مَرقُس 13 - کتاب مقدس به زبان لکی - گویش مرکزینشونَهل آخِر زَمو 1 وخدی گه عیسی اژ معبدَ ماهاتَ دِریر، یَکی اژ شاگردَلی وِتَ بی: «استاد سِیل کَ! عَجو بَردَل ئو عَجو ساخدِمونَلی کِن!» 2 عیسی وِتَ بی: «کُل ایی ساخدِمونَل کَلِنگَ موئینین؟ بَردی اِ سر بَردی‌تِر نِمَمینی اَر جا بلکِم کُلَ مَرِمی.» 3 وخدی عیسی نیشتوئی اَر رُی کوی زِتو رویِرُی معبد، پطرس ئو یعقوب ئو یوحنا ئو آندریاس اِ خلوت اَژینو پِرسی: 4 «بوشَ ایمَه کِ ایی اتفاقِلَ مَکُوءِ ئو نشونَه چَسی وخدی میا کُل یوئنَ اَنجوم بِگِری؟» 5 عیسی وِتیَ بینو: «حُواستو بو تاگَه کسی اژ رئیتون‌اِر ناری. 6 فِرَه کسَل وَه نُم مِنَ مان، موشِن، ”مِه هَر اَوِمَ“ ئو فِرَه کسَل اژ رئی‌اِرَ مارِن. 7 وخدی اِبارَه جنگلَ مَشتوئینو ئو خَوَر جنگلَ مَرَسی گوشتو، هِراسو نوئن. هُنَ اتفاقَلی باس بِکُوءِ، مِنتائای آخِرکار هَنی نَرَسیَ. 8 قومی اَرضد قومی‌تِر ئو مملکتی اَرضد مملکتی‌تِر هیزَمَگِری. زمی‌لرزَه اِنوم جائَلی‌تِرَ مای ئو قیَطیِلَ ماو. مِنتائای کُل یوئنَ فَخَد بِنیا ژُ گِرتِنَ. 9 «ئو مِنتائای هُمَه حُواستون اَر ووژتو بو، اَرِیَگه اونَل هُمَه میَنَ گیر محکمَه‌ل ئو اِ عَبادتگائَل وَه شلاخَ میَن اَرینتو ئو وَه خاطر مِه موسینونِ نوا والیَل شیَر ئو پاتِشائَل تاگَه شاتی بِینو. 10 اول باس ایی خَوَر خَوش پاتِشائی خدا اِلوم بو اَر کُل قومَل. 11 اِسَه هر وخد بیَنَ قاپتونا ئو بِکیشِنتونِ محکمَه، اژ وِرِکار، دلتو اِ هول ناو گه چَه بوشینو، بلکِم هَراَ وخدَ اَ چیئَه گه باس بوشینو میَنَ بینتو، تاگَه اَوَه بوشینو؛ اَرِیَگه اَ کسَ گه قصَه مِهِه هُمَه نیئینو بلکِم روح‌القدسَ. 12 بِرا، بِرای ئو باوَه، اولادی مِئَه کُشت. آیلَل اَرضد باوَه‌‌دا هیزَمَگِرِن، اونِلَ میَنَ کُشت. 13 کُل وَه خاطر نُم مِه اَژینتو بیزارَ موئن؛ مِنتائای هر کی تاگَه آخِر پایار بِمینی نجادَ مَگِری. 14 «مِنتائای وخدی اَ ’کفارت‌دار نابودکَری‘ گه دانیالِ پِخَمَر اَژی وِتوئی، اَر جای گه نَباس، وَه هوسیا بوئینینو، -اَ کسی گه یَه مَحیوَنی حُواس بوتی- اَسَه اونَلی گه هانِ یهودیَه، بِحوانِ کویَل؛ 15 ئو هر کی اِسَر بُ مال بو، اَرِه هیزدائِن چیئی، ناءَ هُار ئو نَچو اَرِه مال؛ 16 ئو هر کی گه اِسَر زَمی بو، اَرِه هیزدائِن چوخا ووژ گِلانیری اَرِه مال. 17 هِرّو اَرِه ژِنَلی گه لَمو پِرَ ئو دالی گه آویلَ‌شیرِن! 18 دوعا کَن گه ایی چیئِلَ اِ زِمِسو ناو. 19 اَرِیَگه اِ اَ روژِلَ هُنَ مِصیوَتی ماو گه اِجور اَوَه، اژ اَ اول دنیا گه خدا خَلک کِردیِ تاگَه اِسگَه اتفاق نَکَتیَ ئو هرگِس‌یش نِمَکُوءِ. 