یعقوب 2 - کتاب مقدس به زبان لکی - گویش مرکزیگنا دوچیَمکی کِردِن 1 هُمَه گه وَه خداونمو عیسی مسیح، خداون پِرجِلال، ایمو دیرینو، دوچیَمکی نَهَن. 2 اَرِیَگه اَرّ کسی وَه کِلِکونَه طِلا ئو جِنِک خیمتی با اِنوم مِجِلیستو ئو ژاریشی وَه جِنِک دِریا با اِنوم، 3 ئو اَرّ هُمَه عزّت بِنینون اَر اَ کسَ گه جِنِک خیمتی هایتِ وَر ئو بوشینونَ بی: «بفرما بِنیش اَر بِلِنگ مِجِلیس،» مِنتائای بوشینونَ ژارِهَه: «هَر بوس اَر اورَه!» ئو یاگَه: «ایرَه اَر وَر پال مِه بِنیش اَر زَمی»، 4 یانی وَه ایی کارتونَ اِنوم ووژتو دوچیَمکیتو نَهَردیَ ئو اژ رُی فگِرَل گَن قضاوتتو نَهَردیَ؟ 5 بِرال عزیزِم، گوش بِگِرِن! مَر خدا ژارَل ایی دنیاءَ اِنتخاو نَهَردیِ تاگَه اِ ایمو دولَمَن بوئن ئو بوئنَ وارث اَ پاتِشائیَ گه وَدَه داسیَ دوسدارَل ووژ؟ 6 مِنتائای هُمَه اَر کسی گه ژارَ بی‌عزّتیَ مِهِینو. یانی ثرودمنَل نیِن گه اَر هُمَه ظلمَ مَهَن ئو هُمَه مَکیشِن‌ِ محکمَه؟ 7 یانی یوئنَ هَراَ کَسِلَ نیِن گه وَه نُم خاصی گه خدا ناسی اَررُی هُمَه، کِفِرَ مَهَن؟ 8 اَرّ هُمَه اِراسی اَ شریعت شاهونَه مِطابق نسخَه توراتَ بارینونَ جا، گه موشی: «اِجور گیو ووژِت اَر هُمسات مِحبت کَ،» کار خوتونی کِردیَ. 9 مِنتائای اَرّ دوچیَمکی بِهِینو، گنا مِهِینو ئو شریعت هُمَه وَه تصقیرکارَ مَذانی ئو مَکومتونَ مِهِه. 10 اَرِیَگه هر کی کُل شریعت باریَ جا، مِنتائای یَکی اژ اونَل ناریَ جا، مَکومَ گه کُل شریعت ناسیِ ژیر پا. 11 اَرِیَگه اَوَه گه وِتی: «زِنها نِهَه،» هَمیش وِتیَسی: «آم نَکُش.» اِسَه وَه‌یاآگه زِنها نِهِین، مِنتائای اَرّ آمی بِکُشین، شریعتِت ناسِ ژیر پا. 12 اِسَه اِجور کسَلی قصَه بِهَن ئو رفدار بِهَن گه مَذانِن مِطابق شریعت آزادی، قضاوتَ موئن، 13 اَرِیَگه اَر کسی گه ریَم نَهَردیَسی، وَه بی‌ریَمی قضاوتَ ماو. مِنتائای ریَم اَر قضاوت پیروزَ ماو! ایمونی گه عمل ناآشدوئیتی مِردیَ 14 بِرال، چه فادَه دیری اَرّ کسی بوشی گه ایمو دیری، مِنتائای عمل ناآشدوئیتی؟ یانی هُنَ ایمونی مَتونی او نجاد بِ؟ 15 اَرّ بِرا یا خُیِِه‌ی میتاج جِنِک ئو خوراک هر روژ ووژ بو، 16 ئو یَکی اژ هُمَه بوشی‌ئونو: «بِچِنَ سِلامت ئو گرم ئو سیر بوئینو،» مِنتائای اَرِه نیازَلو کاری نِهِه، چه فادِه‌ی دیری؟ 17 اِسَه ایمون‌یش ووژَ تَنیا اَرّ عمل ناآشدوئیتی مِردیَ. 18 مِنتائای کسی بوشی: «تو ایمو دیرین ئو مِن‌یش عمل دیرِم!» تو ایمونِت بی‌یَگه کاری بِهِین نشونِم دَ ئو مِن‌یش ایمو ووژِم وَه کارَلِم نشونتَ میَم. 19 تو ایمو دیرین گه خدا یَکی کَ، خوءَ مِهِین! مِلاکَتَل‌یش ایمو دیرِن ئو مانِ رِکَه! 20 اِاِ آمِ نایو، یانی میا بِذانین گه اَرِه چَه ایمونی گه عمل ناآشدوئیتی، ثمری نِری؟ 21 مَر باوَه‌مو ابراهیم وخدی کُرِهِه اسحاق اَررُی قُرونی‌گا پیشکَشی کِردی، وَه خاطر کارَلی، آم صالحی وَه حساو نِهات؟ 22 موئینین گه ایمون ئو کارَلی وَه‌گَرد یَک عملونَ مَهَرد ئو ایمو او، وَه کارَلی کامل بی. 23 ئو اَ نسخَه توراتَ وَه اَنجوم رَسی گه موئِتی: «ابراهیم ایمو آوِردی اَر خدا ئو یَه اَرِه او صالح‌بیئینَ حساو یِهات،» ئو نُمو ناءَ رِقیف خدا. 24 اِسَه موئینینو گه وَه عملَ گه اِنسو صالحَ حساوَ مای، نه وَه ایمو تَنیا. 25 هُنِ‌یشَ راحابِ خِراو، وخدی گه پِنا داتیَ قاصیئَل ئو اونَل وَه رئی هَنیا رِ کِردی، آیا وَه کارَلی آم صالحیَ حساو نِهات؟ 26 اَرِیَگه هَراَ جورَ گه لاری گه روح نِری، مِردیَ، هَرهُنِ‌یشَ ایمونی گه عمل ناآشدوئیتی مِردیَ. |
@ 2024 Korpu Company