مَرقُس 16 - کتاب مقدس به زبان لکی - گویش مرکزی

زِنیا بیئِن عیسی

¹ وخدی روژ شَمَه مقدّس تموم بی، مریم مَجدَلیَّه ئو مریم، دا یعقوب ئو سالومَه، ادویَه‌لی گه اَرِه کفنِ‌دفن مِردیَل اِ کارونَ ماوِرد خِرییو، تاگَه بِچِن ئو جنازَه عیسی آمادَه کَن.

² اَسَه اِ اوّلین روژ هفتَه، وِرِصو، وخدی هویَر داتی، ویرِ لَحَک کَتِنِ رئی.

³ اونَل وَه یَکتِریونَ موئِت: «کی بَردِهَه اِوَر لَحَک اَرِنمو پِلَ مِ؟»

⁴ وخدی سِیلو کِرد، دییو اَ بَردَ گه فِرَه کَلِنگ بی، اِوَر لَحَک پِل هُاردیَسی.

⁵ اَسَه چِن اِنوم لَحَک، پیا جِهالونی دی گه نیشتوئیِ لا راسا ئو چوخا اِسبی‌ای اِوَر بیتی. وخدی اوُ دی زِلَ‌تِراقا بین.

⁶ پیا جِهالَ وِتیَ بینو: «زِلَتو نَچو. هُمَه هاینونِ فِتِراخ عیسیِ ناصری گه کیشیون اَر صلیب. او زِنیا بیَ ئو اَر ایرَه نیَ. سِیل کَن اَر جای گه جنازه‌ئو نائی.

⁷ اِسگَه، بِچِن ئو بوشِنَ پطرس ئو شاگردَل عیسی، گه او وِر اژ هُمَه مَچو اَرِه هیال جلیل؛ اَر اورَه موئینینونی، هَراَ جورَ گه وِرِکار وِتیَ بینتو.»

⁸ اَسَه ژِنَل هاتِنَ دِریر، ئو اژ لَحَک حِیواین، اَرِیَگه کَتوئینِ رِکَه ئو سرون اَری شویائی. اونَل وَه هُیچ‌کس چیئونی نوئت، اَرِیَگه زِلِئونَ مَچیا.

⁹ وخدی عیسی صوشفق اِ اوّلین روژِ هفتَه زِنیا بی، اول ظاهر بی اَر مریم مَجدَلیَّه گه اَژینی هفت مِلاکَت کِردوئیتیَ دِریر.

¹⁰ مریم‌یش چی ئو خَوَر داءَ شاگردَل عیسی گه عازیَتی بین ئو مَگیریان.

¹¹ مِنتائای اونَل وخدی شنَفتو گه عیسی زِنیا بیَ ئو مریم او دیَسی، باوارو نَهَرد.

¹² دُما اَوَه، عیسی ووژ وَه جوری‌تِر ظاهر کِردی اَر دو نفر اَژینو گه مَچیان اَرِه نوم آبادی.

¹³ اَ دوءَ گِلوناهُاردِ دُما ئو ایی خَوَرونَ داءَ کسَلی‌تِر، مِنتائای قصَه اون‌یشو باوار نَهَرد.

¹⁴ اَسَه وخدی اَ یازَه نفرَ داشدو خوراکونَ مَهُارد، عیسی ظاهر بی اَرینو، ئو خِض کِردی اَر اونَل وَه خاطر سنگدلی ئو بی‌ایمونیو، اَرِیَگه قصَه کسَلی گه عیسی‌ئو دُما زِنیابیئِنی دوئی، باوارو نَهَرد.

¹⁵ اَسَه وِتیَ بینو: «بِچِن اَرِه سِرُسَر دنیا ئو ایی خَوَر خَوش انجیلَ اِلوم کَن اَر کُل مردِم دنیا.

¹⁶ هر کی ایمو باری ئو خُسِل تیَمید بِگِری، نجادَ مَگِری. مِنتائای هر کی ایمو ناری، مَکومَ ماو.

¹⁷ ئو ایی نشونه‌لَ ها گَرد ایمودارَل: وَه نُم مِه مِلاکَتَل مَهَنَ دِریر ئو وَه زوئونَل جدیدی قصَه مَهَن

¹⁸ وَه دَسَلو مارِلَ مَگِرِن، ئو اَر ژیَر بیرِن، ضِرَدیَ بینو نِمَرَسی، ئو دَسَ مَنِن اَر قِ مریضَل ئو اونَل شِفا مَگِرِن.»

¹⁹ اَسَه عیسیِ خداون دُما یَگه ایی قصه‌لَ وِتیَ بینو، ویر آسمو بَریا، ئو نیشت اَر دس راس خدا.

²⁰ اونَل چِنَ دِریر، ئو اَر کُل جا موعظَه‌ئونَ مَهَرد، ئو خداون وَه‌گَردو کارَ مَهَردی ئو پِغوم اونَل وَه نشونَه‌ل ئو مُجِزَه‌لی گه وَه‌گَردو بی، ثابتَ مَهَردی.