مِکاشفَه 13 - کتاب مقدس به زبان لکی - گویش مرکزی

جونور وَشی اول

¹ اَسَه دیم یِه جونور وَشی اژ دریا ماءَ دِریر. دیَه شاخ داشدی ئو هفت سر، وَه‌گَرد دیَه تاج اَر شاخَلی؛ ئو اَرنوم هر سر اَژینی نُم کِفِرداری نُیسیائی.

² اَ جونور وَشیمَ گه دی هَر چُی پلنگی بی، پال چُی پال خرس بیتی ئو دَمی چُی دَم شیر، ئو اُژدها قویَت ئو تخت ووژ ئو قدِرت‌واختیار کَلِنگی دائون.

³ هَماری یَکی اژ سِرَل اَ جونور وَشیَ، زیَمی داشدی گه داشدی مَکُشت، مِنتائای اَ زیَمیَ گه داشد مَکُشت، خوآ بوئی. دنیا کُل واقونِ دَم پَری ئو چِنَ تُرّ اَ جونور وَشیا.

⁴ مردِم اُژدهائو عَبادتَ مَهَرد اَرِیَگه قدِرت‌واختیار ووژ دائیتیَ اَ جونور وَشیَ، ئو اَ جونور وَشیونَ عَبادتَ مَهَرد ئو موئِتو: «کیَ گه چُی ایی جونور وَشیَ بوءَ؟ کیَ گه بتونی جنگَ گَرد کِیتی؟»

⁵ دَمی بَشخیاءَ اَ جونور وَشیَ گه قصَه‌ل کَلِنگ‌کَلِنگ ئو کِفِر بوشی، ئو صِلائو دائون تا اَرِه چِل ئو دو مُنگ قدِرت‌واختیار ووژ بیَریَ کار.

⁶ دَم ووژ واز کِردیَ کِفِر وِتِنَ خدا، ئو کِفِر وِتیَ نُم او ئو وَه جالیز او، ئو وَه اونَلی گه لیزو گِرتیَس اِنوم آسمو.

⁷ هَمیش صِلائو دائون گه وَه‌گَرد ایمودارَل مسیح جنگ بِهِه ئو فائق با اَرینو؛ ئو قدِرت‌واختیارو دائون تاگَه حکِمرو هر طائفَه ئو قوم ئو زوئون ئو ملت بو.

⁸ ئو کُل کسَلی گه لیزو گِرتیَس اَررُی زَمی عَبادتَ مَهَنی، یانی کُل کسَلی گه نُمون اژ بِنیا دنیا، اِنوم اَ دفتر ژییاینَ نَنُیسیاءَ گه هِن اَ وَرکَسَ گه قُرونی بی.

⁹ اَوَه گه گوش دیری بشتوئی:

¹⁰ اَرّ کسی باس اسیر بو، مَچوءَ اسیری. اَرّ کسی باس وَه شِمشیر بِکُشِری، وَه شِمشیرَ مَکُشِری. یَه پایاری ئو ایمو ایمودارَل مسیحَ مِیتی.

جونور وَشی دوئِم

¹¹ اَسَه دیم جونور وَشی‌ای‌تِر اژ زمینَ ماءَ دِریر. دو شاخ چُی شاخ وَرک داشدی ئو چُی اُژدها قصَه مَهَردی.

¹² ئو تمومِ قدِرت‌واختیار جونور وَشی اولینِهَه اِجال اوءَ میَریِ کار ئو زمین ئو کسَلی گه لیزو گِرتیَس اِنوم مجبورَ مِهِه جونور وَشی اولینِهَه گه اَ زیَمیَ گه داشدی مَکُشت خوآ بوئی، عَبادت کَن.

¹³ جونور وَشی دوئِمینِهَه نشونَه‌ل ئو مُجِزَه‌ل کَلِنگی اَنجومَ ماتی ئو جُ‌جُ اَر وَر چیَم مردِم آگِر اژ آسمونَ ماوِردیِ زَمی.

¹⁴ ئو وَه‌سونگَ نشونَه‌ل ئو مُجِزَه‌لی گه صِلا داشدی اِجال جونور وَشی اولینِهَه اَنجوم بِ، کسَلی گه لیزو گِرتیَس اَررُی زَمی فنَ مِ ئو موشی‌ئونو مِجسمه‌ی دُریس کَن اژ اَ جونور وَشیَ گه وَه شِمشیر زیَم‌دارا بی، وَه ایی حالا زِنی مَن.

¹⁵ ئو صِلائو دائون گه گیو بِئَه مِجسمَه جونور وَشی اولینِهَه، تاگَه اَ مِجسمَه جونور وَشیَ جُ‌جُ بتونی قصَه بِهِه ئو باعث کُشتِن کسَلی بو گه اَ مِجسمَه جونور وَشیَ عَبادت نِمَهَن.

¹⁶ هَمیش کُل کس، کَلِنگ ئو گُجَر، دولَمَن ئو ژار، خُلُم ئو آزاد مجبورَ مِهِه تاگَه نشونه‌ی بِنِن اَر دس راسو یا اَرنوم توئلو.

¹⁷ تاگَه هُیچ‌کس نتونی بِخِری یاگَه بفِروشی مَر یَگه اَ نشونَه داشدوئیتی، یانی نُم یا نِمِرَه نُم اَ جونور وَشیَ.

¹⁸ یَه حکمتَ مِیتی. بیلا هر کی گه فیَم دیری، نِمِرَه اَ جونور وَشیَ حساو کِ، اَرِیَگه اَوَه، نِمِرَه اِنسونَ، ئو نِمِرَه او شَشصد ئو شص ئو شَشَ.