مِکاشفَه 1 - کتاب مقدس به زبان لکی - گویش مرکزی

بِنیا

¹ مِکاشفَه عیسی مسیح، گه خدا دائون تا چیئَلی گه باس وَه ایی زویَ اتفاق بِکُوءِ نِشو خُلُمَلی بِ. او وَه کِل‌کِردِن فریشدَه ووژ، یَه آشگارا کِردی اَر خُلُم ووژ، یوحنا.

² گه شاتیَ مِ اَر کلوم خدا ئو اَر شاتی عیسی مسیح، یانی اَر هر چی گه دیتی.

³ خَوزگالَ اَوَه گه کلوم ایی نبوّتَ مَحیوَنی ئو خَوزگالَ اونَلی گه مَشتوئِنی ئو اَ چیئَه گه نُیسیاس اِنوم مارِنَ جا، اَرِیَگه وخد نزیکَ.

پِغوم اَر هفت کلیسا

⁴ اژ یوحنا، وَه هفت کلیسای گه هان اِنوم هیال آسیااِر: فیض‌وسِلامتی اژ جونِم او گه هَس ئو بی ئو مای اَر هُمَه بو ئو اژ جونِم هفت روحی گه هان اَرتَک تخت پاتِشائی او،

⁵ ئو اژ جونِم عیسی مسیح، اَ شات وفادارَ ئو اول کسی گه اژ مِردیَل زِنیا بی، ئو حکِمرون پاتِشائَل رُی زَمی. او گه ایمَه دوس دیری ئو وَه خوین ووژ، ایمَل اژ گنائَلمو آزاد کِردیِ،

⁶ ئو ایمَه کِردیَ مملکت ئو کاهنَلی اَرِه خدا، باوَه ووژ، جِلال ئو سِلطنت اَر او تا ابد. آمین.

⁷ سِیل کَ، وَه اُرِلَ مای، ئو هَر چیَمی اوءَ موئینی، جُ‌جُ چیَم اونَلی گه نِزِه‌ئو دا اَری؛ ئو کُل طائفَه‌ل زَمی لورَلورَ مَهَنی اَرِه. اَاَ، هُنَ ماو. آمین.

⁸ خداون، خدا موشی: «مِنِم ’الف‘، مِنِم ’ی‘؛ مِنِم اَوَه گه هَس ئو بی ئو مای، اَ قادر مطلقَ.»

رویا کُر اِنسو

⁹ مِه، یوحنا، بِرا هُمَه، گه اِ جُور ئو پاتِشائی ئو پایاری‌‌ای گه ها نوم عیسی‌اِر، وَه‌گَردتو شیَریکِم، وَه خاطر کلوم خدا ئو شاتی اَر عیسی، اِ جزیره‌ی بیم گه نُم پاتموس بیتی.

¹⁰ اِ روژ خداون، روحِ خدا مِن اِراگِرتی ئو دَنگ کَلِنگی اِجور دَنگ شِپور اژ پِشت‌سرما شنَفت

¹¹ گه موئِتی: «اَ چیئَه گه موئینین بِنُیسِن اِنوم کِتاوی ئو کِل‌کَ اَرِه هفت کلیسا اَفِسُس، اِسمیرنا، پِرگاموم، تیاتیرا، ساردِس، فیلادِلفیَه ئو لائودیکیَه.»

¹² اَسَه کِلماداءِ دُما تاگَه بوئینِم یَه دَنگ کیَ گه قصَه‌مَ گَردَ مِهِه؛ ئو هَریَگه کِلماداءِ دُما، هفت چراخدو طِلام دی،

¹³ ئو اِنومجا اَ چراخدونِلَ یَکمی دی هرگا ’کُر اِنسو‘. چوخا دِریژی اِوَر بیتی ئو شال طِلائی اَر دور سینه‌آ.

¹⁴ می‌سر اِجور حُری اِسبی بیتی، اِجور وِئَر. چیَمَلی اِجور بِلاچَه آگِر بین.

¹⁵ پالی اِجور مَفِرغ سائیای گه اِ کویرَه آگِر تاو هُاردوئی بِریقَه ماتی، ئو دَنگی هرگا هوفَه آوَل فِرَه.

¹⁶ اِ دس راسی هفت آسارَه داشدی، اژ دَمی شِمشیر دودَم تیژی هاتَ دِریر، ئو نوم‌رُی‌ای اِجور هویَر بی گه وَه کُل قویَت ووژَ مَدَرشخی.

¹⁷ هَریَگه اوئِم دی، اِجور مِردی کَتم اَر وَر پالی. مِنتائای او دس راس ووژ نا اَر قِم ئو وِتی: «زِلَت نَچو، مِنِم اول، مِنِم آخِر،

¹⁸ مِه گه زِنیئِم. مِه مِردِم، ئو سِیل کَ اَرِه همیشَه زِنیئِم، ئو کِلیلَل مرگ ئو دنیا مِردیَل ها دس مِنا.

¹⁹ «اِسَه هر چَتی گه دیَ، هرچی گه هَس ئو هر چی گه اَژیرِ دُما میا بو، بِنُیسِن.

²⁰ راز اَ هفت آسارَه گه اِ دس راس مِنِت دی ئو راز اَ هفت چراخدو طِلا یَسَ: اَ هفت آسارَه، فریشدَه‌ل هفت کلیسان، ئو اَ هفت چراخدونَ، هَراَ هفت کلیسانَ.