مِکاشفَه 17 - کتاب مقدس به زبان لکی - گویش مرکزیژَن خِراو کَلِنگ ئو جونور وَشی 1 اَسَه یَکی اژ اَ هفت فریشدِه‌لَ گه اَ هفت جُمونَ داشد هاتِ وَر ئو وِتی‌ئونِم: «بوری تا داوری اَر اَ ژَن خِراو کَلِنگَ نشونِت دَم گه نیشتیَس اَررُی آوَل فِرَه، 2 گه پاتِشائَل زَمی وَه‌گَرد او زِنهائو کِرد ئو اونَلی گه لیزو گِرتیَس اَررُی زَمی اژ شِراو زِنها او مَس بینَ.» 3 اَسَه اَ فریشدَه اِنوم روحِ خدا مِه بِردی اَرِه بیاوونی. ژَنمی دی گه نیشتوئی اَر کول جونور وَشی سوئریکا گه کُل لاری پِر اژ نُمَلی بی گه کِفِرَ، ئو هفت سر ئو دیَه شاخ داشدی. 4 اَ ژِنَ کِراس سوئر ئو کاو اِوَر بیتی ئو وَه طِلا ئو جوواهیر ئو مِرواریَل اِررازیائی. جُم طِلایَ دَسا بیتی گه پِر اژ چیئَل کفارت‌دار ئو ناپاکیَل زِنها ووژ بی. 5 ئو اَررُی توئلی ایی نُم بِلُجوئیَ نُیسیائی: «بابِل کَلِنگ، دا ژِنَل خِراو ئو کفارت‌دارَل زَمی.» 6 ئو دیم گه اَ ژِنَ اژ خوین ایمودارَل مسیح ئو خوین شهیدَل عیسی مَس بی. هَریَگه اوئِم دی اژ ووژما چِم. 7 فریشدَه وِتی‌ئونِم: «چات اژ ووژتا چینَ؟ مِه راز اَ ژِنَ ئو اَ جونور وَشیَ گه هفت سر ئو دیَه شاخ دیری ئو اَ ژِنَ سُوارَسی، موشِم‌ئونِت. 8 اَ جونور وَشیتَ گه دی، زمونی بیتی، اِسگَه نیَسی، ئو وَه ایی زویَ اژ چا هاویَه ماءَ دِریر ئو نابودَ ماو. اونَلی گه لیزو گِرتیَس اَررُی زَمی ئو اژ بِنیا دنیا نُمون اِنوم دفتر ژییاین نَنُیسیاءَ، وخدی اَ جونور وَشیَ بوئینِن اژ ووژونا مَچِن، اَرِیَگه زمونی بیتی، اِسگَه نیَسی، ئو مای. 9 «یوئنَ عقلی مِیتی گه حکمت داشدوئیتی. اَ هفت سِرَ، هفت کویِن گه اَ ژِنَ نیشتیَس اَررُیو. اونَل هَمیش هفت پاتِشان، 10 گه سِلطنت پنج اَژینو وَه‌گَرد ووژو نابود بیَ، یَکی هَسی ئو اَ یَکَ هَنی نِهاتیَ؛ ئو وخدی بای، باس بِمینی مِنتائای اَرِه مِدت کمی. 11 اَ جونور وَشیَ گه زمونی بیتی ئو اِسگَه نیَسی، هشتِمینِهِئَه ئو او هِن اَ هفت نفرَسَ ئو ویرِ نابودیَ مَچو. 12 «اَ دیَه شاختَ گه دی، دیَه پاتِشان گه هَنی نَرسینَسَ سِلطنت، مِنتائای میا اِجور پاتِشا اَرِه یِه سات وَه‌گَرد اَ جونور وَشیَ قدِرت‌واختیار بِگِرنَ دس. 13 اونَل فگِرو یَکی کَ ئو قویَت ئو قدِرت ووژونَ میَن اَ جونور وَشیَ. 14 اونَل وَه‌گَرد وَرکَ موئنَ جنگ، ئو وَرک فائقَ ما اَرینو، اَرِیَگه او رب الارباب ئو پاتِشاءِ پاتِشائِلَ- ئو اونَلی گه هانِ گَرد، دَنگ بینَ ئو دیاری بینَ ئو وفادارِن.» 15 اَسَه اَ فریشدَه وِتی‌ئونِم: «اَ آوَلتَ گه دی، گه ژَن خِراوِهَه نیشتیَس اَررُیو، هَراَ قومَل ئو جیَمیَتَل ئو ملتَل ئو زوئونَلِن. 16 ئو اَ دیَه شاخ ئو اَ جونور وَشیتَ گه دی، اژ اَ ژَن خِراوَ بیزارَ موئن. اونَل تَنیا مِیلِنی ئو لُت‌ِاِفلیس وِلَ مَهَنی ئو گوشدَ میرِنی ئو اِنوم آگِرَ مَسُزِنِنی. 17 اَرِیَگه خدا ناسی اِنوم دِلو گه خواس او بارنَ جا ئو هُم‌رِأ بوئنی تا قویَت سِلطنت ووژو بیَنَ دس اَ جونور وَشیا، تاگَه کلوم خدا وَه اَنجوم برَسی. 18 ئو اَ ژَنتَ گه دی هَراَ شیَر کَلِنگَسَ گه اَر پاتِشائَل زَمی سِلطنتَ مِهِه.» |
@ 2024 Korpu Company