مِکاشفَه 11 - کتاب مقدس به زبان لکی - گویش مرکزیدو شات 1 اَسَه تَلی اژ زَلو داءَ مِه گه اِجور چو گَز کِردِن بی، ئو وِتون‌ئونِم: «هیزگِر ئو معبد خدا ئو قُرونی‌گا گَز کَ ئو کسَلی گه اَر اورَه عَبادتَ مَهَن، بشمار. 2 مِنتائای کارتَ گَز کِردِن قِلا معبدا ناو، اَرِیَگه داونَسَ ملتَل، ئو اونَل چِل ئو دو مُنگ شیَر مقدّس اِ ژیر پاءَ مَتِلِنِن. 3 ئو مِه قدِرتَ میَمَ دو شات ووژِم گه پِلاس اِوَر، هزار ئو دوهیس ئو شص روژ نبوّت کَن.» 4 یوئنَ دو دار زِتون ئو دو چراخدونِن گه موسِن اَرتَک خداون زَمی. 5 ئو اَرّ کسی بِیتی ضِرَدی بِ اَرینو، آگِر اژ دَمونَ مِئَه دِریر ئو دشمنَلونَ مَکُشی ئو مِهِه‌ئونَ بیل. اَرّ کسی بِیتی ضِرَدی بِ اَرینو، باس هُنَ بِکُشِری. 6 اونَ ایی قدِرتَ دیرِن گه آسمو بوئنِن تاگَه اِ روژَل نبوّتو وارُ ناواری، ئو ایی قدِرتَ اَر آوَل دیرِن گه اونِلَ بِهَنَ خوین ئو هر چَن گِلی گه بِئو وَه هر جور بِلای ضرپَه بیَن اَر زَمی. 7 هَریَگه اونَ شاتی ووژو تمومو کِرد، اَ جونور وَشیَ گه اژ چا هاویَه ماءَ دِریر، وَه‌‌گَردونَ مِهِئَه جنگ ئو فائقَ ما اَرینو، ئو مَکُشیو. 8 ئو لَشَلون اِنوم مِدون اَ شیَر کَلِنگَ گه وَه لاپیچِکَ موشِنی‌ئون سُدوم ئو مصر مَمینی اَررُی زَمی؛ هَراَ جاءَ گه خداون اون‌یش، کیشیا اَر صلیب. 9 تا سه روژ ئو نیم، مردِم اژ هر قوم ئو طائفَه ئو زوئون ئو ملت گِزَ مَهَن اَر لَشَلو ئو نِمَچِنِ ژیر یَگه صِلا بیَن گه خاکو کَن. 10 کسَلی گه لیزو گِرتیَس اَررُی زَمی اژ مِردِن اونَل خَوشالیَ مَهَن ئو جَشتَ مَگِرِن ئو اَرِه یَکتِری پیشکَشی کِلَ‌مَهَن؛ اَرِیَگه ایی دو نبوّت‌کَرَ اَرِه کسَلی گه لیزو گِرتیَس اَررُی زَمی، عذاو بینَ. 11 مِنتائای دُما سه روژ ئو نیم، هِناسی ژییاین اژ جونِم خدا هاتِ دَرینو ئو هوسیان اَرسر پائلو، ئو سِیل‌کَرَلو، زِلَ‌تِراقا بین. 12 اَسَه دَنگ کَلِنگونی اژ آسمو شنَفت گه موئِتی‌ئونو: «بورِنِ رُ اَرِه ایرَه!» ئو اونَل اِنوم اُری ویرِ آسمو چِنِ رُ ئو دشمنَلو سِیلو کِردِن. 13 ئو هَراَ ساتَ، بیَ زمی‌لرزَه کَلِنگی ئو یِه‌دیَهِم اژ شیَر رِمیا ئو هفت هزار نفر اِنوم اَ زمی‌لرزَه کُشِریان ئو باقی اونَل زِلَ‌تِراقا بین ئو خداءِ آسمونو جِلال دا. 14 ’هِرّو‘ دوئِمینِهَه رد بی. اِسگَه، ’هِرّو‘ سِئِمینِهَه ها رئی‌اِر ئو وَه ایی زویَ باس بای. شِپور هفتِم 15 اَسَه فریشدَه هفتِمینِهَه پِف کِردی اِنوم شِپورِهِه؛ ئو دَنگَل کَلِنگی اِ آسمو بین گه موئِتو: «پاتِشائی دنیا، بیَسَ هِن خداون ایمَه، ئو مسیحِ او. ئو او تا ابدالآباد سِلطنتَ مِهِه.» 16 ئو اَ بیس ئو چوار ریش‌اَسبیَ گه اَرتَک خدا نیشتینَس اَرسر تختَلو، وَه رُیا کَتِن اَر زَمی ئو خدائو عَبادت کِرد، 17 ئو موئِتو: «شگِرتَ مِهِیم اِاِ خداون، خداءِ قادرِ مطلق، گه هِین ئو بین. اَرِیَگه تو قدِرت کَلِنگ ووژِت گِرتِتَسِ دس، ئو بِنیا حکِمرونیِت ناءَ. 18 ملتَل آگِر اَژینو چی، مِنتائای خَضو تو هات، وخد داوری اَر مِردیَل رَسیَ، وخد رَسیَسی گه مِز بِینَ خادمَلِت، نبوّت‌کَرَل ئو ایمودارَل مسیح، هَمیش کسَلی گه عزّت نُمِت دیرِن، اژ کَلِنگ تا گُجَر، ئو کسَلی گه زمینو نابود کِردیَ، نابود کِین.» 19 اَسَه معبد خدا اِنوم آسمو واز بی؛ ئو صَنُق عَت خدا اِنوم معبد او دیارا بی؛ ئو بیَ تَش‌بریقَل ئو گِرِمَل ئو گِرِمهُرَل ئو زمی‌لرزَه ئو توئِرگ سخد. |
@ 2024 Korpu Company