عِبرانیَل 2 - کتاب مقدس به زبان لکی - گویش مرکزی

هُشتار اِبارَه وَه نِئیَ گِرتِن نجاد

¹ اِسَه باس خو حُواسمون اَر اَ چیئَه گه شنَفتِمونَ بو، تاناخواد اژ رئی اَوِه‌ اِرَبایم.

² اَرِیَگه اَرّ پِغومی گه وَه‌سونگَ فریشدَه‌ل اِلوم بی، ثابت بی گه اِتِبار دیری، جوری گه هر خطا ئو کورفِربونی مِجازات عادلونه‌ی گِرتی،

³ اِسَه اَرّ ایمَه هُنَ نجاد کَلِنگی وَه نِئیَ بِگِریم چطور اژ مِجازات بِحوایمی؟ خداون عیسی اژ اَ اولَ ایی نجادَ اِلوم کِردی، اَسَه وَه‌سونگَ کسَلی گه اژ اوُ شنَفت ثابت بی اَرینمو،

⁴ هُنَ گه خدایش شاتی داتیَ اَ نجادَ، وَه نشونَه‌ل ئو چیئَل بِلُجوئی ئو مُجِزَه‌ل جوراجور، ئو وَه عطائَل روح‌القدس گه مِطابق خواس ووژ بیَرونا مَهَردی.

⁵ اَرِیَگه خدا، دنیا آیندَه گه دیریم اَژی قصَه مِهِیمی، فِربوبَر فریشدَه‌ل نَهَردی.

⁶ مِنتائای یَکی اِ جای اِنوم کِتاو زبور داوود شاتی داسی، وِتیِ: «اِنسو چِیکَ گه اِ فگِر بوئینی، ئو کُر اِنسو، گه ویرت اَری بوتی؟

⁷ اَرِه مِدت کمی اوئِت اژ فریشدَه‌ل، هُارتِر نا، ئو تاج جِلال ئو عزّتِت نا اَر سر

⁸ ئو کُل چیئِت نا اِژیر پائل او.» اِسگَه گه خدا کُل چی ناسیِ ژیر پائل او، چیئی نِئیشتی اَر جا گه فِربوبَر او ناو. مِنتائای اِ ایی زمونَ هَنی نِموئینیم گه کُل چی فِربوبَر او بو.

⁹ مِنتائای عیسیَ موئینیم گه اَرِه مِدت کمی بیَ هُارتِر اژ فریشدَه‌ل، ئو وَه خاطر زجِر مرگ تاج جِلال ئو عزّت نیریاسی اَر سر تاگَه وَه‌سونگَ فیض خدا، اَرِه کُل، مرگ طُم کِ.

¹⁰ اَرِیَگه یَه سزاوار بی گه خدا، گه کُل چی اَرِه او، ئو وَه‌سونگَ او هَس، اَرِیَگه کُرَل فِرِه برَسِنیَ جِلال، کسی گه بانی نجادونَ وَه‌سونگَ عذاو، کاملا کِ.

¹¹ اَرِیَگه اَوَه گه تقدیسَ مِهِه ئو اونَلی گه تقدیسَ موئن، کُل اژ یِه باوَه‌ن، اَژونَسَ عیسی عار نِمایتی اونِلَ بِرا هِنا کِ.

¹² هُنَ گه اِنوم کِتاو زبور داوودَ موشی: «نُم تون اَر بِرالِم اِلومَ مَهَم؛ ئو اِنومجا جیَمیَت سروء شگِرتَ مَحیوَنِم.»

¹³ ئو هَنی اِنوم کِتاو اِشعیا پِخَمَرَ موشی: «مِه توکّلَ مَهَم اَر او.» ئو اِدوارَه موشی: «اِسگَه، مِن ئو آیلَلی گه خدا داسی‌ئونِم.»

¹⁴ اِسَه اَرِیَگه آیلَل اِ جسم ئو خوین هُم‌بیَرِن، اوئیش ووژ اِنوم هَر ایی چیئِلَ هُم‌بیَرا بی تا وَه‌سونگَ مرگ، صائای قدِرت مرگ، یانی ابلیس نابود کِ،

¹⁵ ئو کُل اونَلی گه کُل عمِرو وَه خاطر ترس اژ مرگ بَنَه بینَ، آزاد کِ.

¹⁶ اَرِیَگه حکماً او یاری فریشدَه‌ل نِمِ، بلکِم نسِل ابراهیم یاریَ مِ.

¹⁷ وَه ایی خاطرَ، او باس اژ کُل لِحاظی موئیا اِجور بِرالی تا اِ مقوم کاهن اعظمی گه رِئیم ئو اَمونتدارَ، خِلمت اژ خدا بِهِه، ئو اَرِه گنائَل قوم کفارَه بِهِه.

¹⁸ اَرِیَگه او ووژ وخدی اِنتحو بی، عذاو کیشیتی، مَتونی کسَلی گه اِنتحونَ موئن، یاری دِ.