غَلاطیَل 4 - کتاب مقدس به زبان لکی - گویش مرکزیکُرَل ئو وارثَل 1 مصقود مِه یَسَ: تا وخدی گه وارث صغیرَ، فرخی وَه‌گَرد خُلُما نِری، وَه‌یاآگه صائای کُل چی بو. 2 ئو تا زمونی گه باوِه مَیِّن کِردیِ ها ژیر دس حُیائَل ئو وکیلَل. 3 اِبارَه ایمِه‌یش هَرهُنَسَ: تا وخدی صغیر بیمو، خُلُم قانونَل ایی دنیاءَ بیمو. 4 مِنتائای وخدی زمونی گه مَیِّن بیَ، تمومِ‌کمال رَسی، خدا کُر ووژ کِل‌کِردی گه اژ یِه ژَن زاندَه بی ئو اِژیر شریعت هاتَ دی، 5 تا کسَلی گه اِژیر شریعت بین آزاد کِ، ئو هُنَ ایمَه اِ مقوم کُرَل، حخ آویل‌اقراری بوءَ نَصُیمو. 6 اِسَه وَه خاطر یَگه آیلَلینو، خدا روحِ کُر ووژ کِل‌کِردی اِنوم دلَلمو گه دایَ ماتی، «اَبّا!» یانی «باوَه!» 7 اِسگَه، دیَر خُلُم نیئین، بلکِم کُرین؛ ئو اَرّ کُرین؛ اِسَه خدا وارث‌یش کِردینَسی. هول اِراگِرتِن پولُس اَرِه کلیسا غَلاطیَه 8 وِرِکار، زمونی گه خداتو نِمَشتاسیا، بَنَه اونَلی بینو گه ذاتاً خدا نیِن. 9 مِنتائای اِسگَه گه خداءَ مَشتاسینو، یاگَه بیتِرَ بوشِم، خدا هُمَه مَشتاسی، چطورَ مَتونینو اِدوارَه گِلابیرینو ویرِ قانونَل سُس ئو بی‌ارزشد ایی دنیا ئو مِتو اِدوارَه بَنَه اونَل بوئینو؟ 10 روژَل ئو مُنگَل ئو فصلَل ئو سالَل مارینون‌َ جا! 11 زِلَمَ مَچو زیَمَتَلمی گه اَرِنتو کیشیَ یِلا چوئی. 12 اِ بِرال، خواهشد اَژینتونَ مَهَم گه بوئینون اِجور مِه، اَرِیَگه مِن‌یش بیمَسَ اِجور هُمَه. هُمَه هُیچ گَنیتونی اَر حخ مِه نَهَرد. 13 هُمَه مَذانینو گه وَه خاطر مِرَضی گه اِ لارِم داشد، اول‌بار انجیلم اَرِه هُمَه موعظَه کِرد. 14 وَه‌یاآگه وضِ‌حال مِه اَرِه هُمَه اِنتحونی بی، مِنتائای مِنتونَ چیَم گُجَری ئو خواری سِیل نَهَرد. بلکِم اِجور فریشدَه خدای چینون‌ِ گِرد مِه هَماری مَچینون‌ِ گِرد مسیحْ عیسی. 15 اَنی اَ شوق ئو ذوقتونَ چِه‌اِر هاتی؟ اَرِیَگه شاتیَ میَم گه اَرّ موئیا، جُ‌جُ چیَمَلتونَ ماوِردَ دِریر ئو ماتونَ مِه. 16 یانی اِسگَه اَرِیَگه حخیختَ موشِمَ بینتو بیمَسَ دشمنتو؟ 17 اونَل هُنَ نشونَ میَن گه اَرِه هُمَه خیرَت دیرِن، مِنتائای نه وَه نیّت خِر. اونَ میا جوری هُمَه جیاآ کَن تا اَرِه اُوُ خیرَتِتو داشدوئی. 18 خیرَت داشدِن خوءَ، وَه شرطی گه وَه نیّت خو ئو یِمِجو بو. نه فَخَد وخدی گه مِه هامَ گَردتو. 19 اِ رولَه‌ل، گه اِدوارَه اَرِنتو ژُ زائین دیرِم تا مسیح اِنوم هُمَه شکِل بِگِری، 20 کوشگُ اِسگَه اَر تَکتو بوئیام تا وَه جوری‌تِر قصَه‌مَ گَردتونَ مَهَرد، اَرِیَگه اِبارَه هُمَه تَپَ سرِم شویاءَ. هاجر ئو سارا 21 هُمَه گه مِتو اِژیر شریعت بوئینو، بوشِنَ مِه، مَر وَه اَ چیئَه گه شریعتَ موشی گوش نِمَگِرینو؟ 22 اَرِیَگه اِنوم تورات نُیسیاءَ گه ابراهیم دو کُر داشدی، یَکی اژ کنیژ ئو یَکی‌تِر اژ ژَن آزادی. 23 مِنتائای کُر کنیژ مِطابق جسم هاتَ دی، وَه‌یاآگه کُر ژَن آزاد، وَه‌سونگَ وَدَه هاتَ دی. 24 ایی قصَه ماو وَه متل هُنَ بوشینی: ایی دو ژِنَ دو عَتِن. یَکی اژ کوی سیناءَ، گه آیلَلی اَرِه نوکریَ مَزای: او هاجرَ. 25 هاجر کوی سیناءَ اِ وِلات عِرَب، ئو اِجور شیَر اورشلیم اِسگَه‌سَ، اَرِیَگه وَه‌گَرد آیلَلی هانَ بَنِه‌ی‌اِر. 26 مِنتائای اورشلیم آسمونی آزادَ، ئو دا کُل ایمِئَه. 27 اَرِیَگه اِ کِتاو اِشعیا پِخَمَر نُیسیاءَ: «اِ مَزا گه نِمَزاین، خَوشالی بِهَه! اِ گه ژُ زائینِت نکیشیَ، وَه خَوشالی بِقارِن! اَرِیَگه آیلَل ژَنی گه تار بیَ اژ آیلَل ژَن میردَه‌دار ویشتِرَ موئن.» 28 اِسگَه هُمَه اِاِ بِرال، اِجور اسحاق آیلَل وَدِه‌ینو. 29 مِنتائای هَرهُنَ گه کُری گه مِطابق جسم هاتَ دی، اَوَه گه وَه‌سونگَ روحِ خدا هاتَ دی آزارَ ماتی، ایمِرویش هُنَسَ. 30 مِنتائای کِتاو تورات چَه موشی؟ «کنیژ ئو کُری باوژِ دِریر، اَرِیَگه کُر کنیژ هرگِس وَه‌گَرد کُر ژَن آزاد میرات نِمیَری.» 31 اِسگَه اِاِ بِرال، ایمَه آیلَل کنیژ نیئیم، بلکِم اژ ژَن آزادیم. |
@ 2024 Korpu Company