عِبرانیَل 6 - کتاب مقدس به زبان لکی - گویش مرکزی1 اِسَه بورِن اژ تیَلیمَل اولی اِبارَه مسیح رد بوئیم، ئو بِچیمِ نوا ویرِ بالغ‌بیئین، ئو اِدوارَه پِ توئَه اژ کارَلی گه آخِرو مرگَ، ئو ایمون اَر خدا نَنیم، 2 ئو تیَلیم اِبارَه خُسِلَل تیَمید، ئو دس اَر سر کسی نائن، ئو زِنیا بیئِن مِردیَل ئو داوری ابدی. 3 ئو اَرّ خدا صِلا بِ، هُنِ‌یشَ مِهِیم. 4 اَرِیَگه اونَلی گه یِه گِل روشتاآ بینَ ئو عطا آسمونیو طُم کِردیَ ئو اِ روح‌القدس هُم‌بیَرا بینَ 5 ئو طُم خوئی کلوم خدا ئو قویَتَل زمونه‌ی گه میا بایو کِردیَ، 6 اَرّ اژ ایمو بِکُوئِن، دیَر نِماو هَنی باریو ویرِ توئَه، اَرِیَگه، اِدوارَه کُر خدا وَه ضِرَد ووژو مَکیشِن اَر صلیب ئو اَر وَر چیَم کُل آمَل بی‌عزّتَ مَهَنی. 7 اَرّ زمینی، وارونی گه هرگِل ماوارِتی اَری بِگِریِ ووژ ئو اَرِه کسَلی گه وَه خاطر اونَل کِشت بیَ، ثمر خوئی بِ، اژ خدا بِرَکتَ مَگِری. 8 مِنتائای زمینی گه دِرِک تو گیا بِ، تِخَ ئو نزیکَ لیَن بو، ئو آخِریشی مَسُزِنِنی. 9 اِاِ عزیزَل، وَه‌یاآگه هُنَ قصَه مِهِیم، مِنتائای اِبارَه هُمَه اطمینو دیریم گه چیئَل بیتِری گه هِن نجادِن، ماوَ نَصُیتو. 10 اَرِیَگه خدا بی‌انصاف نیَ گه کار هُمَه ئو مِحبتی گه وَه خاطر نُم او اِ خِلمت اژ ایمودارَل مسیحتو نِشو داءَ ئو هَنی‌شَ مِینو، اِویر بِچوتی. 11 آواخدمو یَسَ گه هرکُم اژ هُمَه هَر ایی خیرَتَ تاگَه آخِر حفظ کِ تاگَه امیدتو کامل وَه اَنجوم برَسی، 12 تاگَه تَمَل نوئینو، بلکِم اژ کسَلی سرمقشا بِگِرینو گه وَه‌سونگَ ایمون ئو صبِر، موئنَ وارث وَدَه‌ل. وَدَه‌ل خدا 13 وخدی گه خدا وَدَه داءَ ابراهیم، قسمَ نُم ووژ هُاردی، اَرِیَگه اژ ووژ کَلِنگتِری نوئی گه وَه نُم او قسم بیری 14 ئو وِتی: «اِراسی بِرَکتتَ میَم ئو تو ویشتِرا مَهَم.» 15 ئو وَه ایی جورَ، ابراهیم دُما یَگه وَه صبِر چیَمَ‌رئی مَن، وَدَه آوِردیَ دس. 16 اَرِیَگه مردِم وَه چیئی کَلِنگتِر اژ ووژو قسمَ میرِن ئو آخِر کُل دَمَرَگَلو قسمی کَ گه ثابتَ مِهِه. 17 اَژونَسَ وخدی خدا هِستی اَر وارثَل وَدَه، بیتِر نِشو دِ گه قَص عوض نِماوتی، اَوَه وَه قسمی ضمونت کِردی، 18 تا وَه‌سونگَ دو چی گه عوض نِموئن، گه مِحالَ خدا اِبارَه اونَل دِرو بوشی، ایمَه گه پِنامو آوِردیَ، فِرَه دلگرما بوئیم تاگَه سفدِسخد بچسبیمونَ امیدی گه نیریاس اَر نوامو. 19 ایی امیدَ، اِجور لنگر قرص ئو مِطمئنی اَرِه گیونمونَ، امیدی گه مَچو اِنوم قدس‌الاقداس، گه ها اَلا پردَه داواراِر 20 جای گه عیسی اِجال ایمَه ئو وِر اژ ایمَه، چِتی اِنوم؛ ئو اَرِه همیشَه بیَسَ کاهن اعظم، اژ رتبَه مِلْکیصِدِق. |
@ 2024 Korpu Company