فیلیپیَل 4 - کتاب مقدس به زبان لکی - گویش مرکزی

¹ اِسَه، اِاِ بِرالی گه دوستو دیرِم ئو اَرِنتو شوق دیرِم، هُمَه گه خَوشی ئو تاج سر مِنینو، عزیزَلِم، هَرهُنَ سفدِسخد اِنوم خداون پایار بِمینِن.

پَن، تشویق، دوعا

² اژ اِفُودیَه خواهشدَ مَهَم ئو مَلالکِمَ سینتیخی گه اِنوم خداون هُم‌رِأ بوئن.

³ اِاِ هُمکار وفادار، اژ تونیشمَ مِ گه ایی دو ژِنَ یاری دِین اَرِیَگه وَه‌گَرد کلِمِنت ئو باقی هُمکارَلِم گه نُمو اِنوم دفتر ژییاین نُیسیاءَ، شونَ شو مِن اِ کار انجیل زیَمَتو کیشیَ.

⁴ هَر اِنوم خداون خَوشال بوئن، اِدوارَه موشِم: خَوشال بوئن.

⁵ بِیلِن کُل کس بِذانی چَنی مِلومینو. خداون نزیکَ.

⁶ دلتونِ هول هُیچی ناو، بلکِم اِ کُل چی وَه دوعا ئو اِمدای آوِردِن ئو شگِر کِردِن، چیئَلتونی گه مِ بوشِنَ خدا.

⁷ ئو صُئل ئو سِلامتی خدا گه اژ هَر فیَمی بِلِنگ‌تِرَ، دل ئو فگِرَلتون اِنوم مسیحْ عیسی حفظَ مِهِه.

⁸ دُماخِرِ، اِاِ بِرال، هر چی گه راسَ، هر چی گه عزّت دیری، هر چی گه دُریسَ، هر چی گه پاکَ، هر چی گه باوِ دلَ، هر چی گه لائق شگِر کِردِنَ، اَرّ فِرَه خوءَ، اَرّ لائق شگِر کِردِنَ، وَه ایی چیئِلَ فگِر بِهَن.

⁹ اَ چیئَه گه اژ مِنتو گِرتیَسا، ئو قبولتو کِردیَ، ئو اژ مِنتو شنَفتیَ ئو اِنوم مِنتو دیَ، هَر یوئنَ بارِنَ جا ئو خداءِ صُئل ئو سِلامتی ها گَرد هُمَه.

خدا تیارِکَ موئینی

¹⁰ اِنوم خداون فِرَه خَوشالِم گه اِسگِه‌یشَ هاینونِ هول مِه، هُمَه اِراسی هَرِ هول مِه بینونَ، مِنتائای مِجالتو ناآشدیَ.

¹¹ نه یَگه اِبارَه هَوَجَه‌لِم قصَه بِهَم، اَرِیَگه گِرتِمَسا گه اِ کُل حالِ‌روژی قانی بوئم.

¹² هم مَذانِم ژاری چیَ هم دولَمَنی. اِ کُل حالِ‌روژی ئو اِ کُل چی راز زِنِه‌ی کِردِن اِ سیری ئو وِرسِنی، داشدِن ئو ناآشدِنِم گِرتیَسا.

¹³ اِنوم مسیح گه قویَتَ مِئَه مِه، قدِرت هر چی دیرِم.

¹⁴ وَه ایی حالا هُمَه لِفطو کِرد گه اِ زیَمَتَلِم بینونَ شریک مِه.

¹⁵ ئو هُمَه اِاِ فیلیپیَل، ووژتونَ مَذانینو گه اِ بِنیا کار انجیل، وخدی مِه اژ مقدونیَه چِم، هُیچ کلیسای اِ دائِن ئو گِرتِن، وَه‌گَرد مِه هُم‌بیَر نوئی بِخِر اژ هُمَه.

¹⁶ جُ‌جُ وخدی اِ تِسالونیکی بیم، یِه گِل اَرِه هَوَجَه‌لِم، یاریتو کِل‌کِرد ئو هَنی هم کِلتوکِرد.

¹⁷ نه یَگه وَه دُم پیشکَشیا بوئم، بلکِم هام اَر دُم ثمری گه اِتِبار هُمَه اَرتَک خدا ویشتِرا کِ.

¹⁸ اَ پیلمَ کامل گِرت ئو جُ‌جُ ویشتِر. ئو اِسگَه گه پیشکَشیَلی گه هُمَه کِلتوکردیَ، اژ اِپافْرودیتوسِم گِرتیَ، کُل چی دیرِم، گه یِه پیشکَشی خَوشبو ئو قُرونی قابلِ قبول ئو وَه دل خدای کَ.

¹⁹ ئو خداءِ مِه، کُل هَوَجَه‌ل هُمَه مِطابق دولتی پِرجِلال ووژ اِنوم مسیحْ عیسی زفت‌ِرفتَ مِهِه.

²⁰ جِلال اَر خدا، باوَه آسمونیمو تا ابد. آمین.

سِلامَل آخِر

²¹ سِلام برَسِنِنَ کُل ایمودارَل مسیحْ عیسی. بِرالی گه هانِ گَرد مِه سِلامَ مَرَسِنِنَ بینتو.

²² کُل ایمودارَل مسیح سِلامَ مَرَسِنِن بینتو، مصقوصاً اونَلی گه عتِ‌عیال امپراطور رومِن.

²³ فیض خداون عیسی مسیح وَه‌گَرد روحِ هُمَه بو. آمین.