عِبرانیَل 9 - کتاب مقدس به زبان لکی - گویش مرکزی

عَبادت اِ مَکو مقدّس زمینی

¹ اِسگَه جُ‌جُ عَت اول، قانونَلی اَرِه عَبادت داشدی ئو اَر زمین‌یش مَکو مقدّسی داشدی.

² اَرِیَگه داواری اِرهاوِنتوئی گه اِنوم بَشق اولیِهِه، چراخدو، میز، ئو نُو مقدّس بی؛ موشِنی‌ئون ’قُدس‘.

³ اِ پِشت پردَه دوئِمینِهِ‌یش بَشقی بی گه ’قدس‌الاقداس‘ نُم بیتی؛

⁴ اِنوم ایی بَشقَ، قُرونی‌گا طِلائی بِخور ئو صَنُق عَت بی گه اژ کُل لای وَه طِلا پوشیائی. اِنوم ایی صَنُقَ، کویزَه طِلائی گه ’مَنّا‘ اِنوم بیتی، ئو موزبِرَه هارون گه گل کِردوئی، ئو نُئِشتَه‌ل بَردین عَت، بین.

⁵ اَر بِلِنگ صَنُق، گه موشِنی‌ئون تخت ریَمَت، فریشدَه‌ل کروبی ’جِلال‘ سائو آوشدوئی. اِسگَه مِجال نیَ اِبارَه ایی چیئِلَ ریز ریز گپ بِیم.

⁶ دُما یَگه کُل چی هُنَ حاضر بی، کاهنَل گُراگُرَ مَچیان اِنوم بَشق اولینِهَه تاگَه خِلمت ووژو اَنجوم دَن.

⁷ مِنتائای فَخَد کاهن اعظمَ مَچیا اِنوم بَشق دوئِمینِهَه، اَویشَ فَخَد سالی یِه گِل، ئو هر گِل‌یشی خوین قُرونیَ گَرد ووژَ موئردی تا اَرِه ووژ ئو گنائَلی گه قوم اژ نایونی اَنجومو دائی، پیشکَش کِ.

⁸ هُنَ، روح‌القدس نشونَ مِ گه تا زمونی گه بَشق اولینِهَه هار سرجا، اَ رئیَ گه مَچو اِنوم اَ مَکو قدس‌الاقداسَ حالامی واز نوئیَ.

⁹ یَه نشونی کَ اَرِه ایی زمونَه اَلانَ گه مِطابق اَوَه، پیشکَشیَل ئو قُرونیَلی گه تقدیمَ ماو نِمَتونی وِژدان کسی گه عَبادتَ مِهِه کامل پاکا کِ،

¹⁰ بلکِم فَخَد اَرِه هُاردَنیَل ئو خُرّدائِنیَل ئو آداو جوراجور شورینَ کارَ مای، قانونَلی اَرِه لار، گه تا زمونی گه خدا کُل چی اصِلاح بِهِه، اِتِبار دیرِن.

خوین مسیح

¹¹ مِنتائای وخدی مسیح اِ مقوم کاهن اعظم اَ چیئَل خوءَ ظاهر بی گه هَراِسگِه‌یشَ هاتِنَ، چی اِنوم داوار کَلِنگتِر ئو کاملتِری گه وَه دس اِنسو دُریس نوئیَ، یانی اژ ایی خلقتَ نیَ.

¹² او یِه گِل اَرِه همیشَه چی اِنوم قدس‌الاقداس، نه وَه خوین ساوِرینَل ئو گوَئرَل، بلکِم وَه خوین ووژا، اُهُنَ آزادی ابدی آوِردی.

¹³ اَرِیَگه اَرّ خوین ساوِرینَل ئو کِلَ‌گائَل ئو پِشکونِن بیل گوَئر اَر اونَلی گه ناپاکِن، تقدیسونا مِهِه تاگَه جسماً پاک بوئن،

¹⁴ چَنی ویشتِر، خوین مسیح گه وَه‌سونگَ روحِ ابدی، ووژ بی‌عِو پیشکَش کِردی اَر خدا، وِژدان ایمَه اژ کارَل بی‌ثمر پاکا مِهِه تاگَه خِلمت اژ خداءِ زِنی بِهِیم!

