مِکاشفَه 19 - کتاب مقدس به زبان لکی - گویش مرکزیخَوشالی اِنوم آسمو 1 دُما اَوَه، دَنگمی شنَفت اِجور قارَه جیَمیَت کَلِنگی اِنوم آسمو، گه موئِتو: «هَلِلویاه! نجاد ئو جِلال ئو قدِرت هِن خداءِ ایمِئَه، 2 اَرِیَگه داوریَلی حخَ ئو راسَ. اَرِیَگه اَر اَ ژَن خِراو کَلِنگَ داوری کِردیِ گه زمین وَه بی‌عصمتیَل ووژ فاسد کِردی، ئو خدا تقاص خوین خادمَل ووژ، اژ او سَنیِ.» 3 ئو گِلی‌تِر وِتو: «هَلِلویاه! تا ابدالآباد دوی اَژی هیزَمَگِرِتی.» 4 ئو اَ بیس ئو چوار ریش‌اَسبیَ ئو اَ چوار موجود زِنیَ وَه رُیا کَتِن اَر زَمی ئو خدائونی عَبادت کِرد گه نیشتوئی اَررُی تخت، ئو موئِتو: «آمین. هَلِلویاه!» 5 اَسَه دَنگی اژ تختِهَه هات گه موئِتی: «شگِر خداءِ ایمَه بِهَن، اِاِ کُل خادمَل او، اِاِ کسَلی گه اَژی زِلَتونَ مَچو، اژ کَلِنگ ئو گُجَر!» 6 اَسَه دَنگی اِجور قارَه جیَمیَت کَلِنگمی شنَفت، اِجور هوفَه آوَل فِرَه، ئو اِجور دَنگ کَلِنگ گِرِمهُرَل، گه موئِتی: «هَلِلویاه! اَرِیَگه خداون خداءِ ایمَه، اَ قادر مطلقَ، سِلطنتَ مِهِه. 7 خَوشالی بِهِیم ئو دودَسمالَه بِگِریم، ئو جِلال دِیمی، اَرِیَگه زَمو داوات اَ وَرکَ رَسیَ، ئو بُئی او ووژ حاضر کِردیِ؛ 8 کِراس کتون خیمتی نازِک ئو بِریقََه‌هاتی ئو پاک بَشخیاتی‌ئون تا بِهِیتیِ وَر.» اَرِیَگه اَ کِراس کتونَ، کارَل صالح ایمودارَل مسیحَ. 9 ئو فریشدَه وِتی‌ئونِم: «بِنُیسِن: خَوزگالَ کسَلی گه دَنگَ موئن اَرِه شُم داوات اَ وَرکَ.» ئو هَمیش وِتی: «یوئنَ کلوم حخیخی خدان!» 10 اَسَه کَتم اَررُی پالی تا عَبادت کَمی. مِنتائای او وِتی‌ئونِم: «ناخواد هُنَ بِهِین! اَرِیَگه مِن‌یش هُم‌قطار تون ئو بِرالتِم گه سفدِسخد مَچسبِن اَر شاتی عیسی‌آ. خدا بِپِرَس! اَرِیَگه شاتی عیسی، روحِ نبوّتَ.» اَوَه گه نیشتیَس اَر اسب اِسبی 11 اَسَه دیم گه آسمو واز بی ئو اِسگَه اسب اِسبی‌ای هار وَرِم، ئو اَوَه گه نیشتیَسی اَررُی نُم اَمونتدار ئو حخِّ. او وَه عدل داوریَ مِهِه ئو جنگَ مِهِه. 12 چیَمَلی مَری بِلاچَه آگِرِن ئو تاجَل فِرِه‌ی هایتی اَرنوم سر. ئو نُمی نُیسیاسی اَر قِ گه هُیچ‌کس نِمَذانتی بِخِر اژ ووژ. 13 چوخای هایتیِ وَر گه حُشگِ خوینَ ئو نُمی گه هِناءَ مَهَنی‌اِر ’کلوم خداءَ‘. 14 ئو لشکرَل آسمو، جِنِکَل کتون خیمتی نازِک ئو اِسبی ئو پاک اِوَر، سُوار اَسبَل اِسبی، ماهاتِنیِ دُما. 15 ئو شِمشیر تیژی اژ دَمَ ماتیَ دِریر، تاگَه وَه اَوَه بی اَر ملتَل. «وَه موزبِرَه آهِنین اَر اونَل حکِمرونیَ مِهِه.» انگویر خِض ئو خَضو خداءِ قادر مطلق اِنوم حوض شِراو اِ ژیر پا مَتِلیقِنی. 16 ئو اَر قِ چوخا ئو رون او نُمی نُیسیاءَ: ’پاتِشاءِ پاتِشائَل ئو رب‌الارباب.‘ 17 ئو فریشدَه‌می دی گه هوسیائی اِنوم هویَر ئو وَه دَنگ کَلِنگ وِتیَ کُل مَلَلی گه اِنوم آسمو بالونَ مَگِرت: «بورِن؛ جیَم بوئن اَرِه شُم کَلِنگ خدا 18 تا گوشد لار پاتِشائَل ئو فرموندَه‌ل ئو زوردارَل بیرینو، ئو گوشد اَسبَل ئو سُوارَلو، ئو گوشد هر اِنسونی، خُلُم ئو آزاد، ئو کَلِنگ ئو گُجَر.» 19 اَسَه اَ جونور وَشیمَ دی ئو پاتِشائَل زمین ئو لشکرَلو، گه جیَم بوئین تا اَرضد او گه نیشتوئی اَر اسب ئو اَرضد لشکر او، قی بِهَن. 20 مِنتائای اَ جونور وَشیَ گرفدار بی ئو وَه‌گَرد او اَ نبوّت‌کَر دِروزِنِ گه اَرتَک او نشونَه‌ل ئو مُجِزَه‌لی کِردوئیتی تاگَه وَه اونَ کسَلی فن بِ گه چوئینِ گِرد نشونَه اَ جونور وَشیَ ئو مِجسمَه اَوُنَ مَپِرَسیا. اُوُنو هَردِک، زِنی آوشد اِنوم دریاچَه آگِر ئو گوگرد. 21 ئو باقیو وَه شِمشیری گه اژ دَم اَوَه گه نیشتوئی اَر اسب ماهاتَ دِریر، کُشیان ئو اَ مَلِلَ کُل اژ گوشد اونَل سیر بین. |
@ 2024 Korpu Company