مِکاشفَه 10 - کتاب مقدس به زبان لکی - گویش مرکزیفریشدَه ئو طومار گُجَر 1 اَسَه دیم فریشدَه زورداری‌تِر اژ آسمونَ ماءَ هُار گه اُری اِراگِرتوئی ئو سُزوتُیلی اَر بِلِنگ سر بیتی. نوم‌رُی چُی هویَر بیتی ئو پالی چُی سُتینل آگِر. 2 طومار گُجَر ئو وازی اِ دَسا بیتی. فریشدِهَه قُل راس ووژ نا اَر دریا ئو قُل چپ اَر حشگی. 3 ئو وَه دَنگ کَلِنگی اِجور نَرَه شیر نِرکونی. هَریَگه نِرکونی اَ هفت گِرِمهُرَ هاتنِ دَنگ ئو هاتنِ قصَه. 4 ئو وخدی اَ هفت گِرِمهُرَ هاتِنِ قصَه، مِئستِم بِنُیسِنِم؛ مِنتائای دَنگمی اژ آسمو شنَفت گه موئِتی: «اَ چیئَه گه اَ هفت گِرِمهُرَ وِتونَ، میرِموم کَ ئو نَنُیسِن.» 5 اَسَه اَ فریشدَه گه دیم هوسیائی اَررُی دریا ئو حشگی، دس راس ووژ ویرِ آسمو بِردیِ رُ 6 ئو قسم هُاردیَ او گه تا ابدالآباد زِنیَ ئو آسمون ئو هر چیئی گه هایتی‌اِر ئو زمین ئو هر چیئی گه هایتی‌اِر ئو دریا ئو هر چیئی گه هایتی‌اِر خَلک کِردی، ئو وِتی گه دیَر ویشتِر اژ یَه دیر نِماو. 7 بلکِم اِ اَ روژِلَ گه فریشدَه هفتِمینِهَه دَنگ شِپور اِرباری، راز خدا تمومِ‌کمال اَنجومَ مَگِری، هَرهُنَ گه اَر خادمَل ووژ، یانی نبوّت‌کَرَل، اِلوم کِردی. 8 اَسَه اَ دَنگَ گه اژ آسمونِم شنَفتوئی اِدوارَه قصَه‌مَ گَرد کِردی ئو وِتی: «بِچُ اَ طومار وازَ گه ها دس اَ فریشدَه گه هوسیاس اَررُی دریا ئو حشگی، بِسین.» 9 اِسَه چِم ویرِ فریشدِهَه ئو وِتم‌ئون گه اَ طومار گُجِرَ بِ‌ئونِم. او وِتی‌ئونِم: «یَه بِگِر ئو بیرتی! نُم لَمِت تیَلا مِهِه، مِنتائای اِنوم دَمِت اِجور هَسَل شیرینَ ماو.» 10 اِسَه اَ طومار گُجَرمَ اژ دس فریشدَه سَن ئو هُاردِم. اِنوم دَمِم اِجور هَسَل شیرین بی، مِنتائای وخدی هُاردِم، نوم لَمِم تیَلا بی. 11 اَسَه وِتون‌ئونِم: «تو باس هَنی اِبارَه قومَل ئو ملتَل ئو زوئونَل ئو پاتِشائَل فِرِه نبوّت بِهِین.» |
@ 2024 Korpu Company