¹⁵ اِسَه مسیح بَسخَه‌کَر عَت جدیدی کَ، تا اونَلی گه دَوَت بینَ بتونِن میرات ابدی‌ای گه خدا وَدَه داسی، بارنَ دس. اَرِیَگه مرگی اتفاق کَتیَ گه اونَل اژ گنائَلی گه اِ عَت اول اَنجوم گِرتیِ، آزادَ مِهِه.

¹⁶ اَرِیَگه وخدی وصیت‌نُامه‌ی ها نومجااِر، باس ثابت بو گه وصیت‌کَر مِردیَ.

¹⁷ اَرِیَگه وصیت‌نُامَه دُما مرگَ ماو اَنجوم بِگِری؛ اَرِیَگه تا وخدی وصیت‌کَرِهَه زِنیَ، نِماو اَ وصیتَ اَنجوم بِگِری.

¹⁸ اَژونَسَ جُ‌جُ عَت اول‌یش بی‌خوین، نَنِریا.

¹⁹ اَرِیَگه وخدی گه کُل حکمَل شریعت وَه‌سونگَ موسی اِلومَ بی اَر کُل قوم، او خوین گوَئرَل ئو ساوِرینَل گِرتی، وَه‌گَرد آو ئو حُری سوئر ئو پَلَل زوفا، پِشکونی اَر کِتاو ئو کُل قوم.

²⁰ ئو وِتی: «یَسَ خوین عَتی گه خدا حکِم کِردی اَرِنتو.»

²¹ اُهُنَ اَ خوینَ پِشکونی اَر داوار ئو اَر کُل چیئَلی گه اَرِه رسمِ‌رِسیم عَبادتونَ موئردِ کار.

²² اِراسی، مِطابق شریعت، تقریباً کُل چی وَه خوین پاکا ماو ئو اَرّ خوین نَرِشی، بشخِش گنائَل نیَ.

²³ اِسَه لازمَ چیئَلی گه نمونَه چیئَل آسمونیِن وَه ایی قُرونیِلَ پاکا بوئن، مِنتائای چیئَل آسمونی، ووژو وَه قُرونیَل بیتِر اژ یوئنَ.

²⁴ اَرِیَگه مسیح نَچی اِنوم قدس‌الاقداسی گه وَه دس اِنسو کَتوئی ئو فَخَد نمونه‌ی اژ چیئَل حخیخی بو، بلکِم چی اِنوم آسمو تا اِسگَه اژ جونِم ایمَه اَرتَک خدا ظاهر بو.

²⁵ ئو نه یَگه هَر گیو ووژ قُرونی بِهِه، اِجور کاهن اعظم گه کُلِ سالی مَچو اِنوم قدس‌الاقداس، اَویشَ وَه‌گَرد خوینی گه هِن ووژ نیِ.

²⁶ اَرِیَگه اَسَه، مسیح باس اژ زَمو بِنیا دنیا، هَر جُور کیشوئیتی. مِنتائای اِسگَه او یِه گِل اَرِه همیشَه اِ آخِر کُل دورَه‌ل ظاهر بیَ تا وَه قُرونی کِردِن ووژ، گنا اژ بِن بیَری.

²⁷ هَرهُنَ گه مَیِّن بیَ گه اِنسو یِه گِل بِمِری ئو دُما اَوَه داوری بای،

²⁸ اِسَه مسیح‌یش گه یِه گِل قُرونی بی تا گنائَل فِرَه کسَل بِگِریِ کول، اَرِه گِل دوئِم ظاهرَ ماو، نه اَرِیَگه گنائَل هیزدِ، بلکِم تاگَه کسَلی گه وَه شوقا چیَمَ‌رئیِنی، نجاد دِ.