20 ئو اَرّ خداون اَ روژِلَ کُئلا نِمَهَردی، هُیچ اِنسونی گیو آزا اِدَر نِموئردی. مِنتائای وَه‌سونگَ آمَلی گه دیاری بینَ، ئو ووژ اِنتخاو کِردِنِ، اَ روژِلَ کُئلا کِردیَسی. 21 اِ اَ زمونَ، اَرّ یَکی وَه هُمَه بوشی: ”سِیل کَ، مسیحی گه باس بای هار ایرَه“، یاگَه ”سِیل کَ، او هار اورَه!“ باوار نَهَن. 22 اَرِیَگه مسیحَل ئو پِخَمَرَل دِروزِنِ آشگارَ موئن، نشونَه‌ل ئو مُجِزَه‌ل اَنجومَ میَن تاگَه اَرّ بو، کسَلی گه دیاری بینَ اژ رئی اِربارِن. 23 اِسَه حُواستو بو، اَرِیَگه وِرِکار، کُل یوئنَمَ وِتیَسَ بینتو. 24 «مِنتائای اِ اَ روژِلَ، دُما اَ مِصیوَتَ، «”هویَر تیَریکا ماو ئو مُنگ دیَر نُیر نِمِ. 25 آسارَه‌ل اژ آسمونَ مَرِشِن‌اِرا، ئو قدِرتَل آسمونَ مانِ رِکَه.“ 26 اَسَه مردِم کُر اِنسونَ موئینِن گه وَه قدِرت ئو جِلال کَلِنگی اَررُی اُرِلَ مای. 27 او فریشدَه‌ل کِلَ‌مِهِه ئو آمَلی گه ووژ دیاری کِردِنِ اژ چوار سویک دنیا، اژ ایی سر زَمی تاگَه اَ سر آسمو جیَمَ مِهِه اَر دور یَک. 28 «اِسگَه، اژ دار انجیر ایی تیَلیمَ آبِگِرِن: وخدی گه پَلَلی چِخِر داتی، وَلگَ مِ، مَذانینو گه تاوِسو نزیکَ. 29 هَرهُنَ، وخدی بوئینینو گه ایی چیئِلَ اتفاقَ مَکُوءِ، مَفیَمینو گه پاتِشائی خدا نزیکَ، بلکِم هار دِراخِل. 30 حخیختاً، موشِمَ بینتو گه تا یوئنَ کُل اتفاق نَکُوءِ، ایی نسِلَ اژ بِن نِمَچو. 31 آسمون ئو زَمی اژ بِنَ مَچو، مِنتائای قصَه‌ل مِه هرگِس اژ بِن نِمَچو. روژ ئو ساتی گه مسیحَ مای کسی نِمَذانی 32 «مِنتائای هُیچ‌کس اَ روژ ئو ساتَ نِمَذانی بِخِر اژ باوَه؛ جُ‌جُ فریشدَه‌ل آسمو ئو کُریش خَوَر اَژی نِرِنی. 33 اِسَه حُواستو بو ئو بِمینِنَ خَوَر اَرِیَگه نِمَذانینو اَ زمونَ کِیَ مَرَسی. 34 اِجور کسی کَ، گه چیَسَ سفر ئو وخدی گه میا بِچوءَ سفر، مال ووژَ مِئَه دس خذمتکارَلیا، ئو وَه هرکُمو کاری مَسپاری، ئو فِربونَ مِئَه قلااوریش گه بِمینیَ خَوَر. 35 اِسَه هُمِه‌یش بِمینِنَ خَوَر اَرِیَگه نِمَذانینو صائای مال کِیَ مای، شو یاگَه نِصمِ شو، وخدی کِلَه‌شیرَ ماءَ بال یاگَه اِ وِرِصو. 36 تا ناخواد او یِگِلی بای ئو هُمَل اِ خاو بوئینی. 37 اَ چیئَه گه موشِمَ بینتو، وَه کُل کسَ موشِم: بِمینِنَ خَوَر!» |
@ 2024 Korpu Company