مِکاشفَه 16 - کتاب مقدس به زبان لکی - گویش مرکزی

هفت جُم خَضو خدا

¹ اَسَه دَنگ کَلِنگمی اژ معبد شنَفت گه موئِتیَ اَ هفت فریشدَه: «بِچِن ئو هفت جُم خَضو خدا بِرِشِنِن اَر زَمی.»

² اَسَه فریشدَه اولینِهَه چی ئو جُم ووژ رِشونی اَر زَمی، ئو زیَمَلی گه بدتویکِن ئو ژُنَ مَهَن کَت اَررُی مردِمی گه نشونَه اَ جونور وَشیونَ داشد ئو مِجسمَه اَوُنَ مَپِرَسیا.

³ فریشدَه دوئِمینِهَه جُم ووژ رِشونی اِنوم دریا، ئو دریا بیَ خوین، خوینی گه مَری خوین آم مِردی بی، ئو کُل جونورَل دریا مِردِن.

⁴ فریشدَه سِئِمینِهَه جُم ووژ رِشونی اَررُی رووئَل ئو کیَنیَل آو، ئو اونَل بینَ خوین.

⁵ اَسَه شنَفتِم گه فریشدِه‌ی گه صِلا آوَل هایتیَ دَسا، موشی: «اِاِ قدوس، تو عادلین، تو گه هِین ئو بین، اَرِیَگه تو ایی مِجازاتَلتَ آوِرد،

⁶ اَرِیَگه اُوُ خوین ایمودارَل ئو نبوّت‌کَرَلو رِشو، اِسَه تو خوینِت دائونو تاگَه خُرّ دَن، گه هَر سزاوار یَئنَ!»

⁷ ئو شنَفتِم قُرونی‌گاءَ موشی: «اَاَ، اِاِ خداون خداءِ قادرِ مطلق، داوریَل تو حخ ئو عدلَ.»

⁸ فریشدَه چوارِمینِهَه جُم ووژ رِشونی اَررُی هویَر، ئو صِلائو داءَ هویَر تا آگِر بِنیِ مردِم.

⁹ ئو مردِم اژ زور گرما سُتِن ئو کِفِرو وِتَ نُم خدا گه اَر ایی بِلائِلَ قدِرت دیری، مِنتائای توئه‌ئو نَهَرد ئو اوُ جِلال نا.

¹⁰ فریشدَه پنجِمینِهَه جُم ووژ رِشونی اَررُی تخت اَ جونور وَشیَ ئو تیَریکی هیال پاتِشائی او گِرتی‌اِرا. مردِم اژ زور ژُ، زوئو ووژونَ مَگِرتَ گَزَه.

¹¹ ئو وَه خاطر ژُنَل ئو زیَمَل ووژو کِفِرونَ موئتَ خداءِ آسمو، ئو اژ کارَل ووژو توئه‌ئو نَهَرد.

¹² فریشدَه شَشِمینِهَه جُم ووژ رِشونی اَررُی روو کَلِنگ فُرات، ئو آو حُشگا بیتی، تاگَه رئی اَرِه پاتِشائَل شرق آمادَه بو.

¹³ اَسَه دیم سه روحِ گَن اِجور قورباک اژ دَم اُژدها ئو اژ دَم اَ جونور وَشیَ ئو اژ دَم نبوّت‌کَر دِروزِنِ هاتِنَ دِریر.

¹⁴ اَرِیَگه یوئنَ روحَل مِلاکَتَلِن گه نشونَه‌ل ئو مُجِزَه‌ل اَنجومَ میَن ئو مَچِن اَرِه تک پاتِشائَل سِرُسَر دنیا تاگَه اونَل جیَم دَن اَرِه جنگ روژ کَلِنگ خداءِ قادرِ مطلق.

¹⁵ «حُواستو بو، اِجور دُزی مام! خَوزگالَ اَ کسَ گه بِمینیِ خَوَر ئو جِنِک اِوَر بوتی، تاناخواد لُت بِچوءَ رئیا ئو بوءَ رُسبا عالم.»

¹⁶ اَسَه، اَ سه روحِ گَنَ پاتِشائَل زمینو جیَم داءِ جای گه وَه زوئو عبرانیَ موشِنی‌ئون ’حارمَگِدّون‘.

¹⁷ فریشدَه هفتِمینِهَه جُم ووژ پِشکونیِ هُوا ئو اژ اَ تختَ گه اِنوم معبد بی، دَنگ کَلِنگی هات گه موئِتی: «کار تمومَ!»

¹⁸ اَسَه بیَ تَش‌بریقَل ئو گِرِمَل ئو گِرِمهُرَل، ئو زمی‌لرزَه کَلِنگی هات، هُنَ گه اژ زمونی گه اِنسون اَررُی زَمی زِنِه‌یَ مَهَردی، ناهاتوئی.

¹⁹ شیَر کَلِنگ بیَ سه کُت ئو شیَرَل ملتَل اژ یَک چویچیانا. ئو خدا بابِل کَلِنگ آوِردیِ ویر ئو جُم شِراو پِر اژ خَضو ووژ خُرّونی‌ئون.

²⁰ ئو کُل جزیرَه‌ل حِیواین ئو دیَر هُیچ کوی‌ای نوئی.

²¹ ئو اژ آسمو توئِرگ سخدی رِشیا اَر سر مردِم‌اِرا، گه هر گِلِه، مَری پنجا کیلو بی؛ ئو مردِم وَه خاطر ایی توئِرگَ کِفِر خدائو کِرد، اَرِیَگه بِلا فِرَه سخدی بی.