فیلیپیَل 3 - کتاب مقدس به زبان لکی - گویش مرکزیصالحبیئین وَه‌سونگَ ایمون اَر مسیح 1 دُماخِرِ اِاِ بِرال، اِنوم خداون خَوشالی بِهَن. نُیسونِن هَرایی چیئِلَ زیَمَتی اَرِه مِه نِری بلکِم اَرِه یَسَ گه هُمَه اِ اَمو بوئینو. 2 اژ اَ سگِلَ دویرا بِگِرِن! اژ اَ شَرَبارِلَ دویرا بِگِرِن! اژ اونَلی گه اَرِه ختینَه جسمَ مُئرِن دویرا بِگِرِن! 3 اَرِیَگه ختینَه‌کَریائَل راسَکونی ایمِه‌یم گه وَه روحِ خدا عَبادتَ مِهِیم ئو افتخارَ مِهِیم اَر مسیحْ عیسی ئو تَکیمون اَر جسم نیَ- 4 وَه‌یاآگه مِه ووژیشِم دَسپیچَلی اَرِه تکی اَر جسم دیرِم. اَرّ کسی‌تِر فگِرَ مِهِه دَسپیچی اَرِه تکی اَر جسم دیری، مِه ویشتِر دیرِم: 5 ختینَه‌کَریا اِ روژ هشتِم، اژ قوم اسرائیل، اژ طائفَه بنیامین، عبرانی‌ای اژ داباوَه عبرانی؛ اِ نظر شریعت، فَریسی؛ 6 اِ نظر خیرَت، کسی گه کلیسا آزارَ ماتی، اِ نظر صالح‌بیئینی گه اژ شریعتَ مای، بی‌عِو. 7 مِنتائای اَ چیئَه گه اَرِه مِه فادَه داشدی، وَه خاطر مسیح ضِرَدمَ حساو آوِرد. 8 اِراسی مِه کُل چی وَه خاطر اَرزشد فِرَه شناخت خداونِم مسیحْ عیسی ضِرَدَ حساوَ مارِم گه وَه خاطر او کُل چیئِمِ کیس اِرچیَ ئو اونِلَ اِشخال وَه حساوَ مارِم، تاگَه نفعِم مسیح بو. 9 ئو اِنوم او بوئمَ دی، نه وَه صالح‌بیئین ووژِم گه اژ شریعتَ، بلکِم وَه صالح‌بیئینی گه وَه‌سونگَ ایمون اَر مسیحَ مای، اَ صالح‌بیئینی گه اژ خداءَ ئو اَر پاءَ ایمونَ. 10 تاگَه مسیح ئو قدِرت زِنیابیئِنی بشتاسِم ئو اِ عذاوَلی شریک بوئمی، اِ مرگی بوئم اِجور او. 11 تا هر جوری گه بیَ زِنیابیئِن اژ مِردیَل بارمَ دس. تقِلا اَرِه یَگه برَسمَ قَص ووژِم 12 نه یَگه تا اِسگَه یَمَ آوِردیَسَ دس یاگَه کاملا بیمَ، بلکِم تقِلا مَهَم بِهَمیَ هِن ووژِم، اَرِیَگه مسیحْ عیسی مِن اَرِه اَوَه کِردیَسیَ هِن ووژ. 13 اِاِ بِرال، گُمو نِمَهَم اَومَ کِردوئیَ هِن ووژِم. مِنتائای یِه کارَ مَهَم: اَوَه گه هار پِشت‌سرم اِویرَ میَرِم ئو اَرِه اَوَه گه ها نوااِر تقِلا مَهَم. 14 اَرِیَگه برَسم اَر قَص ووژِم تقِلا مَهَم تا جائزه‌ی بارمَ دس گه خدا اَرِه اَوَه اِنوم مسیحْ عیسی دَوَت کِردِمَسیَ بِلِنگ. 15 اِسَه کُل ایمَه گه بالغیم، باس هُنَ فگِر بِهِیم، ئو اَرّ اِ هرچی جوری‌تِر فگِرَ مِهِینو، یوئیشَ خدا اَر هُمَه آشگارا مِهِه. 16 بورِن مِطابق اَ چیئَه گه آوِردِمونَسَ دس، رفدار بِهِیم. 17 اِاِ بِرال، کُلتون اژ مِه سرمقشا بِگِرِن، ئو حُواستون اَر کسَلی بو گه مِطابق نمونه‌ی گه اژ ایمَه دیرینو، رفدارَ مَهَن. 18 اَرِیَگه هَرهُنَ گه چَن گِل وِتِمَسَ بینتو ئو هَراِسگِه‌یشَ جُ‌جُ وَه اَسِرا موشِمَ بینتو، بِری اِجور دشمنَل صلیب مسیح رفدارَ مَهَن. 19 عاقویَت هُنَ کسَلی نابودیَ، خدا اونَل لَمونَ، افتخارو اَر نَنگونَ، ئو فگِرَلو گیر چیئَل زمینیَ. 20 مِنتائای ایمَه اَل آسمونیم، ئو وَه شوقا چیَمَ‌رئی نجاددهندَه، یانی خداون عیسی مسیح، اژ اوریمَ. 21 او گه وَه قدِرتی گه قویَتَ مِیتیَ بی گه جُ‌جُ کُل چی بِهِئَه فِربوبَر ووژ، لارَل خوار ایمَه عوضَ مِهِه تا بوئن اِجور لار پِرجِلال ووژ. |
@ 2024 Korpu Company