عِبرانیَل 10 - کتاب مقدس به زبان لکی - گویش مرکزیقُرونی مسیح یِه گِل اَرِه همیشَه 1 اَرِیَگه شریعت فَخَد سا چیئَل خوئی کَ گه میا بای، نه رُی راسَکونیو. اَژونَسَ، هرگِس نِمَتونی وَه هَراَ قُرونیَلی گه یِمِجو سالَ سال پیشکَشَ موئن، کسَلی گه اَرِه عَبادت نزیکا موئن، کاملا بِهِه. 2 اَرّنَه یانی پیشکَش کِردِن قُرونیَل آنموسیا؟ اَرِیَگه، کسَلی گه عَبادتَ مَهَن یِه گِل اَرِه همیشَه پاکا موئیان ئو اژ اَوِءِ دُما دیَر وَه خاطر گنائَلو ووژونَ گناکار نِمَذناسد. 3 مِنتائای اَ قُرونیِلَ کُلِ سالی گنائِلَ مارِنَ ویر، 4 اَرِیَگه مِحالَ خوین گامیشَل ئو بِزَل گنائَل اژ بِن بیَری. 5 اِسَه، وخدی گه مسیح هات اِنوم دنیا، وِتی: «قُرونی ئو پیشکَشیِت نِهِست، مِنتائای لارتی اَرِه مِه تیارِک دی، 6 قُرونیَل سُتِنی ئو قُرونیَل گنا، وَه دلِت نوئین. 7 اَسَه وِتِم: ”اِاِ خدا، اِسگَه مِنَ مام، تاگَه، خواس تو بارمَ جا؛ هَرهُنَ گه اِنوم طومار کِتاو اِبارَه‌م نُیسیاءَ.“» 8 وِر اژ یَه موشی: «قُرونی ئو پیشکَشی، قُرونیَل سُتِنی ئو قُرونیَل گنات نِهِست ئو وَه دلِت نوئین»، وَه‌یاآگه یوئنَ مِطابق شریعت پیشکَشَ موئیان. 9 اَسَه وِتی: «اِسگَه مِنَ مام تاگَه خواس تو بارمَ جا.» اِسَه اولینِهَه باطلَ مِهِه تاگَه دوئِمینِهَه بِنی. 10 ایمَه، وَه‌سونگَ قُرونی لار عیسی مسیح، یِه گِل اَرِه همیشَه وَخم او بیمونَ. 11 هر کاهن، کُلِ روژی موسی اَر سر خِلمت، ئو هَراَ قُرونیَلی گه هرگِس نِمَتونِن گنائَل اژ بِن بیَرِن، هَر پیشکَشَ مِهِه. 12 مِنتائای مسیح دُما یَگه اَرِه همیشَه یِه قُرونی اَرِه گنائَل پیشکَش کِردی، نیشت اَر دس راس خداآ. 13 اژ اَوِءِ دُما، چیَمَ‌رئیَ گه دشمنَلی بوئنَ کرسی اِژیر پائلی، 14 اَرِیَگه وَه یِه پیشکَشی، کسَلی گه وَخمَ موئن تا ابد کاملا کِردیَسی. 15 روح‌القدس‌یش اِبارَه یَه اَرتَک ایمَه شاتیَ مِ. اَرِیَگه دُما یَگه وِتوئیتی: 16 «خداونَ موشی، یَسَ عَتی گه دُما اَ روژِلَ وَه‌گَرد اونَ موئنِم. شریعت ووژمَ مَنِم اِنوم دلَلو، ئو مَنُیسِنِم اَررُی فگِرَلو.» 17 اَسَه موشی: «گنائَل ئو کارَل شَرو دیَر نِمارمَ ویر.» 18 جای گه یوئنَ بَشخیا بوئن، دیَر هَوَجه‌ی اَر پیشکَشی قُرونی اَرِه گنائَل نیَ. اطمینو کامل ایمو 19 اِسَه اِاِ بِرال، وَه‌چوینا گه اطمینو دیریم گه وَه خوین عیسی مَتونیم بِچیم اِنوم مَکو قدس‌الاقداس، 20 اژ رئی تازَه ئو زِنی‌ای گه اژ نومجا اَ پردَه یانی لار ووژ، اَرِه ایمَه واز کِردی، 21 ئو اَرِیَگه کاهن کَلِنگی اَررُی مال خدا دیریم، 22 بورِن وَه دلی رُی‌راس ئو اطمینو کاملِ ایمو نزیکا بوئیمون اَر خدا ئو، هُنَ گه دلَلمو اژ وِژدان گَن پاکا کِردیَ ئو لارَلمو وَه آو پاک شوریَ؛ 23 بورِن بی‌یَگه سُسا بوئیمو، سفدِسخد بچسبیمون اَر امیدی گه اعترافَ مِهِیمی اَری، اَرِیَگه وَدَه‌دهندَه اَمونتدارَ. 