مَرقُس 1 - کتاب مقدس به زبان لکی - گویش مرکزییحیی تیَمیددهندَه رئی مسیح آمادَه مِهِه 1 بِنیا خَوَر خَوش اِبارَه عیسی مسیح، کُر خدا. 2 هَرهُنَ گه اِنوم کِتاو اِشعیا پِخَمَر هاتیَ: «اِسگَه رسول ووژِم وِر اژ تو کِلَ‌مَهَم، گه رئیِت آمادَه مِهِه؛» 3 «دَنگ اَوَه گه اِنوم بیاوو مَقارونی: ”رئی خداون آمادَه کَن! رئیَل او راس کَن.“» 4 یحیی تیَمیددهندَه اِنوم بیاوو ظاهر بی، ئو اَرِه مردِم موعظَه مَهَردی گه اَرِه بشخِش گنائَلو خُسِل تیَمید توئَه بِگِرِن. 5 کُل مردِم وِلات یهودیَه ئو کُل مردِم شیَر اورشلیم، چورِّم مَچیان اَرِه تک او، ئو اعترافونَ مَهَرد اَر گنائَل ووژو ئو اِنوم روو اُردن وَه دس او تیَمیدونَ مَگِرت. 6 یحیی جِنِکی اژ پشمِ شتِر مَهَردی‌ِ وَر ئو قِ‌وَن چرمینی مَوَستیِ قِ، ئو قُلَ ئو هَسَل کوئیَ مَهُاردی. 7 او موعظَه مَهَردی ئو موئِتی: «دُما مِه، کسی مای گه تَوُناتِر اژ مِنَ گه جُ‌جُ مِه لائق نیِم بِچَمِم ئو بَن کِلاشَلی واز کَم. 8 مِه هُمَه‌م وَه آو تیَمید داءَ، مِنتائای او وَه روح‌القدس تیَمیدتونَ مِ.» تیَمید عیسی 9 اِ اَ روژِلَ، عیسی اژ شیَر ناصرَه جلیل هات ئو اِنوم روو اُردن وَه دس یحیی تیَمید گِرتی. 10 وخدی عیسی اژ آو هاتَ دِریر، جاوارجا دیتی گه آسمو تاقا بی ئو روحِ خدا اِجور کموتری هاتَ هُار ئو نیشت اَررُی او. 11 ئو دَنگی اژ آسمو رَسی گه «تو کُر عزیزگرامی مِنین ئو تو فِرَه وَه دل مِنین.» عیسی اِنتحونَ ماو 12 روحِ خدا هِرازِه عیسی بِردی اَرِه نوم بیاوو. 13 عیسی چِل روژ اِنوم بیاوو بی ئو شِطو او اِنتحونَ مَهَردی. او وَه‌گَرد حِوونَل وَشی سرَ مَهَردی ئو فریشدَه‌ل خِلمَتون اَژینَ مَهَرد. بِنیا خِلمت عیسی 14 دُما یَگه یحیی‌ئو گِرت، عیسی چی اَرِه هیال جلیل. او خَوَر خَوش پاتِشائی خدا اِلومَ مَهَردی 15 ئو موئِتی: «دیَر وخد رَسیَسی ئو پاتِشائی خدا نزیکَ. توئَه کَن ئو ایمو بارِن اَر ایی خَوَر خَوشَ.» عیسی اوّلین شاگردَل ووژ دَوَتَ مِهِه 16 وخدی عیسی اِلو دریاچَه جلیل ردَ موئیا، شَمعون ئو بِرای آندریاس دیتی گه تورونَ ماوشد اِنوم دریا، اَرِیَگه مایگیر بین. 17 عیسی وِتیَ اونَل: «بورنَ تُرّ مِنا گه هُمَه مَهَمَ صیاد مردِم.» 18 اونَل هِرازِه تورَل ووژو هُیشتون اَر جا ئو وَه تُرّ اوآ کَتِنِ رئی. 19 وخدی عیسی قِری چیِ نواتِر، یعقوب کُر زِبِدی ئو بِرای یوحنا دیتی گه اِنوم قائِق تورَلو گِتِ‌پَرّوءَ مَهَرد. 20 هِرازِه اونَل دَوَت کِردی. اَسَه اُوُ باوَه ووژو زِبِدی وَه‌گَرد عمِلَه‌ل نوم قائِق وِلو کِرد ئو چِنَ تُرّ عیسی‌آ. شِفا پیای گه روحِ گَن داشدی 21 اُوُ چِن اَرِه شیَر کَفَرناحوم. وخدی بیَ روژ شَمَه مقدّس، عیسی هِرازِه چی اِنوم عَبادتگا یهود ئو بِنیا ناتی اَر تیَلیم دائِن. 22 مردِم اژ تیَلیم دائِن او بِلُجوئیو هات، اَرِیَگه وَه قدِرت‌واختیار تیَلیمَ ماتی، نه اِجور مَلِمَل تورات. 