یعقوب 3 - کتاب مقدس به زبان لکی - گویش مرکزیرُم کِردِن زوئو 1 اِاِ بِرال، ناخواد گه ویشتِرتو وَه دُم یَه‌آ بوئینو گه بوئینونَ مَلِم کلوم خدا، اَرِیَگه مَذانینو اَر ایمَه گه تیَلیمَ مِیم، سخدتِر قضاوتَ ماو. 2 اَرِیَگه کُلمو اِ فِرَه چیئَل خطا مِهِیم. اَرّ کسی اِ قصه‌ی گه موشی خطا نِهِه، آم کاملی کَ ئو مَتونی کُل لار ووژیشی رُم کِ. 3 اَرّ ایمَه لَخوم بوئنیمِ دَم اَسبَل گه اژ ایمَه فِربو بیَرِن، کُل لاریشو ویرِ هر لای هدائَتَ مِهِیم. 4 سِیل بِهَن اَر کَشتیَل‌یش وَه‌یاآگه فِرَه کَلِنگِن ئو وَه واهوفَه‌ل رئیَ مَهَن، وَه سُکّان گُجَری، ویرِ هر لای گه ناخدا بِیتی، هدائَتَ موئن. 5 هُنَ، زوئون‌یش یِه عضو گُجَری کَ ئو ادعائَل کَلِنگ کَلِنگی مِهِه. پِریسکَ گُجَری مَتونی آگِر بِنیِ جنگل کَلِنگی. 6 ئو زوئون‌یش آگِری کَ؛ دنیای اژ ناصالح‌بیئین، اِنوم عضا لار ایمَه زوئونَ گه کُل لار آلودَه مِهِه ئو آگِرَ مَنیِ کُل زِنِه‌ی ئو جیَنِمَ گه اَوَه گُرَ مِهِه! 7 کُلِ جور حِوو ئو مَل ئو جونورَلی گه وَه ژیر لَما سُرَ میرِن ئو جونورَل دریا وَه دس اِنسو رُمَ موئن ئو رُم بینَ. 8 مِنتائای هُیچ اِنسونی نِمَتونی زوئو رُم کِ. زوئو شرَباری کَ گه تورَ ئو پِر اژ ژیَری کَ گه مَکُشی! 9 ایمَه وَه زوئو ووژمو خداون ئو باوَه آسمونی شُگِرَ مِهِیم ئو وَه هَراَ زوئونَ مردِمی گه اِجور خدا خَلک بینَ، نُئِرَ مِهِیم. 10 اژ هَراَ دَمَ هم بِرَکتَ ماءَ دِریر هم نُئِر! اِاِ بِرال، هُنَ چیئَلی نَباس بو. 11 یانی ماو اژ یِه کیَنی هم آو شیرین باءَ دِریر هم آو شور؟ 12 اِ بِرال، یانی ماو دار انجیر، زِتو باریَ عمل یا دار انگویر، انجیر بِ؟ هُنِ‌یشَ یِه کیَنی شور نِمَتونی آو شیرین بِ. حکمت اژ آسمو 13 اِنوم هُمَه کیَ گه عاخل ئو فیَمیدَه بو؟ بِیلِن او وَه رفدار خو، کارَل ووژ گه فِروتنی حکمت ها نومو نِشو بِ. 14 مِنتائای اَرّ هُمَه اِنوم دلتو حَسوئی تیَل ئو حرصی دیرینو گه اژ خودخواهیتونَ، وَه ووژتو ننازِن ئو اَرضد حخیخت دِرو نوشِن. 15 هُنَ حکمتی اژ بِلِنگ نِماءَ هُار، بلکِم زمینی ئو نفسونی ئو اژ شِطونَ. 16 اَرِیَگه هر جای گه حَسوئی ئو حرصی گه اژ خودخواهیَ بو، اَر اورَه بی‌نظمی ئو کُلِ جور کار گَنَ ماو. 17 مِنتائای اَ حکمتی گه اژ بِلِنگَ، اول‌بار پاکَ ئو اَسَه طالب صُئلَ ئو نجیمَ ئو پَن گوشَ مَگِری ئو پِر اژ ریَمَت ئو ثمرَل خوءَ ئو دوچیَمکی نِمِهِه ئو راس‌وَشَ! 18 صالح‌بیئین، ثمر بِنَه‌تُئمی کَ گه اِ صُئل ئو صفا وَه دس کسَلی گه طالب صُئلِن، کشتَ ماو. |
@ 2024 Korpu Company