24 ئو بورِن وَه فگِر یَه بوئیم گه چطور یَکتِری تشویق کِیم اَر مِحبت ئو کارَل خو. 25 ئو اژ جیَم بیئِن اِ دور یَک دس هیزنِیم، هُنَ گه بِری هوکارَه بینَ، بلکِم ویشتِر یَکتِری تشویق کِیم -مصقوصاً اِسگَه گه موئینینو اَ روژَ، روژ گِلاهُاردِن خداون عیسی، دیری نزیکتِرا ماو. 26 اَرِیَگه اَرّ دُما گِرتِن شناخت حخیخت، ایمَه اژ قَص هَر گنا بِهِیم، دیَر هُیچ قُرونی اَرِه گنائَل باقی نِمَمینی؛ 27 بلکِم چیئی گه مَمینی، چیَمَ‌رئی مَنِن ترسناک اَرِه قضاوت ئو بِلیزَل آگِری کَ گه دشمنَل خدا قویت اِرامِ. 28 هر کی شریعت موسی ناءِ لا، وَه شاتی دو یا سه شات، بی‌یَگه ریَم اَری بوتی مَکُشِریا. 29 هُمَه فگِرَ مِهِینو کسی گه کُر خدا ناسیِ ژیر پا ئو خوین عَتی گه وَه اَوَه وَخم بوئی، ناپاک وَه حساو آوِردیِ ئو بی‌عزّتی کِردیَسیَ روحِ فیض، چه مِجازات سخدتِری حَخَسی؟ 30 اَرِیَگه ایمَه اَوَه گه یَه وِتی، مَشتاسیم: «تَخاص هِن مِنَ؛ مِنِم گه سزاءَ میَم،» 31 کَتِن اِ دَسَل خداءِ زِنی چی ترسناکی کَ. 32 اَ روژَل وِر اژ یَه بارنَ ویرتو، زمونی گه تازَه نُیردارا بوئینو؛ اِ اَ روژِلَ، اِ جنگ کَلِنگیَ گَرد عذاوَل طاختتو آوِرد. 33 گِلی‌یِگِل اِ وَر چیَم کُل مردِم دُشمینونَ مائونتو ئو آزارونَ ماینو ئو گِلی‌یِگِل شونَ‌شو کسَلی موسیاینو گه وَه‌گَردو هُنَ رفدارَ موئیا. 34 اَرِیَگه وَه‌گَرد اونَلی گه اِ زندو بین، هُمدردیتونَ مَهَرد ئو وخدی مالِ‌منالتو خارَتونَ مَهَرد وَه خَوشی مَچیاینونِ گِرد، اَرِیَگه مَذِناسدتو مالِ‌منال بیتِری دیرینو گه پایارَ. 35 اِسَه ایی اطمینونتونَ نَنِن‌ِ لا، اَرِیَگه اَجِر کَلِنگی دیری. 36 اَرِیَگه لازمَ پایار بِمینینو تا زمونی گه خواس خداتو اَنجوم دا، اَ چیئَه گه وَدَه هاوِنتیَ بارینونَ دس. 37 اَرِیَگه دُما مِدتی‌تِر «اَوَه گه باس بای، مای ئو دیر نِمِهِه. 38 مِنتائای آم صالحِ مِه وَه ایمو زِنِه‌یَ مِهِه. ئو اَرّ گِلابیریِ دُما، وَه دل مِه نیَ.» 39 مِنتائای ایمَه اژ کسَلی نیئیم گه گِلامیرِنِ دُما ئو نابودَ موئن، بلکِم اژ اُوُنیم گه ایمو دیرِن ئو گیونو حفظَ مَهَن. |
@ 2024 Korpu Company