23 هَر اَ وخدَ، اِنوم عَبادتگا اونَل پیای بی گه روحِ گَن داشدی. اَ پیا قارونی: 24 «هَه عیسیِ ناصری، اِ ایمَت چا؟ یانی هاتینَ نابودمو کِین؟ مَذانِم تو کیئین! تو هَر اَ قدوسِ خدائینَ!» 25 مِنتائای عیسی تُنا بی اَر اَ روحِ گَنَ ئو وِتی: «دَنگِت نای، اَژینی بوریَ دِریر!» 26 اَسَه روحِ گَن سخد اَ پیا آوشدیِ رِکَه، ئو وَه گالَ‌گال اَژی هاتیَ دِریر. 27 کُل مردِم اَخِنَ بِلُجوئیو هات گه اژ یَکتِریونَ مَپِرسیا: «یَه چِیکَ؟ چه تیَلیم نوو ئو چه قدِرت‌واختیاری! جُ‌جُ او فِربونَ مِئَه روحَلِ گَن ئو اونَل اَژی فِربونَ میَرِن.» 28 اَسَه چیئی طویل نکیشیتی گه اِ سِرُسَر هیال جلیل نُم او کَتِ سر زوئو مردِم. عیسی فِرَه کسَل شِفا مِ 29 عیسی هِرازِه اژ عَبادتگا چیَ دِریر، وَه‌گَرد یعقوب ئو یوحنا چی اَرِه مال شَمعون ئو آندریاس. 30 هَسویرَه شَمعون تُو داشدی ئو کَتوئیِ ژیر جا. اونَل هِرازِه عیسی‌ئو اژ حال او باخَوَر کِرد. 31 اَسَه عیسی چیِ بِلِنگ سر ژِنَهَه ئو دس گِرت، او هیزداتی. تُو قط بیتی ئو بِنیا ناتی اَر مِموداری اَژینو. 32 ایوارَه، دُما یَگه هویَر نیشت، کُل مریضَل ئو آمَل مِلاکَت‌دارو آوِرد اَرِه تک عیسی. 33 مردِم شیَر کُل جیَم بوئین اَر دِراخِل اَ مالَ! 34 عیسی بِری اَژینو گه دچار مِرَضَل جوراجور بین، شِفا داتی ئو هَمیش مِلاکَتَل فِرِه‌ی کِردیَ دِریر، مِنتائای نِمِیشتی قصه‌ی بوشِن، اَرِیَگه مِلاکَتَل مَذِناسدو او کیَ. دوعا عیسی اِ خلوتی 35 صوشفق گه هَنی هُوا تیَریک بی، عیسی هیزگِرتی اژ مال چیَ دِریر، چیَ جا خلوت ئو چَفتی ئو اَر اورَه بِنیا ناتی اَر دوعا کِردِن. 36 شَمعون ئو کسَلی گه وَه‌گَرد بینی، کَتِنَ فِتِراخ او. 37 وخدی کِردونَ دی، وِتونَ بی: «کُل هانَ فِتِراخِت!» 38 عیسی وِتیَ اونَل: «بورِن بِچیم اِنوم آبادیَل ایی هِناسَ تاگَه اَر اوریشَ موعظَه بِهَم، اَرِیَگه هَر وَه خاطر یَه‌آ هاتِمَ.» 39 اَسَه عیسی کَتِ رئی، اِ سِرُسَر جلیل اِنوم عَبادتگائَلو موعظَه مَهَردی ئو مِلاکَتِلَ مَهَردیَ دِریر. شِفا پیا جِذامی 40 پیا جِذامی هات اَرِه تک عیسی، زُنی داتی هَراَ لالکَ‌حُاس وِتی: «اَرّ بِت، مَتونین شِفام بِین.» 41 عیسی دل اَرِه سُتی، دَسی دِریژ کِردی ئو دس نا اَر قِ اَ پیاءَ ئو وِتی: «مِم، شِفا بِگِر!» 42 جاوارجا، جِذام اَژی چِتیَ دِریر ئو شِفا گِرتی. 43 عیسی هِرازِه او مِرخص کِرد ئو قِدَخَن کِردی 44 ئو وِتَ بی: «حُواسِت بو اِبارَه ایی چیئَه وَه کس نوشین؛ بلکِم بِچُ ئو ووژِت نِشو کاهن دَ ئو اَرِه شِفا گِرتِن ووژِت، اَ پیشکَشی گه موسیِ پِخَمَر فِربو دای، تقدیم کَ تاگَه اَرِنو نشونه‌ی بو گه شِفا گِرتینَ.» 45 مِنتائای اَ پیا وخدی چیَ دِریر، اِبارَه ایی چیئَه قصَه کِردی ئو ایی خَوَرَ پَشخا کِردی. اَرِه یَه عیسی دیَر نتونستی آشگارا با اِنوم شیَر، بلکِم مَمَن اِنوم جائَل چَفت ئو دویر اژ شیَر کَتی. وَه ایی حالا، مردِم اِ کُل جا ماهاتِنی اَرِه تک. |
@ 2024 Korpu Company