مَتّی 22 - کتاب مقدس به زبان لکی - گویش مرکزیمتل جَشت داوات 1 عیسی اِدوارَه وَه متلَل قصه‌ئونَ گَرد کِردی، موئِتی: 2 «پاتِشائی آسمون اِجور پاتِشای کَ گه اَرِه کُر ووژ داوات گِرتی. 3 او خِلمتکارَل ووژ کِل‌کِردی تاگَه کسَلی گه دَنگ بوئین، اَرِه جَشت هِنا کَن، مِنتائای اونَل نِهِستو بان. 4 اَسَه خِلمتکارلی‌تِر کِل‌کِردی ئو وِتی: ”وَه کسَلی گه دَنگ بینَ بوشِن اِسگَه، شُمِم حاضر کِردیَ، گا ئو گوَئرَل پروارِم سِرا بِریَ ئو کُل چی حاضرَ. اِسَه بورنَ جَشت داوات.“ 5 مِنتائای اونَل هَمیَتو نا ئو هر کُم مِل رئی ووژو گِرتون ئو چِن، یَکی چی اِرَه سر زَمی ووژ ئو یَکی‌تِرِک‌یش ویرِ کَسمِ‌دَرُمِه ووژ. 6 باقی کسَلی گه دَنگ بوئین، خِلمتکارَل اوُ گِرت ئو وَه بی‌شرمیا وَه گَردو رفدارو کِرد ئو کُشتِنو. 7 پاتِشا آگِر اژ سر چِتی، سَروازَل ووژ کِل‌کِردی ئو اَ خوینیِلَ کُشتی ئو آگِر نا اژ شیَرَلو. 8 اَسَه وِتیَ خِلمتکارَل ووژ: ”داوات حاضرَ، مِنتائای کسَلی گه دَنگ بوئین لائق نوئین. 9 اِسَه بِچِن اِرَه مِدو شیَر ئو هر کَستونی دییا، دَنگ بِهَنیَ داوات.“ 10 خِلمتکارَل چِن اِنوم کویچَه‌ل ئو هر کَسونی کِردَ دی، چه خو ئو چه گَن آوِردونَ گَرد ووژو، هُنَ گه تالار داوات پِرا بی اژ مِمونَل. 11 «مِنتائای وخدی گه پاتِشا هات اِنوم مِجِلیس تاگَه مِمونَل بوئینی، پیای دیتی گه جِنِک داوات اِوَر نوئیتی. 12 اَژی پِرسی: ”اِاِ رِقیف، چطور وَه بی‌جِنِک داوات هاتینَس اَرِه ایرَه؟“ اَ پیا بی‌کِش مَن. 13 اَسَه پاتِشا وِتیَ خِلمتکارَل ووژ: ”دس ئو پا آبوئنِنی ئو باوژِنیَ دِریر اِنوم تیَریکی، جای گه گیری ئو دِنوریچَه هَس.“ 14 اَرِیَگه کسَلی گه دَنگ بینَ فِرَه‌ن، مِنتائای کسَلی گه دیاری بینَ کَمِن.» سؤالِ اِبارَه خِراج دائِن 15 اَسَه شیخَل فرقَه فَریسی چِنَ دِریر ئو نشخه‌ئو کیشی گه چطور وَه قصَه‌ل ووژ باوژِنیِ تِلَه. 16 اونَل شاگردَل ووژونَ گَرد بِری اژ کسَلی گه لا هیرودیسو داشد، کِل‌کِرد اَرِه تک او ئو وِتو: «استاد، مَذانیم پیای کین راس‌وَش ئو رئی خدا وَه دُریسی تیَلیمَ مِین ئو دَروَن عخیدَه کس نیئین اَرِیَگه چیَمت اَر ظاهر نیَ. 17 اِسَه عخیدَه ووژِت بوش‌ئونمو؛ آیا خِراج دائِن وَه امپراطور روم جائزَ یاگَه نه؟» 18 مِنتائای عیسی گه نیّت گَن اونِلَ مَذِناسدی، وِتی: «اِاِ ریاکارَل، اَرِه‌چَه مِه اِنتحونَ مِهِینو؟ 19 سکه‌ی گه وَه اَوَه خِراجَ مِینو، نشونِم دَن.» اونَل سکَه یِه دیناریونی دائون. 20 عیسی اَژینو پِرسیتی: «نَشق ئو نُمی گه هار رُی ایی سکَه، هِن کیَ؟» 