عِبرانیَل 5 - کتاب مقدس به زبان لکی - گویش مرکزی

¹ اَرِیَگه هر کاهن اعظمی اِنوم مردِم اِنتخاوَ ماو تا اِ کارَلی گه مربوطَ خداءَ نِمائندَه مردِم بو تاگَه پیشکَشیَل ئو قُرونیَل اَرِه گنائَل باری اِرَه تک خدا.

² اوءَ مَتونی وَه‌گَرد نایونَل ئو اَژرئی‌اِر‌هاتیَل، وَه مِلائمت رفدار بِهِه، اَرِیَگه ووژیشی ضیَف دیری.

³ اَژونَسَ هَرهُنَ گه اَرِه گنائَل مردِم قُرونیَ مِهِه، باس اَرِه گنائَل ووژیشی بِهِه.

⁴ هُیچ‌کس ووژ ایی افتخارَ نِمِهِئَه هِن ووژ، بلکِم فَخَد وخدی گه خدا دَوَت کِیتی، هُنَ گه هارون دَوَت بی.

⁵ مسیح‌یش ووژ جِلال کاهن اعظم بیئِن نَهَردیَ هِن ووژ، بلکِم اَوَه اژ هَراَ کسَ گِرتی گه وِتون: «تو کُر مِنین؛ ایمِرو، مِه تونِم زاندَه کِردیَ.»

⁶ ئو هَنی اِ جای‌تِرَ موشی: «تو تا ابد کاهنین، اژ رتبَه مِلْکیصِدِق.»

⁷ عیسی اِ زَمو زِنِه‌ی کِردِنی اَررُی زَمی، وَه دای کَلِنگ ئو اَسِرَل، اِ درگا اَوَه گه مَتونِستی اژ مرگ نجاد دِیتی، دوعا کِردی ئو اِمدای آوِردی ئو وَه خاطر فِربوبَری کاملی گه داشدی قبول بی.

⁸ وَه‌یاآگه کُر بی، وَه‌سونگَ عذاوی گه کیشیتی فِربوبَری آگِرتی.

⁹ ئو وخدی کاملا بی، بیَ سِرآو نجاد ابدی اَرِه کُل کسَلی گه فِربون اَژینَ میَرِنی.

¹⁰ ئو اژ جونِم خدا مَیِّن بی تا کاهن اعظم بو، اژ رتبَه مِلْکیصِدِق.

هُشتار اِبارَه اژ ایمو کَتِن

¹¹ اِبارَه یَه، چیئَل فِرِه اَرِه وِتِن دیریم، مِنتائای تیَریف کِردِنو سخدَ، اَرِیَگه گوشَلتو سنگینا بینَ.

¹² اَرِیَگه اِراسی تااِسگَه هُمَه مِئستا ووژتو مَلِمَل بوئینو. وَه ایی حالا هَوَجَه‌تو ها یَگه یَکی اِدوارَه کلوم خدا اژ پاءَ یاتو دِ. هُمَه میتاج شیرینو، نه خوراک سنگین!

¹³ هر کی شیرهُیَرَ، اژ کلوم صالح‌بیئین سر اِرنِماری، اَرِیَگه هَنی آویلَ.

¹⁴ مِنتائای خوراک سنگین هِن کَلِنگِلَ، اونَلی گه وَه یِمِجو تمرین کِردِن، قدِرت تشقیص ووژو تربیتو کِردیَ تاگَه گَن ئو خو اژ یَک اِربارِن.