مِکاشفَه 14 - کتاب مقدس به زبان لکی - گویش مرکزیوَرک ئو صد ئو چِل ئو چوار هزار نفر 1 اَسَه سِیلِم کِرد ئو وَرکِم دی هوسیاس اَرسر کوی صَهیون ئو صد ئو چِل ئو چوار هزار نفرَ گَرد بینی گه نُم او ئو نُم باوِه نُیسیائی اِنوم توئلو. 2 ئو دَنگمی اژ آسمو شنَفت اِجور هوفَه آوَل فِرَه ئو اِجور دَنگ گِرِمهُر کَلِنگی؛ اَ دَنگمَ گه شنَفت اِجور دَنگ سازِنَل چِنگ بی حِنی گه چِنگ ووژونَ مَژَنِن. 3 ئو اَرتَک تخت ئو اَ چوار موجود زِنیَ ئو ریش‌اَسبیَل، سروء تازه‌ئونی مَحیوَن. ئو کس نتونستی اَ سروءَ آبِگِری، مَر اَ صد ئو چِل ئو چوار هزار نفرَ گه اژ نوم مردِم زَمی اِدوارَه خِریائین. 4 یوئنَ هَراَ کسَلِنَ گه ووژو آلودَه ژِنَل نَهَردیَ، اَرِیَگه عُذَبِن. یوئنَ کسَلی کِن گه مَچِنَ تُرّ وَرکا ویرِ هر جای گه بِچو. یوئنَ اژ نوم آمَل وَه نَسَخی اِدوارَه خِریانَ تا بوئنَ نوبر اَرِه خدا ئو وَرک. 5 ئو هُیچ دِروئی اِنوم دَمو نوئیَ دی. اَرِیَگه یوئنَ بی‌عِوِن. پِغومَل سه فریشدَه 6 اَسَه فریشدِه‌‌‌ی‌تِرِم دی گه اَر نومجا آسمو بالَ مَگِرتی ئو انجیل ابدی‌ایَ بی بیتی تا اِلوم کِیتی اَر کسَلی گه لیزو گِرتیَس اَررُی زَمی، ئو اَر هر ملت ئو طائفَه ئو زوئون ئو قوم. 7 او وَه دَنگ کَلِنگ وِتی: «اژ خدا زِلَتو بِچو ئو جِلال دَنی، اَرِیَگه سات داوری رَسیَسی، ئو او عَبادت کَن گه آسمون ئو زمین ئو دریا ئو کیَنیَل آو خَلک کِردی.» 8 ئو فریشدِه‌ی‌تِر، یانی دوئِمینِهَه، هاتَ تُرّ اوآ ئو وِتی: «رِمیا! بابِل کَلِنگ رِمیا! اَوَه گه شِراو زِنهاکاری ووژ گه خَضو خداءَ ماری، خُرونیَ کُل ملتَل.» 9 ئو فریشدِه‌ی‌تِر، یانی سِئِمینِهَه، هاتَ دُم اونِلا ئو وَه دَنگ کَلِنگ وِتی: «اَرّ کسی اَ جونور وَشیَ ئو مِجسمِهِه عَبادت کِ ئو بِچوءِ گِرد نشونَه او اَرنوم توئل یا دس ووژا، 10 اویش اژ شِراو خَضو خدا گه پِرمِلات ئو خَص رِشیاس اِنوم جُم خِض او، خُرَّ مِ، ئو او اَرتَک فریشدَه‌ل مقدّس ئو اَرتَک وَرک وَه آگِر ئو گوگرد عذاوَ موئینی. 11 ئو دوی عذاو اونَل تا ابدَ مَچوءَ بِلِنگ. کسَلی گه اَ جونور وَشیَ ئو مِجسمِهِه عَبادتَ مَهَن ئو هر کی گه مَچوءِ گِرد نشونَه نُم او، نه اِ شو سِتارونَ مَگِری ئو نه اِ روژ.» 12 یَه پایاری ایمودارَل مسیحَ مِیتی گه حکمَل خدا ئو ایمون اَر مسیحَ مارِن‌َ جا. 13 اَسَه دَنگمی اژ آسمو شنَفت گه موئِتی: «بِنُیسِن: خَوزگالَ کسَلی گه اَژیرِ دُما اِنوم خداونَ مَمِرِن.» ئو روحِ خدا وِتی: «اَاَ، خَوزگالَ اَرینو، اونَل اژ جُورَلو سِتارونَ مَگِری، اَرِیَگه کارَلو وَه دُم سرونا مای!» درو ثمر زَمی 14 اَسَه سِیلِم کِرد، اُر اِسبیمی دی ئو اَررُی اَ اُرَ، یَکی نیشتوئی هرگا کُر اِنسو، تاجی اژ طِلا اَرسر ئو داس تیژی اِ دَسا بیتی. 15 ئو فریشدِه‌ی‌تِر اژ معبد هاتَ دِریر ئو وَه دَنگ کَلِنگ وِتیَ اَوَه گه نیشتوئی اَرسر اُر: «داس ووژِت هیزدَ ئو درو کَ، اَرِیَگه وخد درو رَسیَ ئو ثمر زَمی کامل رَسیَ.» 16 اِسَه اَوَه گه نیشتوئی اَرسر اُر، داس ووژ خِر داتی اَررُی زَمی، ئو زَمی درو بی. 17 اَسَه فریشدِه‌ی‌تِر اژ معبدی گه ها نوم آسمون‌اِر هاتَ دِریر ئو اویش داس تیژی داشدی. 18 ئو فریشدِه‌ی‌تِر اژ قُرونی‌گا هاتَ دِریر گه اَر آگِر قدِرت‌واختیار داشدی ئو وَه دَنگ کَلِنگ وِتیَ اَوَه گه داس تیژِهَه داشدی: «داس تیژِت هیزدَ ئو حوشَه‌ل اژ دار مو زَمی گِردا کَ، اَرِیَگه انگویرَل رَسینَسی.» 19 اِسَه اَ فریشدَه داسِهِه خِر دا اَررُی زَمی ئو انگویرَل زَمی گِردا کِردی ئو رِشونی اِنوم حوض کَلِنگ شِراو خَضو خدا. 20 ئو انگویرَل اِنوم اَ حوض شِراوَ اژ شیَر اِ در تِلیان‌اِرا ئو خوین اژ حوض شِراو جُر گِرت ئو تا لَخوم اَسبَل هاتِ رُ، دِریژی سیصد کیلومتر بیتی. |
@ 2024 Korpu Company