عِبرانیَل 11 - کتاب مقدس به زبان لکی - گویش مرکزیوَه ایمو 1 اِسگَه ایمو، اطمینون اَر چیئَلی کَ گه امیدون‌ئون دیریم ئو زقین اَر چیئَلی گه هَنی نِموئینیم. 2 اَرِیَگه وَه‌سونگَ ایمونا بی گه اژ مردِم قدیم وَه خوئی تیَریف بی. 3 وَه‌سونگَ ایمونَ گه ایمَه مَفیَمیم گه دنیا وَه‌سونگَ کلوم خدا خَلک بی، هُنَ گه اَ چیئَه گه موئینیم اژ چیئَلی گه نِماو بوئینیم دُریس بی. 4 وَه ایمو بی گه هابیل قُرونی‌ای پیشکَش کِردی اَر خدا گه ویشتِر اژ هِن قائِن قبول بی، ئو وَه‌سونگَ اَوا، اِبارَه او شاتیو دا گه صالحَ، خدا اژ پیشکَشیَل او وَه خوئی تیَریف کِردی. وَه‌یاآگه مِردیَ وَه‌سونگَ ایمونیا، هَنی قصَه مِهِه. 5 وَه ایمو خَنوخ اژ ایی دنیاءَ ویرِ بِلِنگ بَریا تاگَه مرگ نوئینی ئو نوئیَ دی، اَرِیَگه خدا او بِردی. اَرِیَگه وِر اژ یَگه بیَرنی، اِبارَه او شاتیو دا گه وَه دل خدا بیَ. 6 ئو بی‌ایمو مِحالَ وَه دل خدا بوئیمو، اَرِیَگه هر کی نزیکا ماو اَر او، باس ایمو داشدوئیتی گه او هَسی ئو وَه کسَلی گه مِنِیَ مَهَنی اَجِرَ مِ. 7 وَه ایمو بی گه نوح وخدی اِبارَه چیئَلی گه تا اَ زمونَ کس نِئیتئی، اژ جونِم خدا هُشتار گِرتی، وَه خداترسی اَرِه نجاد عتِ‌عیال ووژ کَشتی‌ای ساخدی. او وَه ایی کاریَ دنیا مَکوم کِردی ئو بیَ وارث اَ صالح‌بیئینی گه اژ رئی ایمونَ ماءَ دس. 8 وَه ایمو بی گه ابراهیم وخدی دَوَت بی، اطاعت کِردی ئو چی اِرَه جای گه باس موئردیَ میرات، او بی‌یَگه بِذانی ویرِ کوءَ مَچو، کِردیَ دِریر. 9 وَه ایمو بی گه اِ هیالی گه وَدَه‌ئو دائی، اِجور بیگونه‌ی اِ خَریوی، وَه‌گَرد اسحاق ئو یعقوب گه وَه‌گَرد او وارث هَراَ وَدَه بین، اِنوم داوارَل زِنِه‌ی کِردی. 10 اَرِیَگه چیَمَ‌رئی شیَری بی گه بِناوَه داشدوئیتی، گه مِمار ئو بنّای خداءَ. 11 وَه ایمو بی گه سارا قویَت لَم‌پِربیئِن گِرتی، وَه‌یاآگه مَزا بی ئو ووژیشی پیر بی؛ اَرِیَگه او وَدَه‌دهندَه وَه اَمونتدار ذِناسدی. 12 اُهُنَ، اژ یِه پیا، اَویشَ اژ کسی گه مَری مِردی‌ای بی، نسِلَل هاتِنَ دی، گه چَن آسارَه‌ل آسمو، ئو چَن هُسَل بی‌حدِحساو لو دریا بین. 13 یوئنَ کُل اِنوم ایمو مِردِن، بی‌یَگه وَدَه‌لو گِرتوئی، بلکِم اونَلو اژ دویرا دی ئو سِلامو کِردِن. اونَل قبولو کِرد گه اَررُی زَمی، بیگونَه ئو خَریوِن. 14 اَرِیَگه اونَلی گه هُنَ موشِن، آشگارا نشونَ میَن گه هان اَر فِتِراخ وطنیکا. 15 اَرّ وَه فگِر هیالی بین گه اَژی کِردوئیونَ دِریر، مِجالو داشد گِلابیرِنِ دُما. 16 مِنتائای اِسگَه آواخد مملکت بیتِری دیرِن، یانی مملکت آسمونی‌ای. اَژونَسَ گه خدا عار نِمایتی گه خداءِ یوئنَ هِنا بو، اَرِیَگه شیَرونی اَرِه تیارِک دیِ. 