غَلاطیَل 3 - کتاب مقدس به زبان لکی - گویش مرکزیوَه ایمو یاگَه وَه کارَل شریعت؟ 1 اِاِ غَلاطیَل نایو، کی جادوتو کِردیِ؟ مرگ عیسی مسیح هُنَ آشگارا اَرِنتو تیَریف بی مَری اِ وَر چیَمَلتو کیشیا اَر صلیب. 2 فَخَد مِم یَه بِذانِم: آیا روحِ خداتو وَه اَنجوم دائِن کارَل شریعت گِرتیَ یاگَه وَه ایمون اَر اَ چیئَه گه شنَفتِتو؟ 3 یانی اَخِنَ نایونینو گه وَه روحِ خدا بِنیاتو نا اِسگَه میا وَه تقِلا اِنسونی کاملا بوئینو؟ 4 یانی کُل عذاوَلی گه کیشیتو بی‌فادَه بی- اَرّ اِراسی بی‌فادَه بی!؟ 5 آیا او گه روحِ خداءَ موئَشخیَ بینتو ئو مُجِزَه‌ل اِنومتو اَنجومَ مِ وَه خاطر یَه مِهِه گه کارَل شریعتَ مارینون‌َ جا، یا وَه خاطر یَگه اَر اَ چیئَه گه شنَفتِتو ایمو دیرینو؟ 6 هَراَ جورَ گه ابراهیم «ایمون اَر خدا آوِردی ئو یَه اَرِه او صالح‌بیئین وَه حساو یِهات.» 7 اِسَه بِذانِن گه ایمودارَل آیلَل ابراهیمِن. 8 ئو تورات وِرِکار دیتی گه خدا خِرِیهودیَل وَه ایمو صالح وَه حساوَ ماری، وِر اژ یَه بشارت داتیَ ابراهیم گه «کُل قومَل وَه‌سونگَ تو بِرَکتَ مَگِرِن.» 9 اِسَه اونَلی گه تَکیو هار ایمو، وَه‌گَرد ابراهیم، اَ پیا ایمونَ بِرَکتَ مَگِرِن. 10 اَرِیَگه اونَلی گه تکیا میَن اَر کارَل شریعت، کُل هانِ ژیر لیَن‌اِر، اَرِیَگه اِنوم تورات نُیسیاءَ گه «لیَن اَر هر کی گه نوسی اَر سر کُل اَ چیئِلَ گه اِنوم کِتاو شریعت نُیسیاءَ ئو اَنجومو نِ.» 11 اِسگَه دیارَ گه هُیچ‌کس وَه‌سونگَ شریعت اَر تک خدا صالح وَه حساو نِمای، اَرِیَگه «آم صالح وَه ایمو زِنِه‌یَ مِهِه.» 12 مِنتائای شریعت اژ ایمو نیَ، بلکِم «کسی گه یوئنَ ماریَ جا، وَه‌سونگَ اونَ زِنِه‌یَ مِهِه.» 13 مسیح هُنَ ایمَل اژ لیَن شریعت آزاد کِردی وَه ایی خیمتَ گه ووژ اِجال ایمَه لیَن بو، اَرِیَگه اِنوم تورات نُیسیاءَ گه «هر کی بوءَ دارا، لیَنَ ماوتی اَری.» 14 او هُنَ کِردی تاگَه بِرَکت ابراهیم اِنوم مسیحْ عیسی بوءَ نَصُی خِرِیهودیَل، ئو تا ایمَه اَ روحِ خداءَ گه وَدَه هاوِنتوئی، وَه‌سونگَ ایمو بِگِریم. شریعت ئو وَدَه خدا 15 اِ بِرال، بِیلِن متل معمولیتونی اَرِه بوشِم. جُ‌جُ عَتی گه اِنسونَ موئنی دُما یَگه رسمیا بو، هُیچ‌کس نِمَتونی باطل کِیتی یاگَه چیئی اضاف کِیتی اَری. 16 اِسگَه، وَدَه‌لی هاوِنتیَ ابراهیم ئو نسِل او. نِموشی «ئو وَه نسِلَل،» گه هَماری اِبارَه فِرَه کسَل، بلکِم موشی «وَه نسِل تو،» گه مصقود یِه نفرَ یانی مسیح. 17 قصَه مِه یَسَ: شریعتی گه چوارصد ئو سی سال دُما اَوَه هات، عَتی گه خدا وِر اژ اَوَه بَسدوئیتی باطل نِمِهِه، هُنَ گه وَدَه باطل کِ. 18 اَرِیَگه اَرّ میرات اژ شریعتَ مای، دیَر اژ وَدَه نِمای؛ مِنتائای خدا اَوَه اژ رئی وَدَه داءَ ابراهیم. 19 اِسَه مصقود اژ شریعت چیَ؟ شریعت وَه خاطر کورفِربونیَل اضافَه‌آ بی، اویشَ فَخَد تا وخدی گه اَ ’نسِلَ‘ گه وَدَه هاوِنتیَسیَ بی، بای. شریعت وَه‌سونگَ فریشدَه‌ل ئو وَه دس بَسخَه‌کَری نیریا. 20 اِسَه هُیچ بَسخَه‌کَری فَخَد نِمائندَه یِه طِرف نیَ، مِنتائای خدا یَکی کَ. 21 اِسَه یانی شریعت اَرضد وَدَه‌ل خداءَ؟ اصِلا! اَرِیَگه اَرّ شریعتی هاوِنتوئی گه مَتونِستی ژییاین بوئَشخی، اَسَه اِراسی صالح‌بیئین‌یش اژ رئی شریعت وَه دَسَ ماهات. 22 مِنتائای نُسَخ مقدّسَ موشی گه کُل چی ها بَن گنااِر، تاگَه اَ چیئَه گه وَدَه هاوِنتوئی اَررُی ایمون اَر عیسی مسیح بیَنَ ایمودارَل مسیح. 23 مِنتائای وِر اژ یَگه ایمو بای، ایمَه اِ بَن شریعت بیمو ئو تا آشگار بیئِن اَ ایمونَ، اسیر بیمو. 24 اِسَه تا وخدی گه مسیح بای شریعت بیَ حُیا ایمَه تا وَه‌سونگَ ایمو صالح وَه حساو بایم. 25 مِنتائای اِسگَه گه ایمو هاتیَ، دیَر اِ ژیر دس اَ حُیاءَ نیئیمو. 26 اَرِیَگه اِنوم مسیحْ عیسی، هُمَه کُل وَه‌سونگَ ایمو، کُرَل خدائینو. 27 اَرِیَگه وخدی گه کُلتو اِنوم مسیح تیَمیدتو گِرت، مسیحتو کِردِ وَر. 28 دیَر نه یهودی میَنا دیری ئو نه یونانی، نه خُلُم نه آزاد، نه پیا نه ژَن، اَرِیَگه هُمَه کُل اِنوم مسیحْ عیسی یَکی کینو. 29 ئو اِسگَه اَرّ هُمَه هِن مسیحینو، اِسَه نسِل ابراهیمینو ئو مِطابق وَدَه، وارثَل‌یش هِینو. |
@ 2024 Korpu Company