عِبرانیَل 7 - کتاب مقدس به زبان لکی - گویش مرکزیرِزگ کاهن‌بیئین مِلْکیصِدِق 1 اَرِیَگه ایی مِلْکیصِدِقَ، گه پاتِشا شیَر سالیم ئو کاهن خداءِ متعال بی، ابراهیم دیتی گه اژ شِکِس دائِن پاتِشائَل گِلامَهُاردی ئو، بِرَکت دائون. 2 ئو ابراهیم دیَه‌یَک کُل چی پیشکَش کِردیَ هَرایی کسَ. میَنا نُم او اول‌بار ’پاتِشا صالح‘ ئو دُماخِرِ ’پاتِشا سالیمَ‘، یانی ’پاتِشا صُئل‘. 3 او نه باوَه دیری ئو نه دا ئو نه تَجِرَنُامچَه دیارِ، ئو نه بِنیا روژَل اول ئو نه آخِر زِنِه‌ی، مِنتائای اِجور کُر خدا، تا ابد کاهنَ مَمینی. 4 سِیل کَن گه او چه آم کَلِنگی بی گه جُ‌جُ ابراهیم، ”باوَه قوم اسرائیل“ اژ خنیمتَل دیَه‌یَک دائون! 5 ئو مِطابق حکِم شریعت، آیلَل لاوی گه موئنَ کاهن، باس اژ قوم یهود گه بِرال اُوُنِن دیَه‌یَک بِسینِن، وَه‌یاآگه اون‌یش اژ نسِل ابراهیمِن. 6 مِنتائای ایی آمَ گه اژ نسِل لاوی نوئی، اژ ابراهیم دیَه‌یَک سَنی ئو بِرَکت داتیَ او گه صائای وَدَه‌ل بی. 7 ئو چِرچی نیَ، گُجَرتِرَ گه اژ کَلِنگتِر بِرَکتَ مَگِری. 8 اژ یِه لا، کسَلی دیَه‌یَکَ مَسینِن گه فانیِن؛ مِنتائای اژ لای‌تِر، کسی مَسینِتی گه اِبارَه او شاتی هاوِنتیَ گه زِنیَ. 9 جُ‌جُ ماو بوشین گه لاوی ووژیش گه دیَه‌یَکَ مَسینی، وَه‌سونگَ ابراهیما دیَه‌یَک داتی. 10 اَرِیَگه وخدی مِلْکیصِدِق ابراهیم دیتی، لاوی هَنی اِ پِشت باوَه‌جدیا بی. قیاس عیسی وَه‌گَرد مِلْکیصِدِق 11 اَرّ موئیا کاملابیئِن وَه‌سونگَ خِلمت کاهنی رتبَه لاوی باءَ دس، دیَر چه نیازی بی کاهنی‌‌تِر، نه اژ رتبَه هارون، بلکِم اژ رتبَه مِلْکیصِدِق ظاهر بو؟ -اَرِیَگه شریعت اِ دورَه خِلمت کاهنی لاوی رَسیَ قوم یهود- 12 اَرِیَگه اَرّ خِلمت کاهنی عوض بو، لازمَ گه شریعت‌یش عوض بو. 13 اَرِیَگه کسی گه ایی چیئِلونَ اِبارَه او وِتیَ، هِن طائفه‌ی‌تِرَ گه اژ اَ طائفَه هرگِس کس خِلمت اژ قُرونی‌گا نَهَردیِ؛ 14 اَرِیَگه دیارَ گه خداون ایمَه اژ نسِل یهودا بی ئو موسی اِبارَه اَ طائفَه چیئی اژ خِلمت کاهنی نوئتی. 15 ایی گپَ دیارتِریشا ماو؛ اَ کاهنی‌تِرَ گه ظاهرَ ماو، یَکی اِجور مِلْکیصِدِقَ. 16 او گه نه اَر پاءَ یِه حکِم شرعی اَرِه نسِلی، بلکِم اَر پاءَ قویَت ژییاینی گه اژ بِن نِمَچو، ماوَ کاهن. 17 اَرِیَگه اِنوم کِتاو زبور داوود اِبارَه او هُنَ شاتیو داءَ گه: «تو تا ابد کاهنین، اژ رتبَه مِلْکیصِدِق.» 18 اَرِیَگه اژ یِه لا حکِم نواینِهَه نیریاءِ لا، وَه خاطر یَگه ضِیف ئو بی‌فادَه بی، 19 اَرِیَگه شریعت هُیچی کاملا نَهَردی. مِنتائای اژ یِه لاتِر امید بیتِری دائونمو گه وَه‌سونگَ اَوا نزیکا موئیم اَر خدا. 20 ئو یَه بی‌قسم نوئی! اَرِیَگه کسَلی گه وِرِکار بوئینَ کاهن، بی‌هُیچ قسمی بینَ کاهن، 21 مِنتائای کاهن بیئِن او وَه‌گَرد قسم بی، وخدی گه خدا وِتون: «خداون قسم هُاردیِ ئو عخیدَه ووژ عوض نِمِهِه گه: ”تو تا ابد کاهنین“.» 22 وَه خاطر ایی قسمَ، عیسی بیَسَ ضامن عَت بیتِرِکی. 23 شِمار کاهن نواینِلَهَه فِرَه بی، اَرِیَگه مرگ نوا خِلمَتونَ مَگِرتی. 24 مِنتائای عیسی تا ابد کاهنَ، اَرِیَگه او تا ابد زِنیَ. 25 اِسَه اوءَ مَتونی اونَلی گه وَه‌سونگَ او مان اِرَه تک خدا، کامل نجاد دِ. اَرِیَگه هَر زِنیَ تاگَه شِفاعتو کِ. 26 اَرِیَگه اِراسی ایمَه هُنَ کاهن اعظممونی اِکَل بی، کاهن قدوس، بی‌عِو، بی‌لکَه، جیا اژ گناکارَل، ئو جِلال گِرتی بِلِنگ‌تِر اژ آسمونَل. 27 او نیازی نِری اِجور کاهنَل اعظمی‌تِر کُلِ روژی، اول‌بار اَرِه گنائَل ووژ ئو دُماخِرِ اَرِه گنائَل قوم قُرونی تقدیم بِهِه. اَرِیَگه وخدی ووژ قُرونی کِردی، یِه گِل اَرِه همیشَه یَه کِردی. 28 اَرِیَگه شریعت، کسَلی گه ضیَف دیرین اَرِه کاهن اعظمی مَیِّنَ مِهِه، مِنتائای کلوم قسمی گه دُما شریعت هات، کُری مَیِّنَ مِهِه، گه تا ابد کاملا بیَ. |
@ 2024 Korpu Company