مِکاشفَه 15 - کتاب مقدس به زبان لکی - گویش مرکزی

هفت فریشدَه وَه‌گَرد هفت بِلا

¹ اَسَه یِه نشونَه کَلِنگ ئو بِلُجوئی‌تِرِم اِنوم آسمو دی، هفت فریشدَه وَه‌گَرد هفت بِلا -گه بِلائَل آخِرِن، اَرِیَگه خَضو خدا وَه اونَل تمومَ ماو.

² ئو چیمی دی گه هَماری دریای بی اژ شیشَه گه وَه‌گَرد آگِر هاوِنتوئیَ یَک‌اِرا، ئو هَمیش اونَلی گه فائق هاتوئین اَر جونور وَشی ئو مِجسمِهِه ئو نِمِرَه نُمی، دینِم گه هوسیانَس اَر لو دریا شیشَه ئو چَنگل خدائونِ دَسا بی.

³ ئو سروء خادم خدا، موسی‌ئونَ مَحیوَن ئو سروء اَ وَرکَ ئو موئِتو: «کارَلِت کَلِنگ ئو بِلُجوئیَ، اِاِ خداون خداءِ قادر مطلق. رئیَلِت عدل ئو حخَ، اِاِ پاتِشا ملتَل.

⁴ اِاِ خداون، کیَ گه زِلَه اژ تو نَچوتی، ئو نُم تو جِلال نِ؟ اَرِیَگه تو، ئو فَخَد تو، قدوسین. کُل ملتِلَ مان ئو اَرتَک تو عَبادتتَ مَهَن اَرِیَگه کارَل عادلونَه تو آشگارا بیَ.»

⁵ دُما اَوَه دیم گه مَکو مقدّس داوار شهادت، اِنوم آسمو واز بی.

⁶ ئو هفت فریشدَه گه هفت بِلائو داشد اژ اَوَه هاتِنَ دِریر. اونَل کتون پاک ئو بِریقَه‌داری اِوَرو بی ئو شال طِلائی اِ دور سینَه‌لو.

⁷ اَسَه یَکی اژ اَ چوار موجود زِنیَ، هفت جُم طِلا پِر اژ خَضو خدای گه تا ابدالآباد زِنیَ، داءَ اَ هفت فریشدَه.

⁸ ئو مَکو مقدّس وَه جِلال ئو قدِرت خدا پِر اژ دویا بی، ئو تا هفت بِلا اَ هفت فریشدَه تموم نوئی هُیچ‌کس نتونستی بِچو اِنوم مَکو مقدّس.