غَلاطیَل 6 - کتاب مقدس به زبان لکی - گویش مرکزی

بارَل یَکتِری بِکیشِن اَر کول

¹ اِاِ بِرال، اَرّ کسی گرفدار خطای بو، هُمَه گه روحِ خدا دیرینو وَه روحِ مِلائمت گِلادَنی، هَمیش حُواستون ووژتو بو تاناخواد وسوسَه بوئینو.

² بارَل یَکتِری بِکیشِن اَر کول گه هُنَ شریعت مسیحَ مارینون‌َ جا.

³ اَرِیَگه اَرّ یَکی ووژَ کسی بِذانی گه نیَ، ووژ فنَ مِ.

⁴ مِنتائای هر کی باس کار ووژ اِنتحو کِ. اَسَه دلیلی فَخَد ماوَ کار ووژ تا وَه ووژ بنازی نه هُمسای.

⁵ اَرِیَگه هر کی باس بار ووژ بِکیشی اَر کول.

⁶ هر کی اژ کلوم خداءَ مَگِریا، باس مَلِم ووژ اِ کُل چیئَل خو بیَردارا کِ.

⁷ فن نیرِن: کس نِمَتونی خدا تیزمَتَل بِهِه. اِنسو هر چی کِشت بِهِه، هَر اَوَه دروءَ مِهِه.

⁸ اَرِیَگه اَوَه گه اَرِه جسم ووژ کشتَ مِهِه، اژ جسم، خِراوی دروءَ مِهِه؛ مِنتائای کسی گه اَرِه روحِ خدا کشتَ مِهِه، اژ روحِ خدا ژییاین ابدی دروءَ مِهِه.

⁹ اِسَه اژ خوئی کِردِن دلسرد نوئیمو، اَرِیَگه اَرّ شَکَت نوئیمو، وَه موقَع ووژ، دروءَ مِهِیم.

¹⁰ اِسَه تا وخد دیریم خوئی بِهِیم اَر کُل کس، مصقوصاً اَر ایمودارَل مسیح.

هُشتار آخِر

¹¹ سِیل کَن مِه وَه دسخط ووژِم چَنی کَلِنگ کَلِنگ اَرِنتونَ مَنُیسِنِم!

¹² اونَ گه میا ووژو اِ ظاهر خو نِشو دَن، مجبورتونَ مَهَن گه ختینَه بوئینو، فَخَد وَه ایی نیّتَ گه وَه خاطر صلیب مسیح عذاو نکیشِن.

¹³ اَرِیَگه اونَلی گه ختینَه موئن جُ‌جُ ووژو شریعت نِمارِن‌َ جا، بلکِم میا هُمَه ختینَه بوئینو تا وَه جسمتو افتخار بِهَن.

¹⁴ مِنتائای ناخواد مِه هرگِس وَه چیئی افتخار بِهَم بِخِر اژ صلیب خداونمو عیسی مسیح، گه وَه‌سونگَ اَوَه دنیا اَرِه مِه کیشیا اَر صلیب‌اِرا ئو مِه اَرِه دنیا.

¹⁵ اَرِیَگه نه ختینَه بیئِن چیئی کَ ئو نه ختینَه نوئین؛ چیئی گه مِهمَ خلقت تازهءَ.

¹⁶ سِلامتی ئو ریَمَت اَر کُل کسَلی گه مِطابق ایی قانونَ زِنِه‌یَ مَهَن، ئو اَر اسرائیل خدا.

¹⁷ اَژیرِ دُما کسی باعث آزارِم ناو، اَرِیَگه مِه اَر رُی لارِم نشونَه‌ل عیسی دیرِم.

¹⁸ اِاِ بِرال، فیض خداونمو عیسی مسیح وَه‌گَرد روحتو بو! آمین!