یوحنا 3 - کتاب مقدس به زبان لکی - گویش مرکزی

تو باس اژ نوو زاندَه بوئین

¹ پیای بی اژ شیخَل فرقَه فَریسی، نیقودیموس نُم اژ کَلِنگَل یهود.

² او یِه شو یِهات اَرِه تک عیسی ئو وِتَ بی: «استاد، مَذانیم تو مَلِمی کین گه اژ جونِم خدا هاتینَ، اَرِیَگه هُیچ‌کس نِمَتونی ایی مُجِزَه‌ل ئو نشونَه‌لی گه تو اَنجومَ مِین اَنجوم دِ، مَر یَگه خدا وَه‌گَرد بوتی.»

³ عیسی جوواو داتی: «حخیختاً، موشِمَ بینِت، تا کسی اژ نوو زاندَه ناو، نِمَتونی پاتِشائی خدا بوئینی.»

⁴ نیقودیموس وِتَ بی: «کسی گه پیرَ، چطورَ مَتونی زاندَه بو؟ یانی مَتونی اِدوارَه گِلابیریِ لَم دای ئو باءَ دی؟»

⁵ عیسی جوواو داتی: «حخیختاً، موشِمَ بینِت تا کسی اژ آو ئو روحِ خدا زاندَه ناو، نِمَتونی با اِنوم پاتِشائی خدا.

⁶ اَ چیئَه گه اژ جسم زاندَه بو، جسمونیَ؛ ئو اَ چیئَه گه اژ روحِ خدا زاندَه بو، روحانیَ.

⁷ بِلُجوئیِت نای گه وِتِم باس اژ نوو زاندَه بوئینو!

⁸ وا هر جا بِیتی مَچو؛ دَنگَ مَشتوئینی، مِنتائای نِمَذانین اژ کوءَ مای ئو ویرِ کوءَ مَچو. هر کسی‌شی گه اژ روحِ خدا زاندَه بو، هُنَسَ.»

⁹ نیقودیموس اژ عیسی پِرسیتی: «هُنَ چیئی چطورَ ماو؟»

¹⁰ عیسی جوواو داتی: «تو مَلِم اسرائیلین ئو ایی چیئِلَ نِمَفیَمین؟

¹¹ حخیختاً، موشِمَ بینِت گه ایمَه اژ اَ چیئَه گه مَذانیم قصَه مِهِیم ئو اَر اَ چیئَه گه دیمونَ شاتیَ مِیم، مِنتائای هُمَه شاتی ایمَه قبول نِمِهِینو.

¹² اَرّ وخدی گه اِبارَه چیئَل زمینی وَه‌گَرد هُمَه‌م قصَه کِرد باوارتو نَهَرد، چطور اَرّ اژ چیئَل آسمونی اَرِنتو بوشِم باوارَ مِهِینو؟

¹³ هُیچ‌کس ویرِ آسمو نَچیَسِ بِلِنگ، مَر اَوَه گه اژ آسمو هاتیَسَ هُار، یانی کُر اِنسو [گه ها نوم آسمون‌اِر].

¹⁴ هَرهُنَ گه موسی اَ مار برنجیَ اِنوم بیاوو کوئیتی اَر تُک چوآ ئو علم کِردی کُر اِنسون‌یش باس علم بو،

¹⁵ تا هر کی ایمو باری اَر او، ژییاین ابدی داشدوئیتی.

¹⁶ «اَرِیَگه خدا اَخَ مِحبت کِردی اَر دنیا گه کُر یَکونَه ووژ داتی تا هر کی ایمو باری اَر او نابود ناو، بلکِم ژییاین ابدی داشدوئیتی.

¹⁷ اَرِیَگه خدا کُر ووژ کِل‌نَهَردی‌ اَرِه دنیا تا دنیا مَکوم کِ، بلکِم کِل‌کِردی تاگَه دنیا وَه‌سونگَ او نجاد بِگِری.

¹⁸ هر کی ایمونَ بی دیرِتی مَکوم نِماو، مِنتائای هر کی ایمونَ بی نِرتی، هَراِسگَه مَکوم بیَ، اَرِیَگه ایمو ناوِردیَسی اَر نُم کُر یَکونَه خدا.

