مِکاشفَه 12 - کتاب مقدس به زبان لکی - گویش مرکزیژَن ئو اُژدها 1 ئو نشونَه کَلِنگ ئو بِلُجوئی اِنوم آسمو دیارا داتی: ژَنی گه هویَر کِردوئیتی وَر ئو مُنگ اِ ژیر پال ئو تاجی اژ دوازَه آسارَه اَرسر بیتی. 2 ژَن لَم پِر بیتی ئو اژ ژُن ئو زور زائینَ مَزیرونی. 3 اَسَه نشونه‌ی‌تِر اِنوم آسمو دیارا داتی: اُژدها سوئر ئو کَلِنگی گه هفت سر ئو دیَه شاخ داشدی، ئو هفت تاج اَرنوم سِرَل بیتی. 4 دُمی یِه‌سِئِم اژ آسارَه‌ل آسمو جارو کِردی ئو رِشونی اَر زمین‌اِرا. اُژدها هوسیا اَر ویراَرویر اَ ژِنَ گه داشدی مَزایا، تاگَه هَریَگه آویلِهِه زائیتی، قویت اِرادِیتی. 5 اَ ژِنَ کُری زائیتی، کُری گه میا وَه موزبِرَه آهِنین اَر کُل ملتَل حکِمرونی بِهِه. مِنتائای آویلِهِه راقیااِر اَرِه تک خدا ئو تخت او. 6 ئو ژَن حِوای ویرِ بیاوو، جای گه خدا اَرِه تیارِک دوئی، تاگَه اَر اورَه هزار ئو دوهیس ئو شص روژ اَژی هِوَت کَنی. 7 ئو یِگِلی اِ آسمو بیَ قی. میکائیل ئو فریشدَه‌لی وَه‌گَرد اُژدها بینَ جنگ ئو اُژدها ئو فریشدَه‌لی وَه‌گَرد اونَل جنگو کِرد، 8 مِنتائای اُژدها شِکِس هُاردی ئو دیَر اِنوم آسمو جائونی اَرِه نوئی. 9 ئو اُژدها کَلِنگو آوشدَ هُار، هَراَ مار قدیمیَ گه ابلیس ئو شِطو نُمَسی، اَوَه گه کُل دنیا اژ رئی اِرَماری. اوُ آوشد اَر زَمی، ئو فریشدِه‌لِهِیشی وَه‌گَرد اوُ آوشد اَر زَمی. 10 اَسَه دَنگ کَلِنگمی اِنوم آسمو شنَفت گه موئِتی: «اِسگَه نجاد ئو قویَت ئو پاتِشائی خدامو، ئو قدِرت مسیحِ او هاتیَ. اَرِیَگه اَ بُختِم‌چی بِرال ایمَه گه شو ئو روژ اَرتَک خدامو، بُختِمَ مِ اَرینو، آوشدونَس اَر زَمی. 11 ئو اونَ وَه خوین وَرک، ئو کلوم شاتی ووژو فائق هاتنی اَری. اَرِیَگه گیو ووژو دوسو ناآشدیَ، جُ‌جُ تا مِردِن. 12 اِسَه اِاِ آسمونَل ئو اِاِ کسَلی گه لیزتو گِرتیَس اِنومو، خَوشالی بِهَن! مِنتائای هِرّو اَرِه هُمَه اِاِ زمین ئو دریا، اَرِیَگه ابلیس وَه خَضو فِرِه‌ی هاتیَسَ هُار، اَرِه هُمَه، اَرِیَگه مَذانی مِجال فِرِه‌ی نِری.» 13 ئو هَریَگه اُژدها دیتی آوشدونَس اَر زَمی، کَت اَر دُم اَ ژِنَ گه کُری زائیتی. 14 مِنتائای دو بال اَ دال کَلِنگونَ داءَ اَ ژِنَ تا اژ دس اَ مارَ ویرِ جای اِ بیاوو گه اَرِنی تیارِکو دیَ، بال بِگِری، اَ جاءَ گه اَرِه زمونی ئو دو زمون ئو نِصم زمونی اَژی هِوَت کَنی. 15 مارِهَه اژ دَم ووژ آوی چُی روو، اِ دُم اَ ژِنا آوشدیِ رئی، تا لافاو وَه‌گَرد ووژ بیَرتی. 16 مِنتائای زَمی هاتَ یاری ژِنَهَه ئو دَم واز کِردی ئو لافاوی گه اُژدها اژ دَم ووژ آوشدوئیتیِ رئی، قویت اِراداتی. 17 اَسَه اُژدها خِض گِرت اَر ژِنَهَه ئو چی تا وَه‌گَرد باقی نسِل او جنگ بِهِه؛ یانی وَه‌گَرد اونَلی گه حکمَل خدا مارِنَ جا ئو سفدِسخد مَچسبِن اَر شاتی عیسی‌آ. 18 ئو اُژدها هوسیا اَررُی هُسَل لو دریا. |
@ 2024 Korpu Company