مَتّی 17 - کتاب مقدس به زبان لکی - گویش مرکزیعوضبیئِن نوم‌رُی عیسی 1 دُما شَش روژ، عیسی، پطرس ئو یعقوب ئو بِرای یوحنا وَه‌گَرد ووژ هیزداتی ئو بِردِنی اَرِه سر کوی بِلِنگی. 2 اَر اورَه، اَرتَک اونَل، نوم‌رُی عیسی عوض بی: نوم‌رُی‌ای چُی هویَر بِریقَه داتی ئو جِنِکی چُی نُیر، اِسبیا بی. 3 هَرِ ایی حِنَ، موسی ئو ایلیا پِخَمَر اَر وَر چیَمَل اُوُ ظاهر بین گه قصه‌ئونَ گَرد عیسی مَهَرد. 4 پطرس وِتیَ عیسی: «اِاِ آقا، خوءَ گه ایمَه هایم اَر ایرَه. اَرّ بِت، سه کولاءَ ماوژیم، یَکی اَرِه تو، یَکی اَرِه موسی ئو یَکی‌شی اَرِه ایلیا.» 5 هَنی ایی قصَه اِ دَم پطرس بی گه وَه یِگِل اُر بِریقَه‌داری سا آوشدی اَر اونَل ئو دَنگی اژ اُرِهَه رَسی گه: «یَسَ کُر عزیزگرامی مِه گه فِرَه وَه دل مِنَ؛ گوش بِگِرنی‌ئون!» 6 وخدی شاگردَل ایی دَنگونَ شنَفت زِلَ‌تِراقا بین ئو وَه رُیا، کَتن اَر زَمی. 7 مِنتائای عیسی هاتِ وَر ئو دس نا اَر قِئو ئو وِتی: «هیزگِرِن ئو زِلَتو نَچو!» 8 وخدی چیَمَل ووژو وازو کِرد، بِخِر اژ عیسی کَسونی نِئی. 9 وخدی گه اژ کویَ ماهاتِنَ هُار، عیسی فِربو دائونو: «چیتونی گه دی اَرِه کس آنوشِن، تا وخدی گه کُر اِنسو اژ مِردیَل زِنیا بو.» 10 شاگردَل اژ عیسی‌ئو پِرسی: «اَرِه‌چَه مَلِمَل توراتَ موشِن گه اول‌بار باس ایلیا بای؟» 11 عیسی جوواوا داتی: «اَلوَت گه ایلیا مای ئو کُل چیئَل دُریسَ مِهِه. 12 مِنتائای موشِم‌ئونتو گه ایلیا هاتیَ ئو اوُ نشتاسی ئو هر چیونی هِست وَه بینو کِرد. هَر ایی جورَ کُر اِنسون‌یش وَه دس اونَل عذاوَ مَکیشی.» 13 اَسَه شاگردَل فیَمین گه اِبارَه یحیی تیَمیددهندَه قصه‌ئونَ گَردَ مِهِه. شِفا کُر مِلاکَت‌دار 14 حِنی گه هاتِن اِرَه تک جیَمیَت، پیای نزیکا بی اَر عیسی ئو زُنی دا اَر وَر او ئو وِتی: 15 «اِاِ آقا، ریَم کَ اَر کُر مِه. او دل‌تَپَ دیری ئو فِرَه عذاوَ مَکیشی. ویشتِر وخدِلَ مَکُوء اِنوم آگِر ئو آو. 16 اوئِم آوِرد اِرَه تک شاگردَلِت، مِنتائای نتونستو شِفا دَنی.» 17 عیسی جوواو داتی: «اِاِ نسِل بی‌ایمون ئو اَژرئی‌اِرهاتی، تاگَه کِ باس وَه‌گَرد هُمَه بوئم؟ تاگَه کِ باس تیَمِلتو کَم؟ بارنی اِرَه تک مِه.» 18 اِسَه عیسی تُنا بی اَر مِلاکَتِهَه ئو مِلاکَتِهَه اژ کُرِهَه اِرهات ئو او جاوارجا شِفا گِرتی. 19 اَسَه شاگردَل هاتن اِرَه تک عیسی ئو اِ خلوت پِرسیون اَژی: «اَرِه‌چَه ایمَه نتونستمو اَ مِلاکَتَ بِهِیمَ دِریر؟» 20 عیسی جوواوا دانی: «وَه خاطر یَگه ایمونتو کمَ. حخیختاً، موشِم‌ئونتو، اَرّ ایمونی وَه گُجَری دُ خردلتو داشدوئی، مَتونینو بوشینونَ ایی کویَ ”اژ ایرَه جاواز بو اَر اورَه“ ئو جاوازَ ماو، ئو هُیچ کاری اَرِه هُمَه مِحال نیَ. 21 [مِنتائای ایی جنس مِلاکَتَ نِمَچوءَ دِریر مَر وَه روژی گِرتِن ئو دوعا کِردِن.]» عیسی اِدوارَه مرگ ئو زِنیابیئِن ووژ پیشگوئیَ مِهِه 22 حِنی گه اِ جلیل اِ دور یَکا جیَم بین، عیسی وِتی‌ئونو: «کُر اِنسو وَه دس مردِم تسِلیمَ ماو. 23 ئو اونَل مَکُشِنی ئو او اِ روژ سِئِم زِنیا ماو.» شاگردَل فِرَه پَژارا بین. سکَه اِنوم دَم ماهی 24 دُما یَگه عیسی ئو شاگردَلی رَسین اَر شیَر کَفَرناحوم، مأمورَلی گه مالیات معبد یهود، گه دو دِرهَم بیو، جیَمَ مَهَرد، هاتِن اِرَه تک پطرس ئو وِتو: «یانی استاد هُمَه مالیات معبد نِمِ؟» 25 او جوواوا داتی: «اَلوَت گه مِ!» حِنی گه پطرس هاتَ نوم مالا، وِر اژ یَگه او چیئی بوشی، عیسی وِتون: «اِاِ شَمعون، پاتِشائَل دنیا اژ چه کسَلی خِراج یا مالیاتَ مَسینِن؟ اژ آیلَل ووژو یاگَه اژ بیگونَه‌ل؟ چَه موشین؟» 26 پطرس جوواوا داتی: «اژ بیگونَه‌ل.» عیسی وِتون: «اِسَه آیلَل مُعافِن! 27 مِنتائای اَرِیَگه اونَل نَرَنجِنیم، بِچُ اَرِه لو دریاچَه ئو قُلاوی باوژ. اول مایتی گه گِرت دَم واز کِیتی، سکَه چوار دِرهَمی مِهِینَ دی. بیَر مِن ئو ووژت وَه اَوَه ب‌ِئونو.» |
@ 2024 Korpu Company