فیلیپیَل 1 - کتاب مقدس به زبان لکی - گویش مرکزی

¹ اژ پولُس ئو تیموتائوس، خادمَل مسیحْ عیسی، وَه کُل ایمودارَل مسیحْ عیسی گه هانِ شیَر فیلیپی‌‌اِر، وَه‌گَرد اُسقُفَل ئو شمّاسَل:

² فیض ئو سِلامتی اژ جونِم خدا، باوَه آسمونی ایمَه ئو خداون عیسی مسیح اَر هُمَه بو.

دوعا ئو شگِر کِردِن

³ هرگِلی گه هُمَه مارِمَ ویر، شگِر خدا ووژمَ مَهَم.

⁴ هَر اِ کُل دوعائَل ووژِم اَرِه کُل هُمَه وَه خَوشی دوعا مَهَم،

⁵ وَه خاطر اَ هُمکاری‌ای گه اِ انجیل مسیح اژ روژ اول تاگَه اِسگَه دیرینو.

⁶ ئو مِه زقین دیرِم او گه بِنیا کار خوئی اِنوم هُمَه ناتی، اِ روژ گِلاهُاردِن مسیحْ عیسی، کاملَ مِهِیتی.

⁷ ایی حخَ دیرِم گه اِبارَه کُل هُمَه هُنَ فگِر بِهَم، اَرِیَگه هاینونِ نوم قلب مِن‌اِر، اَرِیَگه کُل هُمَه اِنوم فیض خدا وَه‌گَرد مِه هُم‌بیَرینو، هم اِ زندونی بیئِنِم ئو هم اِ دَفاع اژ انجیل ئو ثابت کِردِن دُریسی اَوَه.

⁸ اَرِیَگه خدا شاتَ گه وَه مِحبت مسیحْ عیسی، اَرِه هُمَه کُل شوق دیرِم.

⁹ ئو دوعا مِه یَسَ گه مِحبت هُمَه وَه‌گَرد شناخت ئو فیَم کامل ویشتِرِ ویشتِرا بو.

¹⁰ تاگَه بتونینو اَ چیئَه گه اژ کُل خاص‌تِرَ قبول کِینو، ئو تاگَه اَرِه روژ مسیح پاک ئو بی‌عِو بوئینو.

¹¹ پِرا بوئینون اژ ثمر صالح‌بیئینی گه وَه‌سونگَ عیسی مسیح وَه بارَ مای، اَرِه جِلال ئو شگِر خدا.

زنجیرَل پولُس ئو تَرَخدی انجیل

¹² اِاِ بِرال، مِم بِذانینو گه اَ چیئَه گه اَر سر مِه هاتیَ اِراسی باعث تَرَخدی انجیل بی.

¹³ هُنَ گه اَرِه کُل قِلااورَل سِلطنتی ئو باقی یَه آشگارا بی گه وَه خاطر مسیح هامِ زندون‌اِر.

¹⁴ ئو فِرَه کسَل اژ ایمودارَل وَه خاطر زندونی بیئِن مِه هُنَ اِنوم خداون دِلو قرص بیَ گه کلوم خدا وَه جورَت ویشتِری، بی‌یَگه زِلِئو بِچو، موشِن.

¹⁵ بِری اِراسی اژ حَسوئی ئو هُمالی مسیح موعظَه مَهَن، مِنتائای باقی وَه نیّت خو.

¹⁶ ایی دسَه دوئِمَ اژ مِحبت هُنَ مَهَن، مَذانِن گه مِه وَه خاطر دَفاع اژ انجیل نیریامَس اَر ایرَه.

¹⁷ اَ دسَه اولَ اژ حرصی گه اژ خودخواهیَ مسیح موعظَه مَهَن، نه اژ نیّت خو بلکِم هانِ فگِر یَگه مِن اِنوم زندو عذاو بیَن.

¹⁸ گه چَه بو؟ مِهم یَسَ گه اژ هَر رئی‌ای، چه وَه نیّت دُریس چه نادُریس، مسیح موعظَه ماو، ئو مِه وَه خاطر یَه خَوشالِم. اَاَ، ئو هَنی خَوشالیَ مَهَم.

¹⁹ اَرِیَگه مَذانِم گه وَه دوعائَل هُمَه ئو یاری روحِ عیسی مسیح، یَه باعث نجاد مِنَ ماو.

²⁰ هُنَ گه وَه شوقا چیَمَ‌رئیِم ئو امید دیرِم گه اِ هُیچی خجالتا نوئم، بلکِم اِسگِه‌یشَ اِجور همیشَه وَه جورَت کامل، مسیح اِنوم لار مِه جِلالَ مَگِری، چه وَه زِنِه‌ی چه وَه مرگ.

²¹ اَرِیَگه اَرِه مِه زِنِه‌ی مسیحَ ئو مِردِن فادَه.

²² اَرّ باس اِنوم لار زِنِه‌ی بِهَم، یَه اَرِه مِه کاری کَ گه ثمر دیری. وَه ایی حالا نِمَذانِم کُمینو اِنتخاو بِهَم.

²³ مِن اِنومجا یوئنَ گیرِم کِردیَ. آواخد ووژِم یَسَ گه اژ ایی دنیاءَ بِچِم ئو وَه‌گَرد مسیح بوئم، اَرِیَگه یَه فِرَه بیتِرَ.

²⁴ مِنتائای مَنِنِم اِنوم جسم اَرِه هُمَه ضروری‌تِرَ.

²⁵ اَرِیَگه مِه وَه یَه اطمینو دیرِم، ئو مَذانِم گه زِنیَ مَمینیم ئو اَرِه تَرَخدی ئو خَوشیتو اِنوم ایمو مَمینِمَ گَردتو.

²⁶ تاگَه وَه خاطر اِدوارَه هاتِنِم اَرِه تک هُمَه، افتخارتون اِنوم مسیح وَه خاطر مِه ویشتِرِ ویشتِرا بو.

²⁷ فَخَد بِیلِن اِ زِنِه‌یتو رفدارتو لائق انجیل مسیح بو، تاگَه چه مِه بام ئو هُمَه بوئینِم چه نوئم، اِبارَه هُمَه بشتوئِم گه سفدِسخد اِ یِه روح هوسیاینونَ، وَه یِه فگِر، شونَ شو یَکتِری اَرِه ایمو انجیل تقِلاءَ مِهِینو.

²⁸ ئو اِ هُیچی اژ کسَلی گه هان اَرضدتو زِلَتو نِمَچو. یَه اَرِه اُوُ نشونَه آشگاری اَرِه نابودیونَ، مِنتائای نشونَه نجاد هُمِئَه، ئو یَه اژ جونِم خداءَ.

²⁹ اَرِیَگه ایی افتخارَ بیَسَ نَصُیتو گه نه فَخَد ایمو بارینون‌ اَر مسیح بلکِم اَرِه او عذاویش بِکیشینو،

³⁰ هُمِه‌یش هاینونِ هَراَ جنگ‌اِرَ گه دیتو مِنِ گیر بیمی ئو اِسگَه مَشتوئینو گه هَنی هامِ گیر.