21 جوواوُ دا: «هِن امپراطور روم.» وِتی‌ئونو: «اِسَه هِن امپراطور بیَنَ امپراطور ئو هِن خدا وَه خدا.» 22 وخدی یِئونَ شنَفت، بِلُجوئیو هات ئو عیسی‌ئو هُیشتَ جا، چِن. سؤال اِبارَه زِنیابیئِن مِردیَل 23 هَراَ روژَ، شیخَل فرقَه صَدّوقی گه موئِتو مِردیَل زِنیا موئن، هاتنی اَرِه تک ئو سؤالونی اَژی پِرسی، 24 وِتو: «استاد، موسی پِخَمَر وِتیَسی‌ئونمو گه اَرّ پیای بی‌اولاد بِمِری، بِرای باس اَ بیوَه بُوازی تاگَه اژ او نسِلی اَرِه بِرا ووژ بِیلی اَر جا. 25 اِسگَه، اِنوم ایمَه هفت بِرا بین. بِرا اولینِهَه ژَن حُاستی ئو مِرد ئو اَرِیَگه آویل ناآشدی، بیوِهِه‌ی اَرِه بِرا ووژ هُیشتیَ جا. 26 اَرِه دوئِمین ئو سِئِمین، تاگَه هفتِمین بِرائیش هُنَ بیَ. 27 دُماخِرِ، ژِنِهِه‌یش مِرد. 28 اِسَه، اِ قیومت، اَ ژِنَ، ماوَ ژَن کُمین اژ اَ هفت بِرا، اَرِیَگه کُلو اوُ حُاستوئی؟» 29 عیسی جوواوُنا داتی: «هُمَه اشتباءَ مِهِینو، اَرِیَگه نه اژ نُسَخ مقدّس چیئی مَذانینو ئو نه اژ قدِرت خدا! 30 اِ قیومت کسی نه ژَنَ مُوازی ئو نه شویَ مِهِه، بلکِم کُل اِجور فریشدَه‌ل آسمونِن. 31 مِنتائای اِبارَه زِنیابیئِن مِردیَل، مَر اِنوم تورات نَحیوَنتونَ گه خدا چَه وِتیَسی‌ئونتو؟ 32 او فرمائشت کِردیَسی گه، ”مِنِم خداءِ ابراهیم ئو خداءِ اسحاق ئو خداءِ یعقوب“. او خداءِ مِردیَل نیَ، بلکِم خداءِ زِنیِلَ.» 33 مردِم وخدی ایی قصَه‌لونَ شنَفت، اژ تیَلیم او بِلُجوئیو هات. کَلِنگتِرین حکِم 34 مِنتائای وخدی شیخَل فرقَه فَریسی شنَفتو گه عیسی چطور وَه جوواو ووژ دَم شیخَل فرقَه صَدّوقی آبَسدیَسی، جیَم بین اَر دور یَک. 35 یَکی اَژینو گه قاضی بی، وَه ایی نیّتَ گه عیسی اِنتحو کِ، اَژی پِرسی: 36 «اِاِ استاد، کَلِنگتِرین حکِم شریعت کُمینَ؟» 37 عیسی جوواوا داتی: «”خداون خداءِ ووژِت وَه تمومِ دل، وَه تمومِ گیو، وَه تمومِ فگِر ووژِت دوسِت داشدوئی.“ 38 یَه اوّلین ئو کَلِنگتِرین حکمَ. 39 دوئِمین حکم‌یش اِجور حکِم اولینِهِئَه: ”هُمسات اِجور ووژِت دوسِت داشدوئی.“ 40 کُل تورات ئو نُئِشتَه‌ل پِخَمَرَل، اَر ایی دو حکمَ، پایارَ.» مسیحی گه باس بای کُر کیَ؟ 41 وخدی گه شیخَل فرقَه فَریسی جیَم بینَ دور یَکا، عیسی پِرسیتی اَژینو: 42 «عخیدَه هُمَه اِبارَه مسیحی گه باس بای چیَ؟ او کُر کیَ؟» اونَل وِتونَ عیسی: «کُر داوود.» 43 عیسی وِتی: «اِسَه چطور داوود وَه هدائَت روحِ خدا، وَه خداون هِنا مِهِیتی؟ اَرِیَگه اِنوم کِتاو زبور داوودَ موشی: 44 «”خداون وِتیَ خداون مِه: «بِنیش اَر دس راس مِنا تا اَ موقَع گه دشمنَلِت، باوژِمِ ژیر پائلِت.“» 45 اِسَه اَرّ داوود، اوءَ خداون هِنا مِهِه، چطورَ مَتونی کُر داوود بو؟» 46 وَه ایی جورَ، هُیچ کس نتونستی جوواوا دِیتی ئو اژ اَوِءِ دُما دیَر کس زِلَه نَهَردی سؤال اَژی بِپِرستی. |
@ 2024 Korpu Company