¹⁹ ئو حکِم یَسَ گه نُیر هات اِنوم دنیا، مِنتائای مردِم تیَریکیو ویشتِر اژ نُیر دوس داشد، اَرِیَگه کارَلو گَنَ.

²⁰ اَرِیَگه هر کی گه کارَل گَنَ مِهِه اژ نُیر بیزارَ ئو نِمای اَرِه تک نُیر، تاناخواد کارَل آشگار بوتی ئو رُسبا بو.

²¹ مِنتائای اَوَه گه اَ چیئَه گه دُریسَ اَنجومَ مِ، ما اَرِه تک نُیر تاگَه آشگار بو گه کارَلی وَه یاری خدا اَنجوم بیَ.»

آخِرین شاتی یحیی تیَمیددهندَه اِبارَه عیسی

²² دُما اَوَه، عیسی ئو شاگردَلی چِن اَرِه آبادیَل هیال یهودیَه. او مِدتی وَه‌گَرد اونَل مَن اَر اورَه ئو مردِم خُسِل تیَمیدَ ماتی.

²³ یحییِ پِخَمَریش اِ آبادی عِیْنون، هِناس شیَر سالیم، تیَمیدَ ماتی، اَرِیَگه اَر اورَه آو فِرَه بی ئو مردِمَ ماهاتِن، تیَمیدونَ مَگِرت.

²⁴ یَه وِر اژ اَوَه بیَ گه یحیی بِکُوءِ زندو.

²⁵ اِسگَه، اَر سر آداو پاک کِردِن چیئَل نِجس بَثی کَت اِنوم شاگردَل یحیی ئو یِه یهودی.

²⁶ اَسَه هاتن اَرِه تک یحیی، وِتونَ بی: «استاد، اَوَه گه اِ اَکو روو اُردن وَه‌گَردِت بی، ئو تو اَر او شاتیِت دا، اِسگَه ووژ تیَمیدَ مِ ئو کُلَ مَچِنی اَرِه تک.»

²⁷ یحیی جوواو داتی: «هُیچ‌کس نِمَتونی چیئی باریَ دس، بِخِر اژ اَ چیئَه گه خدا بوئَشخِنتیَ بی.

²⁸ هُمَه ووژتو شاتینو گه مِه وِتِم مسیحی گه باس بای نیِم، بلکِم وِر اژ او کِل‌بیمَ.

²⁹ بُئی هِن ذُماءَ، مِنتائای رِقیف ذُما گه هوسیاءَ دَنگ اوءَ مَشتوئی، اژ شِنَفتِن دَنگ ذُما خَوشالی فِرِه‌ی مِهِه. اِسَه خَوشی مِن‌یش هُنَ کامل بیَ.

³⁰ او باس کَلِنگا بو ئو مِه باس گُجِرا بوئم.

³¹ «اَوَه گه اژ بِلِنگَ مای، هار بِلِنگ کُل چی، مِنتائای اَوَه گه اژ زمینَ، زمینیَ ئو اژ چیئَل زمینی قصَه مِهِه. اَوَه گه اژ آسمونَ مای، هار بِلِنگ کُل چی.

³² او اَر هر چیئی گه دیَسی ئو شنَفتیَسی شاتیَ مِ، مِنتائای هُیچ‌کس نِمَچوءِ گِرد شاتی او.

³³ اَوَه گه مَچوءِ گِرد شاتی او، میر تاییدَ مِ اَر یَگه خدا حخیختَ.

³⁴ اَرِیَگه اَ کسَ گه خدا کِل‌کِردیَ، کلوم خداءَ موشی، اَرِیَگه خدا روحِ ووژ بی‌حدَ موئَشخِنِتیَ بی.

³⁵ باوَه آسمونی، کُر دوس دیری ئو کُل چی سپارتیَسیَ دس اوآ.

³⁶ اَوَه گه ایمو دیری اَر کُر، ژییاین ابدی دیری؛ مِنتائای اَوَه گه فِربون اژ کُر نِمیَری، ژییاین نِموئینی، بلکِم خَضو خدا مَمینِتی اَررُی.»