یعقوب 4 - کتاب مقدس به زبان لکی - گویش مرکزیتسِلیم خداون بوئن 1 ایی قی ئو مِرافَه اژ کوءَ مَکُوء اِنومتو؟ مَر یَه خواهشدَل نَفستو نیَ گه اِنومتو هانِ مِرافَه، 2 هُمَه اِ تَمارزو چیئی کینو ئو نِرینو، اِسَه آمَ مَکُشینو. طَما دیرینو، مِنتائای نِمَتونینو وَه دس بارینو، اِسَه وَه‌گَرد یَک قی ئو مِرافَه مِهِینو. هُمَه نِرینو اَرِیَگه اژ خداتو نِمِ. 3 هُمَه اژ خدا مِتو ئو وَه دس نِمارینو، اَرِیَگه وَه نیّت گَنَ مِتو تاگَه خرج عِیاشیَل ووژتو کِینو. 4 اِاِ آمَل زِنهاکار، یانی نِمَذانینو گه دوسی وَه‌گَرد دنیا، دشمنی وَه‌گَرد خداءَ؟ اِسَه هر کی مِیتی رِقیف دنیا بو، ووژَ مِهِئَه دشمن خدا. 5 یا گُمونَ مِهِینو اَ نسخَه مقدّسَ گه وِتیِ: «خدا اَرِه اَ روحی گه ناسی اِنوم ایمَه، خیرَت فِرِه‌ی دیری»، یَه اَرِه ووژَ موشی؟ 6 مِنتائای فیضی گه خدا موئَشخیَ بینتو، ویشتِر اژ یَسَ. اِسَه اِنوم امثال سلیمانَ موشی: «خدا موسی اَر نوا آمَلی گه وَه ووژونَ مَنازِن، مِنتائای وَه آمَل فِروتن، فیضَ موئَشخی.» 7 اِسَه تسِلیم خدا بوئن. بوسِن اَر نوا ابلیس، تاگَه اَژینتو بِحوای. 8 نزیک خدا بوئن گه خدایش نزیکتونَ ماو. اِاِ گناکارَل، دَسَلتو اژ گنا بشورِن ئو اِاِ آمَل دودل، دلَلتو پاکا کَن. 9 بیَنَ نوم سر ووژتو ئو هَری بِگِرِنِ سر ئو بگیرِن. خَنَه هُمَه بوءَ چَمَر ئو خَوشی هُمَه بوءَ خَم. 10 اِ درگا خدا فِروتن بوئن تاگَه هُمَه سربِلِنگ کِ. 11 اِاِ بِرال، اژ گَنی یَکتِری نوشِن. کسی گه اژ گَنی بِرا ووژ بوشی یاگَه اَر او قضاوت بِهِه، اَرضد شریعت گَن وِتیَسی ئو اَر شریعت قضاوت کِردیَسی. مِنتائای اَرّ هُمَه اَر شریعت قضاوت بِهِینو، دیَر اَوَه نیئینو گه شریعتَ ماریَ جا، بلکِم قاضی اَوینونَ! 12 فَخَد یَکی کَ گه قانونَ مَنی ئو قاضیَ، او هَراَ کسَسَ گه مَتونی نجاد دِ یاگَه نابود کِ. مِنتائای تو کیئین گه هُمسات قضاوت کِین؟ وَه صو ننازِن 13 اِسگَه هُمَه گه موشینو: «ایمِرو یا صو مَچیمون اَرِه فِلون شیَر ئو یِه سالَ مَمینیم اَر اورَه ئو کار ئو کاسبیَ مِهِیم ئو فادَه مِهِیم،» خو گوش بِگِرِن: 14 هَنی هُمَه نِمَذانینو گه صو چَه ماو؛ زِنِه‌یتو چیَ؟ اَرِیَگه اِجور حفاری کینو گه گِری دیارَ ماو ئو گِری‌تِر خِیوَ ماو. 15 اِجال یَه باس بوشینو: «اَرّ خداون بِیتی، زِنیَ مَمینیم ئو اِ ایی جورَ ئو اَجورَ مِهِیم.» 16 اِسگَه هُمَه وَه قُراتیتو افتخارَ مِهِینو. هُنَ افتخار کِردِنی گَنَ. 17 اِسَه هر کی بِذانی چه کاری دُریسَ ئو اَوَه اَنجوم نِ، گنا کِردیَسی. |
@ 2024 Korpu Company