عِبرانیَل 13 - کتاب مقدس به زبان لکی - گویش مرکزیقُرونیَلی گه باوِ دل خدان 1 بِیلِن مِحبت بِرائی هَر بو. 2 اژ هُن‌هاوونی اژ خَریوَل خافل نوئن، اَرِیَگه وَه ایی کارَ، بِری نَذِناسدی اژ فریشدَه‌ل مِموداریو کِرد. 3 اونَلی گه هانِ زندون‌اِر وَه ویرتو بو، هُنَ گه مَری ووژیشتونَ گَردو هاینونَ زندون‌اِر؛ هَمیش ستم‌کیشَلتونِ ویر بو، اَرِیَگه هُمَه ووژیشتو اِنوم لار هُنِینونَ. 4 داوات کِردِن باس اِنوم کُل مردِم عزّت داشدوئیتی ئو رابطَه حِلال‌هُمسری پاک بو، اَرِیَگه خدا اَر بی‌عصمتَل ئو زِنهاکارَل داوریَ مِهِه. 5 بیلا زِنِه‌یتون اژ پیل‌دوسی دویر بو ئو وَه چیئی گه دیرینو قانی بوئن، اَرِیَگه خدا وِتیِ: «هرگِس وِلِت نِمَهَم، ئو تَنیات نِمِیلِم.» 6 اِسَه وَه اطمینونَ موشیم: «خداون هِنارَس مِنَ، اِسَه زِلَم نِمَچو. اِنسو چَه مَتونی اَر سرِم باری؟» 7 رَبَرَلتو گه کلوم خدائون اَرِه وِتینو، وَه ویرتو بو. اِبارَه عاقویَت طُرُخ زِنِه‌یو خو دقّت بِهَن ئو اژ ایمونو سرمقشا بِگِرِن. 8 عیسی مسیح دونَه ئو ایمِرو ئو تا ابد هر اَوَه‌‌سَ. 9 وَه تیَلیمَل جوراجور ئو بِلُجوئی اژ رئی اِرنان، اَرِیَگه خوءَ گه دل اِنسو اژ فیض قویَت بِگِری، نه اژ خوراکَلی گه اَرِه کسَلی گه هانَ دُمونا، نفعی نِرِن. 10 ایمَه قُرونی‌گای دیریم گه خِلمتکارَل داوار، حخ نِرِن اژ اَ چیئَه گه هایتی اَرسرا بیرِن. 11 وَه خاطر یَگه کاهن اعظم، خوین حِوونَل اَرِه قُرونی گنا، میَری اِرَه قدس‌الاقداس، مِنتائای لَشَلون اژ اردوگا اِ دِرَ مَسُزِنِن. 12 اِسَه، عیسی‌ش اژ دروازَه شیَر اِ در عذاو کیشیتی تا وَه خوین ووژ، قوم مقدّسا کِ. 13 اِسَه بورِن اژ اردوگا بِهِیمَ دِریر اِرَه تک او، هَرهُنَ گه هَراَ ننگی گه او تیَمِل کِردی، گِرتِمونَس‌َ کولا. 14 اَرِیَگه ایمَه اَر ایرَه شیَری گه هَر بِمینی، نِریم، بلکِم وَه شوقا چیَمَ‌رئی اَ شیَریمَ گه میا بای. 15 اِسَه بورِن وَه‌سونگَ عیسی یِمِجو قُرونی شگِر پیشکَش کِیم اَر خدا، گه ایی قُرونیَ، ثمر لِچَلی کَ گه نُم اوءَ مارِنَ زوئو. 16 اژ خوئی کِردِن ئو بیَردارا کِردِن کسَلی‌تِر اژ چیئَلی گه دیرینو خافل نوئن، اَرِیَگه هُنَ قُرونیَلی وَه دل خدان. 17 اژ رَبَرَلتو اطاعت کَن ئو فِربوبَرو بوئن؛ اَرِیَگه اونَل اژ گیونَل هُمَه پاسبونیَ مَهَن، وَه‌چوینا گه باس حساو بیَنَ دُما. بِیلِن ایی کارَ وَه خَوشی اَنجوم دَن نه وَه نُیزنَز، اَرِیَگه یَه وَه نفع هُمَه نیَ. 18 دوعامون اَرِه بِهَن، اَرِیَگه اطمینو دیریم گه وِژدانمو پاکَ ئو مِمو اِ کُل چی سربِلِنگ بوئیمو. 19 مصقوصاً اژ هُمَه‌مَ مِ گه هُنَ بِهِینو گه بتونِم هر چی زویتِر گِلابیرِم اِرَه تَکتو. 20 اِسگَه، خداءِ صُئل‌وسِلامتی گه شوئون اعظم کاوِرَل یانی خداونمو عیسی، وَه خوین عَت ابدی اژ مِردیَل زِنیا کِردی، 21 هَراَ خدای گه هُمَل مِجهز کِردیَ کُل چیئَل خو تاگَه خواس او اَنجوم دِینو، تاگَه اَ چیئَه گه وَه دِلَسی وَه‌سونگَ عیسی مسیح اِنوم ایمَه اَنجوم دِ، گه جِلال اَر او تا ابدالآباد. آمین. 22 اِاِ بِرال، مَلالکِم‌ئونتو ایی کلوم پَن مِنَ تیَمِل بِهِینو، اَرِیَگه کُئلِ‌کوتام اَرِنتو نُیسونیَ. 23 بِذانِن گه بِرامو تیموتائوس آزاد بیَ. اَرّ او زوی بای، وَه گَردَ مامی موئینِمتو. 24 سِلام برَسِنِنَ کُل رَبَرَلتو ئو وَه کُل ایمودارَل مسیح. اونَلی گه اژ ایتالیان، سِلامتون‌ئونَ مَرَسِنِن. 25 فیضَ گَرد کُلتو بو. |
@ 2024 Korpu Company