عِبرانیَل 3 - کتاب مقدس به زبان لکی - گویش مرکزیعیسی سرتِر اژ موسی 1 اِسَه اِاِ بِرالِم، اِاِ مقدّسَل گه اِ دَوَت آسمونی هُم‌بیَرینو، چیَمتون اَر عیسی بو گه او اَ رسول ئو کاهن اعظمَ‌سَ گه اعترافَ مِهِیمی اَری. 2 او اَر کسی گه او مَیِّن کِردی اَمونتدار بی، هَرهُنَ گه موسی‌یش اِنوم کُل مال خدا اَمونتدار بی. 3 اَرِیَگه عیسی لائق عزّت ویشتِری اژ موسی وَه حساوَ مای، هَرهُنَ گه عزّت کسی گه مالَ ماوژی ویشتِر اژ خود اَ مالَ‌سَ. 4 اَرِیَگه هر مالی وَه دس کسی مَکُوءِ، مِنتائای بنّا کُل چی خداءَ. 5 موسی اِ مقوم خادم اِنوم کُل مال خدا اَمونتدار بی تا شاتی بی اَر اَ چیئَه گه باس دُماتِر اِلوم بو. 6 مِنتائای مسیح، اِجور کُری اَر مال خدا اَمونتدارَ، ئو مال او ایمِه‌یمو، وَه شرطی گه تاگَه آخِر وَه اطمینون ئو افتخار سفدِسخد بچسبیمون اَر امیدمو. 7 اِسَه هَراَ جورَ گه روح‌القدسَ موشی: «ایمِرو، اَرّ دَنگ اوءَ مَشتوئینو، 8 دلَلتو نَهَنَ بَرد، هَراَ جورَ گه اِ اَ کورفِربونیَ، اِ روژ اِنتحو اِنوم بیاوو. 9 اَر اورَه گه باوَه‌لتو مِنو اِنتحون ئو آزمائشد کِرد، ئو چِل سال کارَل مِنو دی. 10 اَژونَبیَ، اژ دس اَ نسِلَ آگِر اژ سرِم چی، ئو وِتِم: ”یوئنَ هَر اِ دل ووژو اژرئی‌اِرهاتیِن، ئو رئیَل مِنو نَشتاسیَ؛“ 11 اِسَه اِ خَضو ووژِم قسمِم هُارد، گه نِمان اِنوم پَلامار مِنا.» 12 اِاِ بِرال، حُواستو بو گه ناخواد اِنوم یَکی اَژینتو دل گَن ئو بی‌ایمونی بو گه اژ خداءِ زِنی دویرتونا کِ. 13 بلکِم کُلِ روژی، تا اَ زمونی گه هَنی موشِنی‌ئون ’ایمِرو‘، پَن یَکتِری دَن تا کسی اَژینتو وَه خاطر فن گنا، دلَ بَرد ناوتی. 14 اَرِیَگه اِنوم مسیح هُم‌بیَرا بیمونَ، اَرّ اِراسی تاگَه آخِر بچسبیمون اَر اَ اطمینو اول ووژمونا. 15 هُنَ گه اِنوم کِتاو زبور داوود وِتیِ: «ایمِرو، اَرّ دَنگ اوءَ مَشتوئینو، دلَلتونَ بَرد نَهَن، هَراَ جورَ گه اِ اَ کورفِربونیَ.» 16 اَرِیَگه اونَلی گه شنَفتو مِنتائای کورفِربو بین، کی بین؟ مَر کُل اونَلی نوئین گه وَه هدائَت موسی اژ مصر هاتِنَ دِریر؟ 17 ئو اژ دس چه کسَلی چِل سال آگِر اژ سر چوئیتی؟ مَر اونَلی نوئین گه گنائو کِرد ئو لَشَلو کَت اِنوم بیاوو؟ 18 ئو اِبارَه چه کسَلی قسم هُاردی گه نِمان اِنوم پَلامار اوآ؟ مَر اِبارَه اونَلی نوئی گه کورفِربونیو کِرد؟ 19 اِسَه موئینیم وَه خاطر بی‌ایمونی بی گه نتونستو بِچِن اِنوم. |
@ 2024 Korpu Company