غَلاطیَل 5 - کتاب مقدس به زبان لکی - گویش مرکزیمسیح ایمَه آزاد کِردیَسی 1 اَرِه آزادی بی گه مسیح ایمَه آزاد کِردی. ایلَهَه سفدِسخد بوسِن ئو ووژتو گِلی هَنی گرفدار دارِبرگ بَنِه‌ی نَهَن. 2 گوش بِگِرِن! مِه، پولُس، موشِمَ بینتو گه اَرّ ختینَه بوئینو، مسیح هُیچ فادِه‌ی اَرِنتو نِری. 3 مِه اِدوارَه وَه هر کسی گه ختینَه بو شاتیَ میَم گه باس کُل شریعت باریَ جا. 4 هُمَه اژ مسیح جیاآ بینونَ، هُمَه گه تقِلاءَ مِهِینو وَه‌سونگَ شریعت صالح وَه حساو باینو؛ هُمَه اژ فیض دویرا کَتینونَ. 5 اَرِیَگه ایمَه وَه‌سونگَ روحِ خدا، وَه ایمو، چیَمَ‌رئی اَ صالح‌بیئینی کیم گه امیدَ بی دیریمی. 6 اَرِیَگه اِ مسیحْ عیسی نه ختینَه بیئِن چیئی کَ نه ختینَه نوئین، بلکِم مِهم ایمونی کَ گه اژ رئی مِحبت کارَ مِهِه. 7 هُمَه خوءَ مَنیاتون اَر دو. کی نواتو گِرتی تا فِربوبَر حخیخت نوئینو؟ 8 یَگه هُمَه هُنَ قانی بینونَ، اژ جونِم کسی گه هُمَه دَوَت مِهِه نیَ. 9 «تیکُلُنجِه‌ی حمیرتُرش، مَتونی کُل حمیر اِرباری.» 10 مِه اِنوم خداون اطمینو دیرِم گه نِمَچینون‌ِ گِرد عخیده‌ی هَنی. مِنتائای اَوَه گه هُمَه پریشونَ مِهِه، هرکی هَس، مَرَسی سزا کار ووژ. 11 اِاِ بِرال، اَرّ مِه هَنی ختینَه‌م موعظَه مَهَرد، اَرّا دیَر جَفامَ مَکیشیا؟ اَرِیَگه هُنَ دیَر پِغوم صلیب باعث رَنجونِن کسی نِموئیا. 12 کوشگُ اونَلی گه پریشونتونَ مَهَن، ووژون اژ پیاییَ ماوشدو! 13 اَرِیَگه اِاِ بِرال، هُمَه دَوَت بینو‌نَسَ آزادی، مِنتائای حُواستو بو آزادیتو ناوَ مِجالی اَرِه جسم، بلکِم وَه مِحبت خِلمت بِهَن اَر یَکتِری. 14 اَرِیَگه کُل شریعت اِ یِه حکِم خلاصَه ماو ئو اَوَه یَسَ: «هُمسات اِجور ووژِت دوسِت داشدوئی.» 15 مِنتائای اَرّ وَه قَپ ئو دِنو بِچینونِ گیژ یَک، حُواستو بو گه وَه دس یَکتِری اژ بِن نَچینو. زِنِه‌ی وَه‌گَرد روحِ خدا 16 مِنتائای مِنَ موشِم وَه روحِ خدا رفدار بِهَن، اَسَه چیئَلی گه جسم ها دُمونا نِمارینونَ جا. 17 اَرِیَگه چیئَلی گه جسم ها دُمونا اَرضد روحِ خدان ئو چیئَلی گه روحِ خدا ها دُمونا اَرضد جسمِن؛ اَرِیَگه هَردِک اَرضد یَکِن، جوری گه نِمَتونینو هر چَتونی مِ، اَنجوم بِینو. 18 مِنتائای اَرّ وَه روحِ خدا هدائَت بوئینو، دیَر اِژیر شریعت نیئینو. 19 کارَل جسم دیارِن: بی‌عصمتی، ناپاکی، ئو خیزی؛ 20 بِت‌پِرَسی ئو جادوگری؛ دشمنی، جنگ، حَسوئی، خِض، خودخواهی، فَساتی، جیایی، 21 حَسوئی؛ مَسی، عِیاشی ئو هُنَ چیئَلی. هَرهُنَ گه وِرِکار هُشتارِم داءَ بینتو، هَنی هُشتارَ میَم گه کسَلی گه هُنَ کارَلی مَهَن پاتِشائی خدا نِمیَرنَ میرات. 22 مِنتائای ثمر روحِ خدا، مِحبت، خَوشی، سِتار، صبِر، مِرِبونی، خوئی، وفاداری، 23 مِلائمت ئو نوا ووژ گِرتِنَ. هُیچ شریعتی اَرضد یوئنَ نیَ. 24 کسَلی گه هِن مسیحْ عیسی‌‌ن، جسم وَه‌گَرد کُل هوسَل ئو چیئَلی گه ها دُمونا کیشیونَس اَر صلیب. 25 اَرّ وَه روحِ خدا زِنِه‌یَ مِهِیم، وَه‌گَرد روحِ خدائیش رفدار بِهِیم. 26 اِلَکی کِلَچ نوئیم ئو اژ عصبونی کِردِن یَکتِری ئو حَسوئی کِردِن اَر یَکتِری دس هیزدِیم. |
@ 2024 Korpu Company