غَلاطیَل 2 - کتاب مقدس به زبان لکی - گویش مرکزیشورا اورشلیم 1 دُما چواردَه سال، گِلی‌تِر وَه‌گَرد برنابا چِم اَرِه اورشلیم ئو تیتوس‌یشِم وَه‌گَرد ووژِم بِرد. 2 وَه خاطر مِکاشفه‌ی گه گِرتِم چِم. اَر اورَه انجیلی گه اِنوم خِرِیهودیَل موعظَه مَهَم نام اَر وَرو؛ تا مِطمئن بوئم بی‌فادَه نَنیام اَر دو ئو نَنیامَس اَر دو، (وَه‌یاآگه مِه وَه بی‌کِشکی اَرِه کسَلی گه سرشناسَ چیَما ماهاتِن تیَریفِم کِردوئی.) 3 مِنتائای جُ‌جُ هُمسفرِم تیتوس، وَه‌یاآگه یونانی بی، مجبورو نَهَرد ختینَه بو. 4 یَه وَه ایی خاطرَ بیَ گه بِری اژ بِرال دِروزِنِ‌ئو بی‌کِشکی آوِرد اِنوم جیَم ایمَه، تا جاسوسی اَ آزادیَ گه اِنوم مسیحْ عیسی دیریم بِهَن ئو ایمَه اِدوارَه بِهَنَ بَنَه. 5 مِنتائای ایمَه جُ‌جُ گِری تسِلیم اونَل نوئیمو تا حخیخت انجیل اَرِه هُمَه حفظ بو. 6 مِنتائای اونَلی گه سرشناسَ چیَما ماهاتِن -اونَ هر کی بین اَرِه مِه فرخی نِمِهِه، اَرِیَگه خدا اَژی وِلِ‌بی‌جهتَ اژ کسی جونِمداری نِمِهِه- اَاَ، اونَل چیئونی اَر مِه اضاف نَهَرد، 7 بلکِم برعسک، اُوُ فیَمین گه وظیفَه اِلوم انجیل وَه ختینَه‌نکَریائَل یانی خِرِیهودیَل، سپارتیاسَ مِه، هَرهُنَ گه وظیفَه اِلوم انجیل وَه ختینَه‌کَریائَل یانی یهودیَل سپارتیائیَ پطرس. 8 اَرِیَگه او گه وَه‌سونگَ پطرس اِجور رسول یهودیَل کار کِردی، وَه‌سونگَ مِن‌یش اِجور رسول خِرِیهودیَل کار کِردی. 9 اِسَه وخدی یعقوب ئو پطرس ئو یوحنا گه سُتینَلَ چیَما ماهاتِن، فیضی گه نَصُی مِه بوئیو دی، دس رِقیفیو داءَ مِن ئو برنابا ئو کَتیم اَر یَک گه ایمَه بِچیم اَرِه تک خِرِیهودیَل ئو اُوُ بِچِن اَرِه تک ختینَه‌کَریائَل. 10 اونَل فَخَد اژ ایمَه‌ئو هِست گه ژارَلمون‌َ ویر بو، گه اَلوَت یَه اِراسی کاری بی گه مِه ووژِم شوق اَنجوم دائِنِم داشد. پولُس موسیِ نوا پطرس 11 مِنتائای وخدی پطرس هات اَرِه اَنطاکیَه، هوسیامی اَر نوا، اَرِیَگه حخ بیتی. 12 اَرِیَگه وِر اژ یَگه کسَلی اژ جونِم یعقوب بان، هُم‌سِفِرَه خِرِیهودیِلَ موئیا، مِنتائای هَریَگه اونَ هاتِن، داءِ لا ئو ووژ جیاآ کِردی، اَرِیَگه اژ طرفدارَل ختینَه زِلَه مَچیاتی. 13 باقی یهودیَل‌یش اِ ایی ریاکاریَ کَتن‌َ گَرد او، هُنَ گه جُ‌جُ برنابایش وَه خاطر ریاکاری اونَل اژ رئی اِرهات. 14 مِنتائای وخدی دیم رفدارو مِطابق حخیخت انجیل نیَ، اَر تک کُلو وِتمَ پطرس: «اَرّ تو، وَه‌یاآگه یهودی‌ای کین، اِجور خِرِیهودیَل زِنِه‌یَ مِهِین نه اِجور یهودیَل، چطورَ خِرِیهودیَل مجبورَ مِهِین گه اِجور یهودیَل رفدار بِهَن؟» 15 ایمَه ووژمو گه اِ لَم دامو یهودی هاتیمونَسَ دی ئو نه ’خِرِیهودی گناکار‘، 16 مَذانیم اِنسو نه وَه کارَل شریعت، بلکِم وَه‌سونگَ ایمون اَر عیسی مسیح صالح وَه حساوَ مای. اِسَه ایمِه‌یش ایمونمو آوِردیَس اَر مسیحْ عیسی تا وَه‌سونگَ ایمون اَر مسیح، صالح وَه حساو بایم ئو نه وَه کارَل شریعت، اَرِیَگه هُیچ بشری وَه اَنجوم دائِن کارَل شریعت صالح وَه حساو نِمای. 17 مِنتائای اَرّ وخدی هایمِ دُم یَه‌آ گه اِنوم مسیح صالح وَه حساو بایم، دیار بو گه گناکاریم، آیا میَنا یَسیَ گه مسیح خادم گناءَ؟ اصِلا! 18 اَرِیَگه اَرّ اَ چیئَه گه ووژِم رِمونِم اژ نوو بسازِم، نشونَ میَم گه خطاکارِم. 19 اَرِیَگه مِه وَه‌سونگَ شریعت، وَه شریعت مِردِم تا اَرِه خدا زِنِه‌ی بِهَم. 20 وَه‌گَرد مسیح کیشیام اَر صلیب، ئو دیَر مِه نیِم گه زِنِه‌یَ مَهَم، بلکِم مسیحَ گه اِنوم مِه زِنِه‌یَ مِهِه؛ ئو ایی زِنِه‌یَ گه اِسگَه اِ جسمَ مَهَم، وَه ایمون اَر کُر خداءَ مَهَم گه مِه دوس داشدی ئو گیو ووژ اَرِه مِه داتی. 21 مِه فیض خدا باطل نِمَهَم، اَرِیَگه اَرّ صالح‌بیئین وَه‌سونگَ شریعت وَه دَسَ ماهات، اِسَه مسیح بی‌فادَه مِرد. |
@ 2024 Korpu Company