عِبرانیَل 4 - کتاب مقدس به زبان لکی - گویش مرکزیپَلامار اَرِه قوم خدا 1 اِسَه وَه‌یاآگه وَدَه چیئین اِنوم پَلامار او هَر هار سرجا ووژ، زِلَمو بِچو گه ناخواد آشگارا بو یَکی اژ هُمَه، اِ یَگه برَسیَ وَدَه شِکِس هُاردیِ. 2 اَرِیَگه ایمِه‌یش اِجور اُوُ خَوَر خَوشو دایم‌ئون. مِنتائای پِغومی گه شنَفتو، فادِه‌ئونی اَرِه ناآشدی، اَرِیَگه وَه‌گَرد اونَلی گه گوشو دائون وَه ایمو، نوئینَ یَکی. 3 اَرِیَگه ایمَه گه ایمونمو آوِردیَ، مَچیمَ نوم اَ پَلامارا. هَرهُنَ گه خدا اِنوم کِتاو زبور داوود وِتی: «اِسَه اِ خَضو ووژِم قسمِم هُارد گه نِمان اِنوم پَلامار مِنا،» وَه‌یاآگه، کارَل او اژ زَمو بِنیا دنیا تموم بوئی؛ 4 اَرِیَگه اِ جای اِنوم تورات اِبارَه روژ هفتِم هُنَ وِتیِ: «خدا اِ روژ هفتِم، اژ کُل کارَلی سِتار گِرت،» 5 ئو اِدوارَه اَر ایرَه وِتی: «نِمان اِنوم پَلامار مِنا.» 6 اِسَه، اَرِیَگه اَرِه بِری حالامی مِجال هَس گه بِچِن اِنوم اَ پَلامارا، ئو اونَلی گه وِر اژ یَه خَوَر خَوش رَسی‌ئونو، وَه خاطر کورفِربونی نَچِنیَ نوما، 7 خدا اِدوارَه روژ مصقوصی مَیِّنَ مِهِه، یانی ’ایمِرو‘ ئو دُما مِدت فِرِه، اِنوم کِتاو زبور اژ زوئو داوود پِخَمَر، وَه ایی کِلمه‌لَ وِتیِ: «ایمِرو، اَرّ دَنگ اوءَ مَشتوئینو، دلَلتونَ بَرد نَهَن.» 8 اَرِیَگه اَرّ یوشَع سِتار بَشخوئیتی‌ئونو، دُماتِر، خدا اِبارَه روژی‌تِر قصَه نِمَهَردی. 9 اِسَه یِه پَلامار شَمَه مقدّس اَرِه قوم خدا مَمینی اَر سرجا؛ 10 اَرِیَگه هر کی چیَس اِنوم پَلامار خداآ، اژ کارَل ووژ سِتار گِرتیِ، هَرهُنَ گه خدا اژ کارَلی سِتار گِرت. 11 اِسَه بورِن سخد تقِلا بِهِیم تاگَه بِچیم اِنوم اَ پَلامارا، تاناخواد کسی وَه‌سونگَ هُنَ کورفِربونی‌ای بِکُوءِ. 12 اَرِیَگه کلوم خدا زِنیَ ئو کارَ مِهِه ئو اژ هر شِمشیر دو‌دَمی تیژتِرَ، ئو هُنَ مَچو اِنوم گه نفْس ئو روح، گُشبَنَل ئو مَزگ سِخون‌یش جیاآ مِهِه، ئو فگِرَل ئو نیّت دلَل تشقیصَ مِ. 13 ئو هُیچ مخلوقی اژ چیَم خدا پنهو نیَ، بلکِم کُل چی اِ وَر چیَمَل او گه باس حساو‌ئون بِیمیَ دُما، لُت ئو آشگارَ. عیسی، کاهن اعظم ایمَه 14 اِسَه وخدی کاهن اعظم کَلِنگی دیریم گه ویرِ آسمونَل چیَسِ رُ، یانی عیسی کُر خدا، بورِن سفدِسخد بچسبیمون اَر اعتراف ایمونمو. 15 اَرِیَگه کاهن اعظم ایمَه هُنَ نیَ گه نتونی وَه‌گَرد ضیَفَلمو هُمدردی بِهِه، بلکِم کسی کَ گه اِ کُل لِحاظی اِجور ایمَه اِنتحو بیَ، بی‌یَگه گنا بِهِه. 16 اِسَه وَه اطمینو نزیکا بوئیم اَر تخت فیض تاگَه ریَمَت بوءَ نَصُیمو ئو فیضی باریمَ دس گه وخد هَوَجَه برَسیَ دایمو. |
@ 2024 Korpu Company