونی بِهِه.

²⁷ «او وَه موزبِرَه آهِنین حکِمرونیَ مِهِه اَرینو؛ ئو اِجور کویزَه‌ل گِلین حُیردونا مِهِه.» هَرهُنَ گه مِه ووژِم اژ باوَه‌م قدِرت‌واختیارِم گِرتیَ.

²⁸ ئو مِه آسارَه شفقَ میَمی‌ئون.

²⁹ اَوَه گه گوش دیری بشتوئی گه روحِ خدا چَه موشیَ کلیسائَل.