فیلیمون 1 - کتاب مقدس به زبان لکی - گویش مرکزی1 اژ پولُس، گه وَه خاطر مسیحْ عیسی ها زندون‌اِر، ئو بِرامو تیموتائوس، وَه هُمکار عزیزمو فیلیمون، 2 وَه خُیَه‌مو آپْفیا ئو هُم‌قطارمو آرخیپوس، ئو وَه کلیسای گه ها نوم مالت‌اِر: 3 فیض‌وسِلامتی اژ جونِم خدا، باوَه آسمونیمو، ئو خداون عیسی مسیح اَر هُمَه بو. مِحبت ئو ایمو فیلیمون 4 مِه وخدی اِ دوعائَلمَ مارِمتَ ویر، هَر شگِر خدامَ مَهَم. 5 اَرِیَگه اِبارَه مِحبت ئو ایمونی گه اَر خداونمو عیسی ئو کُل ایمودارَل مسیح دیرین، مَشتوئِم. 6 دوعام یَسَ گه شریک بیئینِت اِنوم ایمو، اَرِه شناخت کامل هر چی خوئی گه وَه خاطر مسیح ها نوم ایمِه‌اِر وَه کار بای. 7 اَرِیَگه اِاِ بِرا، مِحبت تو خَوشی ئو دلگرمی فِرِه داسی‌ئونِم، اَرِیَگه دلَل ایمودارَل مسیح وَه‌سونگَ تو گیو تازه‌ئونی گِرتیَ. خواهشد پولُس اَرِه اونیسیموس 8 اِسَه وَه‌یاآگه اِنوم مسیح زِلَه مَهَم گه فِربونت‌ئون دَم اَ چیئَه گه لازمَ، اَنجوم دِین، 9 وَه ایی حالا وَه خاطر مِحبت، بیتِرَ مَذانِم گه خواهشد اَژی بِهَم. اِسَه مِه، پولُس، گه ریش‌اَسبی‌ای کِم ئو اِسگِه‌یشَ وَه خاطر مسیحْ عیسی هامِ زندون‌اِر، 10 اِبارَه آویلِم اونیسیموس گه اِنوم زندو بیمَسیَ باوَه، خواهشد اَژینَ مَهَم. 11 او وِرِکار اَرِه تو فادَه ناآشدی، مِنتائای اِسگَه هم اَرِه تو، هم اَرِه مِه فادَه دیری. 12 مِه کِلَ‌مَهَمیَ دُما اِرَه تک تو، هَماری هِرَنگ دلِم کِلَ‌مَهَم. 13 مِهِستِم بِیلمی اَرتَک ووژِم تاگَه اِ ایی مِدتی گه وَه خاطر انجیل هامِ زندون‌اِر، اِجال تو خِلمَتم اَژی بِهِه. 14 مِنتائای نِهِستِم کارمی بی‌رضائَت تو کِردوئی، تاگَه خوئی کِردِنِت وَه میل ووژِت بو نه وَه مجبوری. 15 اَرِیَگه هایتِر هِرِ ایی خاطرَ اَرِه مِدتی اژ تو جیاآ بی، تاگَه اَرِه همیشَه گِلابیری اِرَه تَکِت. 16 مِنتائای دیَر نه اِجور خُلُم، بلکِم ویشتِر اژ یِه خُلُم، اِجور بِرا عزیزگرامی‌ای. او اَرِه مِه فِرَه عزیزَ، مِنتائای چَنی ویشتِر اَرِه تو، هم اِ جسم، هم اِ خداون. 17 اِسَه اَرّ مِنَ رِقیف ووژتَ مَذانین، هَرهُنَ گه مَچینِ گِرد مِه، بِچوءِ گِرد او. 18 اَرّ گَنی‌ئون کِردینِ، یا چیئی بِدیکار تونَ، بِنتی اَر حساو مِه. 19 مِه، پولُس، وَه دسخط ووژمَ مَنُیسِنِم گه تِلافَتیَ میَمیَ دُما -اَلوَت یَه نوشِم گه تو جُ‌جُ گیون‌یشِت بِدیکار مِنین. 20 اَاَ، اِاِ بِرا، آواخدِم یَسَ اِنوم خداون، نفعی اژ تو برَسیَ مِه؛ اِسَه گیون مِن اِنوم مسیح تازه‌آ کَ. 21 مِه وَه اطمینونی گه اژ فِربو بِردِنِت دیرِم، یَتَ اَرِنَ مَنُیسِنِم، اَرِیَگه مَذانِم جُ‌جُ ویشتِر اژ اَویشَ گه موشِم، مِهِین. 22 اِلاحِدَه، اُتاقمی اَرِه تیارِک بوئین، اَرِیَگه امیدَوارِم وَه خاطر دوعائَلتو، خدا وَه لِفط ووژ مِه باریَ دُما اِرَه تک هُمَه. 23 اِپافْراس، هُم‌زندونی مِن اِ مسیحْ عیسی، سِلامت‌ئونَ مَرَسِنی. 24 هَمیش هُمکارَلِم، مَرقُس، آریستارخوس، دیماس ئو لوقا سِلامت‌ئونَ مَرَسِنِن. 25 فیض خداون عیسی مسیحَ گَرد روحِ هُمَه بو. |
@ 2024 Korpu Company