یعقوب 1 - کتاب مقدس به زبان لکی - گویش مرکزی1 اژ یعقوب، گه خُلُم خدا ئو عیسی مسیح خداونَ، وَه دوازَه طائفَه اسرائیل گه اِ کُل دنیا پَشخِ‌پِلاآ بینَ. سِلام! اِنتحو ایمونتو 2 بِرال، وخدی هُمَه مَکُوئینون اِنوم اِنتحونَل جوراجور، تا مَتونینو خَوشی بِهَن! 3 اَرِیَگه مَذانینو گه اِنتحو ایمونتو، دَرین‌دارتونا مِهِه. 4 اِسَه بِیلِن دَرین‌داری کار ووژ کامل بِهِه تاگَه کَلِنگ ئو کامل بوئینو ئو میتاج هُیچ نوئینو. 5 اَرّ اژ هُمَه کسی میتاج حکمتَ، اَوَه اژ خدای بِیتی گه وَه دسِ‌دلوازی ئو بی‌خِض موئَشخیَ کُل کسی، ئو موئَشخِتیَ بی. 6 مِنتائای وَه ایمو بِیتی ئو هُیچ چِرچِ دل نیَری، اَرِیَگه هر کی چِرچ بیَریِ دل، اِجور موج دریاءَ گه وا مِیتی اَری ئو ایلا ئو اَلاءَ مِهِیتی. 7 اَرِیَگه هُنَ آمی نَباس گُمو بِهِه گه چیئی اژ خداونَ ماریَ دس، 8 او آم دودلی کَ گه اِ کُل کارَلی حالی‌حالیَ. 9 بِرا ژار وَه سربِلِنگی ووژ بنازی، 10 ئو آم ثرودمن‌یش وَه فِروتنی ووژ، اَرِیَگه او اِجور گل بیاوو اژ بِنَ مَچو. 11 اَرِیَگه هویَر وَه اَ مَشِرَقو ووژیَ ماءِ رُ، گیا حُشگا مِهِه، گُلَلی مَرِشی‌اِرا ئو رنگینی اَوَه اژ بِنَ مَچو. هَمیش آم ثرودمن هَرهُنَ گه ها دُم کارِبار ووژا، اژ بِنَ مَچو. 12 خَوزگالَ کسی گه اِنوم اِنتحونَل طاخَتَ ماری، اَرِیَگه وخدی اِ اِنتحو سربِلِنگ بو، اَ تاج ژییاینَ ماریَ دس گه خداون وَدَه داسیَ دوسدارَل ووژ. 13 هُیچ‌کس وخدی وسوسَه ماو، نوشی: «خدا مِه وسوسَه مِهِه،» اَرِیَگه خدا وَه گَنی وسوسَه نِماو ئو کسی‌شی وسوسَه نِمِهِه. 14 مِنتائای هر کی دچار وسوسَه ماو یَه هُواوهوس ووژَسی گه فنَ مِیتی ئو ماوژِتیِ تِلَه. 15 اَسَه هُواوهوس، لَم پِرَ ماوتی ئو گنا مَزای ئو وخدی گنا کَلِنگ بو، مرگَ بارَ ماری. 16 بِرال عزیزِم، فن نیرِن! 17 هر پیشکَشی خاص ئو هر پیشکَشی کامل اژ بِلِنگَ ئو اژ جونِم باوَه نُیرِلَ ماءَ هُار گه اِنوم او نه هُیچ تغییری هَس ئو نه هُیچ سای اژ تغییر. 18 او مِطابق خواس ووژ ایمَه وَه کلوم حخیخت خَلک کِردی تاگَه اِجور نوبری بوئیم اژ مخلوقات ووژ. شِنَفتِن ئو اَنجوم دائِن 19 بِرال عزیزِم، یَه بِذانِن گه هر کی باس اِ شِنَفتِن زِل بو، اِ قصَه کِردِن آروم بو ئو دیر عصبونی بو! 20 اَرِیَگه عصبونیّت اِنسو، اَ صالح بیئِنی گه خدا مِیتیَ بار نِماری. 21 اِسَه هر عادت نادُریس ئو کارَل شر اژ ووژتو دویرا کَن ئو ووژتو بسپارنَ خدا ئو وَه فِروتنی بِچِنِ گِرد کلومی گه او اِنوم دلتو کاریَسی ئو مَتونی هُمَه نجاد دِ. 22 مِنتائای کسی بوئن گه کلوم اَنجومَ مِ، نه فَخَد اَوَه گه مَشتوئیتی؛ ووژتو فن نیَن! 23 اَرِیَگه اَرّ کسی کلوم بشتوئی ئو اَنجوم نِ، اِجور کسی کَ گه رُی ووژ اِنوم آینَه موئینی 24 اَرِیَگه سِیل ووژَ مِهِه ئو مَچو، اَسَه هِرازِه اژ ویرَ مَچوتی گه رُی چطور بیتی. 25 مِنتائای کسی گه چیَم هایتی اَر شریعت کامل گه شریعت آزادیَ، اَوَه حفظَ مِهِه ئو اِجور کسی نیَ گه فَخَد مَشتوئی ئو اژ ویرَ مَچوتی، بلکِم اَوَه اَنجومَ مِ ئو اِ کار ووژ بِرَکتَ مَگِری. 26 اَرّ کسی گُمونَ مِهِه گه آم دینداری کَ مِنتائای نوا زوئو ووژ نِمَگِری، ووژ فنَ مِ ئو ایمو باطلَسی. 27 دینداری پِرچِ‌پاک اَر تک باوَه ایمَه، خدا، یَسَ گه اِ سخدیَل اژ یتیمَل ئو بیوَه‌ژِنَل دسگیری بِهِیم ئو اژ فساد دنیا ووژمو دویر بِگِریم. |
@ 2024 Korpu Company