عِبرانیَل 8 - کتاب مقدس به زبان لکی - گویش مرکزی

کاهن اعظم عَت بیتِر

¹ اِسگَه مصقود اصِلی چیئی گه موشیم یَسَ گه ایمَه هُنَ کاهن اعظمی دیریم گه نیشتیَس اَر دس راس تخت حضرت اعلی‌ اِنوم آسمونا

² ئو خادم مکونَل مقدّس یانی اَ داوار حخیخیَسَ گه خداون اِرداسی، نه اِنسو.

³ اَرِیَگه هر کاهن اعظم مَیِّنَ ماو تاگَه پیشکَشیَل ئو قُرونیَل تقدیم بِهِه. اِسَه، ایی کاهن‌یشَ باس چیئی اَرِه تقدیم کِردِن داشدوئیتی.

⁴ اِسگَه اَرّ او اَررُی زَمی بی، کاهن نوئی، اَرِیَگه کاهنَلی‌تِر هَن گه مِطابق شریعت پیشکَشیَل تقدیمَ مَهَن.

⁵ اونَل خِلمت اژ چیئَلی مَهَن گه نمونَه ئو سا چیئَل آسمونیِن. اَرِیَگه، وخدی موسی مِهِستی داوار اِربِ، خدا فِربو دائون ئو وِتی: «حُواسِت بو گه کُل چی مِطابق نمونه‌ی بسازین گه اِنوم کوی نشونو داین.»

⁶ مِنتائای اِسگَه مسیح خِلمَتی آوِردیَسیَ دس گه فِرَه خاص‌تِر اژ خِلمت قدیمیِهِئَه، اَرِیَگه عَتی گه او بَسخَه‌کَرَسی عَت بیتِری کَ، اَرِیَگه اَر بِناوَه وَدَه‌ل بیتِری کَتیَ.

⁷ اَرِیَگه اَرّ عَت اول بی‌عِو بوئیا، نیازی نوئی گه وَه دُم عَت دوئِما بوئیم.

⁸ مِنتائای خدا عِوی مِهِئَه دی ئو موشی: «خداونَ موشی، اِسگَه روژَلی مای گه مِه وَه‌گَرد دویمو اسرائیل ئو دویمو یهودا عَت جدیدی موئنِم.

⁹ نه اِجور عَتی گه وَه‌گَرد باوَه‌لِم بَسدِن، اِ اَ روژَ گه دَسَلِم گِرتِن تاگَه اژ وِلات مصر بارمونَ دِریر؛ اَرِیَگه خداونَ موشی، اونَل نوسیان اَرسر عَت مِه. اِسَه، رُیم اَژینون اِرپِلو.

¹⁰ اَرِیَگه خداونَ موشی: یَسَ عَتی گه دُما اَ روژِلَ وَه‌گَرد دویمو اسرائیلَ موئنِم. شریعت ووژمَ مَنِم اِنوم فگِرَلو، ئو مَنُیسِنِم اَررُی دلَلو. مِنَ موئمَ خدا اونَل، ئو اونِلَ موئنَ قوم مِه.

¹¹ دیَر کس هُمسا ووژ یا نِمِ، ئو کس نِموشیَ بِرا ووژ، ”خداون بشتاس!“ اَرِیَگه اژ کَلِنگ تا گُجَر، کُل مِنَ مَشتاسِن،

¹² اَرِیَگه خطائَلونَ موئَشخِنِم، ئو دیَر هرگِس گنائَلو نِمارمَ ویر.»

¹³ خدا وَه قصَه کِردِن اژ یِه عَت ’جدید‘، عَت اولینِهَه بی‌اتبارَ مِهِه؛ ئو اَ چیئَه گه بی‌اتبار بیَ ئو دیری کُینَه ماو، آماده‌ءَ گه اژ بِن بِچو.