17 وَه ایمو بی گه ابراهیم وخدی اِنتحو بی، اسحاق پیشکَش کِردی؛ ئو او گه وَدَه‌ل خدا گِرتوئیتی، داشدی کُر یَکونَه ووژ قُرونیَ مَهَردی، 18 هَر اَوَه گه اِبارِه‌ی وِتونَ: «نسِل تو اژ اسحاق وَه حساوَ مای.» 19 ابراهیم هُنَ فگِر کِردی گه خدا مَتونی جُ‌جُ اسحاق اژ مِردیَل زِنیا کِ، ئو ماو بوشیم گه هَماری ابراهیم اسحاق اژ مِردِنا سَنی. 20 وَه ایمو بی گه اسحاق، اَرِه چیئَل آیندَه بِرَکت داتیَ یعقوب ئو عیسو. 21 وَه ایمو بی گه یعقوب وخدی اَر سَکَرات بی، بِرَکت داتیَ هرکُم اژ کُرَل یوسف ئو هُنَ گه تکی دائیتی اَر موزبِرَه ووژ، چَمیا ئو خدا عَبادت کِردی. 22 وَه ایمو بی گه یوسف اِ آخِر عمِر ووژ، اژ وَه‌دِریرچیئِن بنی‌اسرائیل وِتی ئو اِبارَه سِخونَل ووژ وصیت کِردی. 23 وَه ایمو بی گه وخدی موسی هاتَ دی داباوِه اوئن اَرِه سه مُنگ شاردا، اَرِیَگه دییو آویل نازاری کَ، ئو اژ حکِم پاتِشا زِلَئو نَچی. 24 وَه ایمو بی گه موسی وخدی گه کَلِنگ بی، نِهِستی وَه دِتَرزا فرعون هِنا بو. 25 او زجِر کیشینَ گَرد قوم خدا بیتِر ذِناسدی تا یَگه اژ گِری خَوشی گنا، لَذت بیَری. 26 ئو لارِه‌ی گه وَه خاطر مسیح بیتی اَری کَلِنگتِر اژ گنجَل مصر ذِناسدی، اَرِیَگه چیَمَ‌رئی اَجِر بی. 27 وَه ایمو بی گه موسی بی‌یَگه زِلَه اژ خَضو پاتِشا بِچوتی اژ مصر کِردیَ دِریر، اَرِیَگه او طاخَت آوِردی، اِجور کسی گه اَوَه گه نِماو بوئینینی، موئینی. 28 وَه ایمو بی گه موسی پِسَخ ئو پِشکونِن خوین آوِردیَ جا تا فریشدِه‌ی گه اول‌زائَل نابودَ مِهِه، دس اَر اول‌زائَل اسرائیل دِریژ نِهِه. 29 وَه ایمو بی گه قوم اسرائیل اژ نومجا دریا سوئر اِجور زَمی حشگی کِل بین؛ مِنتائای وخدی مصریَل تقِلائو کِرد هَراَ کارَ بِهَنَ، غرخ بین. 30 وَه ایمو بی گه تیخَه‌ل شیَر اَریحا دُما یَگه قوم اسرائیل هفت روژ اِ دور اَوا دورو دائی، رِمیا. 31 وَه ایمو بی گه راحابِ خِراو وَه‌گَرد اونَلی گه کورفِربونیو کِردوئی، نکُشِریا، اَرِیَگه وَه گرمی چوئیِ گِرد جاسوسَل. 32 دیَر چَه بوشِم؟ اَرِیَگه مِجال نیَ اِبارَه جِدعون ئو باراق ئو شَمشون ئو یَفتاح ئو داوود ئو سموئیل ئو پِخَمَرَل قصَه بِهَم، 33 گه وَه ایمو، مملکتَلون اِراگِرت، عدالتو آوِردَ جا، ئو وَدَه‌لو آوِردَ دس؛ دَم شیرَلو بَسد، 34 ئو بِلیزَل داخ آگِرو کورا کِرد ئو اژ تیخَه شِمشیرَل اِرچِن، ضیَفو بیَ قویَت؛ اِنوم جنگ زوردارا بین ئو لشکرَل بیگونه‌ئو اژ یَک چویچو. 35 ژِنَل، مِردیَل ووژونَ زِنی کِردَ دی. مِنتائای بِری‌تِر شکنجَه بین ئو نَچِنِ گِرد آزادی، تاگَه اِدوارَه اَرِه زِنِه‌ی بیتِری، زِنیا بوئن. 36 باقی تیزمَتَل بین ئو شلاخو هُارد، ئو جُ‌جُ کیشیانَ زنجیر، ئو آوشدِنون اِنوم زندو. 37 سنگسار بین، وَه هَرَّه بینَ دو کُتا ئو وَه شِمشیر کُشِریان. پوس کاوِر ئو بِز اِوَر آوارَه ایلا ئو اَلا، ژار ئو خوار ئو زجِرکیش بین. 38 اونَلی گه دنیا لائقو نوئی، اِنوم بیاوونَل ئو کویَل، ئو مَرَل ئو تِرَکَل زَمی، بی‌دِرَتون بین. 39 یوئنَ کُل وَه‌یاآگه وَه خاطر ایمونو وَه خوئی اَژینو تیَریف بیَ، وَدَه‌ئو نَگِرت. 40 اَرِیَگه خدا چی بیتِری اَرِنمو آوشدوئیتیِ کِل چیَما تا اونَل بی ایمَه کاملا نوئن. |
@ 2024 Korpu Company